ထိုင်းနိုင်ငံမှာ ၉ နှစ်ရွယ် သမီးဖြစ်သူကို ပြည့်တန်ဆာလုပ်ခိုင်းပြီး ဗွီဒီယိုရိုက် ရောင်းစားတဲ့ အမျိုးသမီး ၁ ဦးကို ထိုင်းရာဇဝတ်မှုနှိမ်နင်းရေး ရဲတပ်ဖွဲ့က စုံစမ်းဖမ်းဆီးလိုက်ပါတယ်။

ဒီမတိုင်ခင်က ၉ နှစ်ရွယ် မိန်းကလေးငယ်တဦး မဖွယ်မရာအကျင့်ခံနေရတဲ့ ဗွီဒီယိုပုံတွေ လူမှုကွန်ရက်မှာ ပျံ့နှံ့နေခဲ့ပြီး အဆိုပါကိစ္စကို ရဲတပ်ဖွဲ့က စုံစမ်းကာ ထိုင်းအလယ်ပိုင်း ဆလာပူရီခရိုင်မှ အသက် ၂၆ နှစ်အရွယ် အမျိုးသမီး ၁ ဦးနဲ့ ဝယ်ယူသူ အမျိုးသား ၂ ဦးကို ဖမ်းဆီးထားကြောင်း ဆလာပူရီခရိုင်ရဲတပ်ဖွဲ့က ပြီးခဲ့တဲ့ ဇူလိုင် ၁၂ ရက်နေ့မှာ သတင်းစာရှင်းခဲ့ပါတယ်။

မိခင်ဖြစ်သူမှာ အလုပ်လက်မဲ့၊ ငွေကြေးအကျပ်အတည်းကြောင့် အဆိုပါလုပ်ရပ်ကို ကျူးလွန်ရတာလို့ ဝန်ခံထားပြီး မဖွယ်မရာဗွီဒီယိုကလစ် ရိုက်ကူးသူကတော့ တရားခံ ၃ ယောက်လုံးက တယောက်ကိုတယောက် လွှဲချနေကြတယ်လို့ ခရိုင်ရဲမှူးကြီး ကျီရဖို့ ဖူရိဒေ့ချ်က သတင်းထောက်တွေကို ပြောပါတယ်။

စစ်ကြောရေး ဆက်လုပ်ရာမှာတော့ အမျိုးသမီးဟာ ဒီမတိုင်ခင်က သူမရဲ့ လိင်ပိုင်းဆိုင်ရာ ဗွီဒီယိုပုံတွေကို လျှို့ဝှက်အဖွဲ့ထဲမှာ ရောင်းချခဲ့ကြောင်း၊ နောက်ပိုင်း သူ့ပုံတွေ ရောင်းမရတော့ဘဲ ဗွီဒီယိုထဲမှာတွေ့တဲ့ သူ့သမီးကို လူ ၁ ယောက်က ဘတ် ၅,၀၀၀ နဲ့ ဝယ်ချင်တယ်လို့ ဖေ့စ်ဘွတ်ခ်ထဲကနေ ပြောတာကြောင့် နခွန်းပထုံခရိုင်မှာ သွားရောင်းခဲ့ကြောင်း၊ ဗွီဒီယိုကိုလည်း အမေကိုယ်တိုင် ခုတင်ဘေးကနေရပ်ပြီး ရိုက်ကူးခဲ့ကြောင်း ဝန်ခံတယ်လို့ ဆိုပါတယ်။

သူမမှာ အရင်ယောကျ်ားနဲ့ သမီးမိန်းကလေး ၂ ယောက်ရကာ ပြည့်တန်ဆာလုပ်ခံရသူက သမီးအကြီးဖြစ်ပြီး ပထွေးနဲ့ နေနေတာလို့ ဆိုပါတယ်။

ပထွေးဖြစ်သူကတော့ သူ့မိန်းမ အဲလိုလုပ်တာကို မသိကြောင်း၊ နခွန်းပထုန်ကို လိုက်ပို့ပေးဖို့ ပူဆာပြီး ဟိုရောက်တော့ သမီးအငယ်ကို ပထွေးနဲ့ ခဏထားခဲ့ကာ သမီးကြီးနဲ့ အပြင်သွားမယ်ဆိုပြီး ဟိုတယ်တခုမှာ သွားရောင်းတာလို့ ဆိုပါတယ်။

