ယူရို ၂၀၂၄ ခြေစစ်ပွဲ အဖွင့်ပွဲစဉ်အဖြစ် မတ်လ ၂၃ ရက်က ပေါ်တူဂီအသင်းနဲ့ လက်ချင်စတိန်း အသင်းတို့ ယှဉ်ပြိုင်ကစားခဲ့ရာ ပေါ်တူဂီအသင်းခေါင်းဆောင် ခရစ္စတီယာနို ရော်နယ်ဒိုက နိုင်ငံတကာပွဲစဉ်အများဆုံး ကစားသမားအဖြစ် စံချိန်သစ်တင်နိုင်ခဲ့သလို သွင်းဂိုး ၂ ဂိုးပါ ရယူပေးနိုင်ခဲ့ပါတယ်။
လက်ချင်စတိန်းအသင်းကို ၄ ဂိုး ဂိုးမရှိနဲ့ အနိုင်ရရှိခဲ့တဲ့ ဒီပွဲစဉ်မှာ ရော်နယ်ဒိုက ပေါ်တူဂီအသင်းအတွက် ပယ်နယ်တီနဲ့ အလွတ်တည်ကန်ဘောကနေ ၁ ဂိုးစီ သွင်းယူပေးနိုင်ခဲ့တာပါ။
ဒါကြောင့် နိုင်ငံ့လက်ရွေးစင်အဖြစ် နိုင်ငံတကာပွဲစဉ် ၁၉၇ ပွဲအထိ ကစားပေးခဲ့ပြီးဖြစ်တဲ့ ရော်နယ်ဒိုဟာ ကူဝိတ်အသင်းက ဘတ်ဒါ အယ်လ်မူတာဝါရဲ့ ၁၉၆ ပွဲစံချိန်ကို ကျော်ဖြတ်နိုင်ခဲ့ပါတယ်။
ပေါ်တူဂီအိမ်ကွင်းအဖြစ် လက်ခံကစားခဲ့တဲ့ ဟိုဆေး အဲဗားလိတ် အားကစားကွင်းကြီးမှာ အသင်းအတွက် အနိုင်ဂိုးတွေကို ဂျိုအာ ကန်ဆယ်လိုက ပွဲအစ ၈ မိနစ်မှာ သွင်းယူပေးနိုင်ခဲ့ပြီး ဒုတိယပိုင်း ပွဲပြန်စချိန် ၄၇ မိနစ်မှာတော့ ဘာနာဒို ဆေးလ်ဗားရဲ့ နောက်ထပ်သွင်းဂိုးနဲ့အတူ ၂ ဂိုးပြတ် ဦးဆောင်နေခဲ့တာပါ။
ရော်နယ်ဒိုက ပွဲချိန် ၅၁ မိနစ်မှာ ကန်ဆယ်လိုကြောင့် ရရှိလာတဲ့ ပယ်နယ်တီပြစ်ဒဏ်ဘောကို အပိုင်သွင်းယူနိုင်ခဲ့သလို ပွဲချိန် ၆၃ မိနစ်မှာလည်း သူသွင်းယူနေကျ ပုံစံအတိုင်းဖြစ်တဲ့ အလွတ်တည်ကန်ဘောကို အပြင်းကန်သွင်းကာ အသင်းအတွက် ၄ ဂိုးမြောက် ရယူပေးနိုင်ခဲ့ပါတယ်။
ပေါ်တူဂီအသင်းခေါင်းဆောင်ဟာ ဟက်ထရစ်သွင်းဂိုး ပြည့်မြောက်ဖို့ အခွင့်အရေး ၂ ကြိမ် ရခဲ့ပေမဲ့ အသုံးမချနိုင်ခဲ့တာကြောင့် ပွဲချိန် ၇၈ မိနစ်အရောက်မှာ ဂွန်ကာလို ရာမို့စ်နဲ့ လူစားလဲခဲ့ပါတယ်။
ပြီးခဲ့တဲ့လက အသက် ၃၈ နှစ်ပြည့်ခဲ့တဲ့ ရော်နယ်ဒိုဟာ ဒီပွဲစဉ်မှာ ၂ ဂိုး သွင်းယူနိုင်ခဲ့တာကြောင့် နိုင်ငံတကာသွင်းဂိုး ၁၂၀ အထိ ရှိလာခဲ့ပြီဖြစ်ပြီး နိုင်ငံအဆင့် ဘောလုံးလောကမှာ သွင်းဂိုးအများဆုံး ကစားသမားအဖြစ်လည်း ထိပ်ဆုံးက ရပ်တည်နေပါတယ်။
