မြောက်ကိုရီးယားရဲ့ အကြီးမားဆုံး ဟွာဆောင်-၁၇ တိုက်ချင်းပစ် ပဲ့ထိန်းဒုံးကျည်တစင်း ပစ်လွှတ်ခဲ့တဲ့ ဗီဒီယိုမှတ်တမ်းကို မတ်လ ၁၇ ရက် ဒီကနေ့ နိုင်ငံပိုင်ရုပ်သံကနေ ထုတ်ပြန်ပါတယ်။
လက်ရှိမှာ အမေရိကန်နဲ့ တောင်ကိုရီးယား နှစ်နိုင်ငံအကြား ပူးတွဲစစ်ရေးလေ့ကျင့်နေမှုအပေါ် ပြင်းထန်တဲ့ တုံ့ပြန်မှုကို ပြသတဲ့အနေနဲ့ အခုလို လေ့ကျင့်ပစ်ခတ်ခဲ့တာ ဖြစ်တယ်လို့ ဆိုပါတယ်။
နိုင်ငံပိုင် KRT ရုပ်သံက ထုတ်လွှင့်ခဲ့တဲ့ ဗီဒီယိုမှတ်တမ်းနဲ့ ဓာတ်ပုံတွေထဲမှာ မြောက်ကိုရီးယား ခေါင်းဆောင် ကင်မ်ဂျုံအန်းနဲ့ သမီးဖြစ်သူ အပါအဝင် ထိပ်တန်းအရာရှိကြီးတွေက ဒုံးကျည်ပစ်လွှတ်မှုကို စောင့်ကြည့်ခဲ့ကြတာပါ။ ဒုံးကျည်ပေါ်မှာ တပ်ဆင်ထားတဲ့ ကင်မရာကတဆင့် အာကာသထဲက မြင်ကွင်းတွေကိုပါ အသေအချာ ပြသခဲ့တာဖြစ်ပါတယ်။
နျူးကလီးယားလက်နက် ပိုင်ဆိုင်ထားတဲ့ မြောက်ကိုရီးယားအပေါ် တန်ပြန်နိုင်ရေး နည်းလမ်းတွေကို ဆွေးနွေးမယ့် ထိပ်သီးအစည်းအဝေးအတွက် တောင်ကိုရီးယားသမ္မတက တိုကျိုမြို့ဆီ မသွားရောက်ခင် နာရီပိုင်းအလိုမှာ ကိုရီးယားကျွန်းဆွယ်နဲ့ ဂျပန်နိုင်ငံကြားက ပင်လယ်ပြင်ထဲကို မြောက်ကိုရီးယားက ဒုံးကျည်ပစ်လွှတ်ခဲ့တာပါ။
တောင်ကိုရီးယားနဲ့ အမေရိကန်အကြား “Freedom Shield 23” လို့ အမည်ပေးထားတဲ့ ၁၁ ရက်တာ ပူးပေါင်းစစ်ရေးလေ့ကျင့်မှုကို မတ်လ ၁၃ ရက်မှာ စတင်ခဲ့တာဖြစ်ပြီး မြောက်ကိုရီးယားရဲ့ ခြိမ်းခြောက်မှု မြင့်တက်လာတဲ့အပေါ် တုံ့ပြန်နိုင်ဖို့အတွက် ၂၀၁၇ ခုနှစ်နောက်ပိုင်း အကြီးမားဆုံး နှစ်နိုင်ငံ စစ်ရေးလေ့ကျင့်မှု ဖြစ်ပါတယ်။
မြောက်ကိုရီးယားဟာ တာတိုပစ် ပဲ့ထိန်းဒုံးကျည်နှစ်စင်းကို သူ့ရဲ့ အရှေ့ဘက်ကမ်းရိုးတန်းကနေ ပင်လယ်ထဲကို ပစ်လွှတ်ခဲ့ကြောင်း နိုင်ငံပိုင်မီဒီယာက မတ် ၁၅ ရက်မှာ ပြောပါတယ်။
တောင်ကိုရီးယားနဲ့ အမေရိကန်တပ်တွေဟာ ဒီနှစ်တွေအတွင်း သူတို့ရဲ့ အကြီးမားဆုံး ပူးတွဲစစ်ရေးလေ့ကျင့်မှု ပြုလုပ်ခဲ့တာကြောင့်လို့လည်း ဆိုပါတယ်။
မြောက်ကိုရီးယား အစိုးရပိုင် KRT ရုပ်မြင်သံကြားက နောက်ဆုံးပေါ် ဒုံးကျည်ပစ်လွှတ်မှု ဓာတ်ပုံ ၅ ပုံကို ထုတ်ပြန်ခဲ့တဲ့အပြင် မတ်လ ၁၄ ရက်က ဒုံးကျည်ပစ်လွှတ်မှုကလည်း တပ်ဖွဲ့ဝင်တွေကို သူတို့ရဲ့တာဝန်တွေကို အချိန်မရွေး ထမ်းဆောင်ဖို့ လေ့ကျင့်ခြင်းနဲ့ လိုအပ်လာရင် ရန်သူကိုချေမှုန်းဖို့ ဒီဇိုင်းထုတ်ထားတဲ့ စစ်ရေးလေ့ကျင့်မှုတခုဖြစ်ကြောင်း ထပ်လောင်းပြောပါတယ်။
ဒီနေ့ပစ်လွှတ်မှုဟာ “သရုပ်ပြလေ့ကျင့်မှု” ဖြစ်ပြီး တောင်ပိုင်း ဟွမ်ဟေးပြည်နယ်က အနောက်ဘက်ကမ်းရိုးတန်းအနီးမှာ မြေပြင်မှ မြေပြင် နည်းဗျူဟာမြောက် ပဲ့ထိန်းဒုံးကျည် ၂ စင်း ပစ်လွှတ်မှုကို မြင်တွေ့ခဲ့ရတာဖြစ်ကြောင်း နိုင်ငံပိုင်မီဒီယာက ပြောပါတယ်။
ဒုံးကျည်တွေဟာ အရှေ့ဘက်ကမ်းရိုးတန်းရှိ ကျွန်းငယ်လေးပေါ်က ပစ်မှတ်ကို မထိမိခင် နိုင်ငံကိုဖြတ်ကျော်ပြီး ၆၁၁ ကီလိုမီတာလောက် ပျံသန်းသွားကြောင်း နိုင်ငံပိုင်မီဒီယာက ပြောကြားခဲ့ပါတယ်။
တောင်ကိုရီးယားနဲ့ အမေရိကန် တပ်ဖွဲ့တွေဟာ ဒီနှစ်တွေအတွင်း အကြီးမားဆုံးဖြစ်တဲ့ “Freedom Shield 23” လို့ အမည်ပေးထားတဲ့ ၁၁ ရက်ကြာ ပူးတွဲစစ်ရေးလေ့ကျင့်မှုကို လုပ်ဆောင်လာတာကြောင့် မြောက်ကိုရီးယားကလည်း ဒုံးကျည်တွေပစ်ခတ်မှု ပိုများလာပါတယ်။
ပြုံယမ်းကတော့ အဲဒီ ပူးတွဲစစ်ရေးလေ့ကျင့်မှုတွေကို ဆိုးလ်နဲ့ ဝါရှင်တန်တို့က ရန်လိုတဲ့ မူဝါဒတွေကို သက်သေပြဖို့နဲ့ ကျူးကျော်ဖို့ အစမ်းလေ့ကျင့်မှုအဖြစ် ရှုတ်ချထားပါတယ်။
