မြောက်ကိုရီးယားခေါင်းဆောင် ကင်မ်ဂျုံအန်းဟာ သူ့နိုင်ငံရဲ့ အကြီးဆုံး နျူကလီးယား ပဲ့ထိန်း ဒုံးကျည် ပစ်လွှတ်မှု မလုပ်ခင် ၁ ရက်အလိုမှာ သူ့သမီးနဲ့ လက်ချိတ်တွဲပြီး စစ်ဆေးနေတဲ့ ဓာတ်ပုံတွေကို နိုဝင်ဘာ ၁၉ ရက်မှာ ပထမဆုံးအကြိမ် ထုတ်ဖော်ပြသခဲ့ပါတယ်။ 

မြောက်ကိုရီးယားဟာ ဟွာဆုန်း-၁၇ တိုက်ချင်းပစ်ဒုံးကျည် (ICBM) ကို နိုဝင်ဘာ ၁၈ ရက်က စမ်းသပ်ပစ်ခတ်ခဲ့ကြောင်း နိုင်ငံပိုင်သတင်းဌာန KCNA က နိုဝင်ဘာ ၁၉ ရက်မှာ သတင်း ထုတ်ပြန်ခဲ့ပါတယ်။ 

နိုင်ငံပိုင် KCNA မီဒီယာကတော့ ဓာတ်ပုံထဲမှာ အဖေဖြစ်သူကို လက်ဆွဲထားပြီး ကြီးမားလှတဲ့ ဒုံးကျည်ကို ကြည့်နေတဲ့ အဖြူရောင် ကုတ်အင်္ကျီ၀တ် မိန်းကလေးရဲ့နာမည်ကို မဖော်ပြ ထားပါဘူး။ 

ဒါပေမဲ့ အရင်က လူသိရှင်ကြား အတည်မပြုခဲ့ဖူးတဲ့ ကင်မ်ရဲ့သမီးရဲ့ ဓာတ်ပုံတွေ ထွက်ပေါ်လာတဲ့အတွက် အံ့အားသင့်စရာ ဖြစ်နေပါတယ်။ 

ကင်မ်မှာ  ကလေး ၃ ယောက်ရှိပြီး မိန်းကလေး ၂ ယောက်နဲ့ ယောက်ျားလေး ၁ ယောက် ရှိတယ် လို့ မြောက်ကိုရီးယားအရေး ကျွမ်းကျင်သူတွေက ဆိုထားပါတယ်။

၂၀၁၃ ခုနှစ်မှာ အနားယူထားတဲ့ အမေရိကန် ဘတ်စကက်ဘော အကျော်အမော် ဒန်းနစ်စ် ရော့ဒ်မန်းက ကင်မ်မှာ ဂျူအဲဆိုတဲ့  သမီးလေးရှိကြောင်းနဲ့ အဲဒီနှစ်က မြောက်ကိုရီးယားကို ခရီးထွက်တုန်းက သူဟာ ကင်မ်နဲ့ သူ့မိသားစုတို့နဲ့အတူ အချိန်ကုန်ဆုံးခဲ့ပြီး ကလေးငယ်ကို ထိန်းပေးခဲ့ဖူးကြောင်း သည်ဂါးဒီးယန်း  သတင်းစာကို ပြောကြားခဲ့ပါတယ်။ 

ဂျူအဲဟာ အသက် ၁၂ နှစ်မှ ၁၃ နှစ်ကြားရှိမယ်လို့ ခန့်မှန်းရပြီး နောက် ၄-၅ နှစ် ဆိုရင် တက္ကသိုလ်တက်ဖို့ ဒါမှမဟုတ် စစ်မှုထမ်းဖို့ ပြင်ဆင်တော့မှာဖြစ်ကြောင်း အမေရိကန်အခြေစိုက် စတင်မ်ဆွန်စင်တာမှ မြောက်ကိုရီးယားခေါင်းဆောင်ပိုင်း ကျွမ်းကျင်သူ မိုက်ကယ်လ် မဲ့ဒန်က ပြောပါတယ်။

ဒါဟာ သူ့ကို ပညာသင်ပေးပြီး ခေါင်းဆောင်မှုပိုင်းကို လေ့ကျင့်ပေးနေကြောင်း ညွှန်ပြနေတာလို့ ဆိုပါတယ်။ 