ကမ္ဘာ့ဘောလုံးအကျော်အမော် ခရစ္စတီယာနို ရော်နယ်ဒို ဟာ လာမယ့်ယူရိုခြေစစ်ပွဲစဉ်တွေအတွက် ပေါ်တူဂီ အသင်းနည်းပြသစ် ရောဘတ်တို မာတီးနက်ဇ်ရဲ့ ပထမဆုံးလူစာရင်းမှာ ပါဝင်လာခဲ့ပါတယ်။
ကမ္ဘာ့ဖလားပြိုင်ပွဲကနေ စိတ်ပျက်ဖွယ်ရာ ထွက်ခွာခဲ့ရပြီးနောက် လာမယ့်အပတ်မှာ လက်ချင်စတိန်းအသင်းနဲ့ ရင်ဆိုင်ကစားရမယ့်ပွဲစဉ်အတွင်း ရော်နယ်ဒို ပါဝင်လာလိမ့်မယ့်လို့ မီဒီယာနဲ့ ပရိသတ်တွေက ထင်ကြေးပေးခဲ့ကြပါတယ်။
နည်းပြသစ် မာတီးနက်ဇ်ကတော့ ရော်နယ်ဒိုရဲ့ အတွေ့အကြုံတွေဟာ ပေါ်တူဂီအသင်း လေ့ကျင့်ရေးအစီအစဉ်တွေမှာ အသုံးဝင်နိုင်တယ်လို့ ပြောဆိုထားပါတယ်။
"ခရစ္စတီယာနိုလို ကစားသမားမျိုးဟာ အသင်းအတွက် အလွန်အရေးပါပြီး အတွေ့အကြုံကောင်းတွေ ယူဆောင်ပေးလာနိုင်ပါတယ်၊ သူ့ အသက်အရွယ်ကို ကျနော် စိတ်မဝင်စားပါဘူး" လို့ စပိန်လူမျိုးနည်းပြက မှတ်ချက်ပေးပါတယ်။
ရော်နယ်ဒိုဟာ နိုင်ငံတကာသွင်းဂိုး ၁၁၈ ဂိုး နဲ့အတူ နိုင်ငံတကာ အဆင့်မှာရော ပေါ်တူဂီအသင်းမှာပါ သမိုင်းတလျှောက် သွင်းဂိုး အများဆုံး ကစားသမားအဖြစ် စံချိန်တင် ထားနိုင်ပါတယ်။
ဒီနှစ် ဇန်နဝါရီလကမှ ဆော်ဒီကလပ် အယ်လ်နက်စ်ဆာအသင်းကို ယူရိုသန်း ၂၀၀ နီးပါး တန်ကြေးရှိတဲ့ ၂ နှစ်ခွဲစာချုပ်နဲ့အတူ ရော်နယ်ဒိုက ပြောင်းရွှေ့သွားခဲ့တာပါ။
ဘယ်လ်ဂျီယံအသင်းနည်းပြဟောင်း မာတီးနက်ဇ်က ခံစစ်နေရာအတွက် နောက်ထပ်အတွေ့အကြုံရင့် ကစားသမားတဦးကို ရွေးချယ်ခဲ့ပြီး အသက် ၄၀ နှစ်အရွယ် ပီပီက အပြီးသတ် လူစာရင်းမှာ ပါဝင်လာခဲ့ပါတယ်။
ပေါ်တူဂီ နိုင်ငံ့လက်ရွေးစင်အသင်းဟာ ယူရိုခြေစစ်ပွဲစဉ်တွေအဖြစ် အဲဗာလိတ် အားကစားကွင်းကြီးမှာ လက်ချင်စတိန်းအသင်းနဲ့ မတ် ၂၃ ရက် ယှဉ်ပြိုင်ကစားရမှာ ဖြစ်ပြီး မတ် ၂၆ ရက်မှာတော့ လူဇင်ဘတ်အသင်းကို အဝေးကွင်း သွားရောက်ယှဉ်ပြိုင်ရမှာပါ။