သူဟာ ဗဟိုခေါင်းဆောင်ပိုင်းရာထူးကို ထမ်းဆောင်ဖို့ ပြင်ဆင်နေတာ ဖြစ်နိုင်သလို သူ့အဒေါ်လို အကြံပေးနဲ့ လူမသိသူမသိ နောက်ကွယ်က ကြိုးကိုင်သူ ဖြစ်လာနိုင်တယ်လို့လည်း ခန့်မှန်းနေကြပါတယ်။ 

မြောက်ကိုရီးယားဟာ အရှေ့ဘက်ကမ်းရိုးတန်းက ပင်လယ်ပြင်ဘက်ဆီကို အမျိုးအမည်မသိ ပဲ့ထိန်း ဒုံးကျည်တစင်း စက်တင်ဘာ ၂၅ ရက်က ပစ်လွှတ်ခဲ့တယ်လို့ တောင်ကိုရီးယားနဲ့ အမေရိကန် တပ်ဖွဲ့တွေက ပြောပါတယ်။ 

အကွာအဝေး ဒါမှမဟုတ်  ပစ်မှတ်အပါအဝင် ဒုံးကျည်နဲ့ ပတ်သက်တဲ့ နောက်ထပ်အသေးစိတ်အချက်အလက်တွေကို တောင်ကိုရီးယား စစ်တပ်က မပြောခဲ့ပါဘူး။ 

မြောက်ကိုရီးယားဟာ ရေငုပ်သင်္ဘောကနေ ပစ်လွှတ်တဲ့ ပဲ့ထိန်းဒုံးကျည် (SLBM) ကို စမ်းသပ်ဖို့ ပြင်ဆင်နေတယ်လို့ တောင်ကိုရီးယား စစ်တပ်ကို ကိုးကားပြီး တောင်ကိုရီးယား အခြေစိုက် ယုံဟပ် သတင်းဌာနက စက်တင်ဘာ ၂၄ ရက်မှာ ဖော်ပြခဲ့ပါတယ်။ 

တောင်ကိုရီးယားတပ်ဖွဲ့တွေနဲ့ ပူးတွဲစစ်ရေးလေ့ကျင့်မှုမှာ ပါဝင်ဖို့ အမေရိကန်ဒုသမ္မတ ကာမာလာ ဟာရစ်ဟာ လာမယ့်သီတင်းပတ်အတွင်း တောင်ကိုရီးယားကို သွားဖို့ စီစဉ်ထားတာပါ။ 

အဲဒီအတွက် အမေရိကန် လေယာဉ်တင် သင်္ဘောတစီး ရောက်လာပြီးတဲ့နောက် မြောက်ကိုရီးယား က ခုလိုပစ်လွှတ်လိုက်တာလည်း ဖြစ်ပါတယ်။ 

မြောက်ကိုရီးယားဟာ ဇွန်လအစောပိုင်းမှာ တရက်အတွင်း တာတိုပစ် ပဲ့ထိန်းဒုံးကျည် ရှစ်စင်းကို ပစ်ခတ်ပြီးတဲ့နောက် အခုပစ်လွှတ်မှုက ပထမဆုံး အကြိမ်ပါ။ 

မြောက်ကိုရီးယားဟာ ကုလသမဂ္ဂလုံခြုံရေးကောင်စီရဲ့ ဆုံးဖြတ်ချက်တွေကို ချိုးဖောက်လို့ ကုလသမဂ္ဂက ပိတ်ဆို့ အရေးယူတာတွေ ပိုလုပ်ဖို့ အမေရိကန်က တောင်းဆိုခဲ့ပါတယ်။ 

မြောက်ကိုရီးယားကတော့ သူ့ရဲ့ ကိုယ်ပိုင် ကာကွယ်ရေးနဲ့ အာကာသစူးစမ်းလေ့လာရေး ဆိုင်ရာ အချုပ်အခြာအာဏာ ပိုင်ဆိုင်ခွင့်ကို ချိုးဖောက်မှုအဖြစ် ကုလသမဂ္ဂရဲ့ ဆုံးဖြတ်ချက်တွေကို ပယ်ချခဲ့ပါတယ်။