ပထွေးက သူ့မိန်းမရဲ့လုပ်ရပ်တွေကို ရှုတ်ချကြောင်း၊ ကလေး ၂ ယောက်ဟာ သမီးရင်းမဟုတ်ပေမဲ့ ငယ်ငယ်ကတည်းက ကျွေးမွေးစောင့်ရှောက်လာလို့ သမီးရင်းလို သံယောဇဉ်ရှိကြောင်း၊ သူ့အမေထောင်ကျရင် ကလေး ၂ ယောက်ကို ကောင်းကောင်းပြုစု စောင့်ရှောက်သွားမယ်လို့ ပြောပါတယ်။

ရဲတပ်ဖွဲ့နဲ့ တာဝန်ရှိသူတွေကတော့ ကလေးရဲ့ စိတ်ပိုင်းဆိုင်ရာကိုပါ ပြန်လည်ကုစားရမှာမို့ လူမှုကယ်ဆယ်ရေးဂေဟာမှာပဲ ထိန်းသိမ်းစောင့်ရှောက်ထားမယ်လို့  ပြောသွားပါတယ်။

မြန်မာ-ထိုင်းနယ်စပ်၊ မြန်မာနိုင်ငံဘက်ခြမ်း မြဝတီမြို့က ကာစီနိုလောင်းကစားရုံတခုထဲမှာ ပြည့်တန်ဆာအဖြစ် အဓမ္မစေခိုင်းခံနေရတဲ့ ထိုင်းအမျိုးသမီး ၃၀၀ လောက်ရှိနေတယ်လို့ အဲဒီကနေ ထွက်ပြေးလွတ်မြောက်လာတဲ့ အသက် ၂၅ နှစ်အရွယ် ထိုင်းအမျိုးသမီးက ပြောပါတယ်။

အခြေအနေအရ အမည်မဖော်လိုတဲ့ အဆိုပါ အမျိုးသမီးက သူကြုံတွေ့ခဲ့ရတဲ့ အခြေအနေတွေနဲ့ ပတ်သက်ပြီးတော့ ထိုင်းတော်ဝင်ရဲတပ်ဖွဲ့ကို ဧပြီ ၂၈ ရက်မှာ တိုင်ကြားခဲ့ချိန် ခုလိုပြောလိုက်တာပါ။

အခုနှစ်အစောပိုင်းတုန်းက အင်တာနက်နာမည်ကျော်တယောက်က အွန်လိုင်းကနေ တိုက်ရိုက်ထုတ်လွှင့်တဲ့ အစီအစဉ်တခု ပြုလုပ်ခဲ့ပြီး အိမ်နီးချင်းနိုင်ငံ နယ်စပ်ဒေသမှာ ပြည်သူ့ဆက်ဆံရေးနဲ့ ဖျော်ဖြေရေးဆိုင်ရာ အလုပ်အကိုင်တွေအတွက် လျှောက်ထားနိုင်ဖို့ အမျိုးသမီးတွေကို ဖိတ်ခေါ်ခဲ့ကြောင်းနဲ့ အဆိုပါအလုပ်တွေဟာ လိင်ပိုင်းဆိုင်ရာ ဝန်ဆောင်မှုတွေနဲ့ မပတ်သက်ကြောင်းလည်း သူက အခိုင်အမာပြောဆိုခဲ့တယ်လို့ ဆိုပါတယ်။

အမျိုးသမီးအနေနဲ့ အဲဒီအလုပ်ကို လက်ခံခဲ့ပြီး မြဝတီမြို့က ကာစီနိုရုံကို ရောက်ရှိသွားချိန်မှာတော့ ပြည့်တန်ဆာအဖြစ် မလုပ်ဘူးဆိုရင် ဘတ်ငွေ ၂၅၀၀၀ ပြန်ပေးရမယ်လို့ အဲဒီက ဝန်ထမ်းက ပြောခဲ့တယ်လို့ဆိုပြီး အဲဒီအခြေအနေမှာ ထိုင်းအမျိုးသမီး ၃၀၀ လောက် ကာစီနိုရုံထဲမှာ ပိတ်မိနေကြောင်း အမျိုးသမီးက ပြောပါတယ်။

ပြီးခဲ့တဲ့ ဧပြီ ၂၇ ရက်ညမှာတော့ ထိုင်း-မြန်မာနယ်စပ် မြန်မာနိုင်ငံ၊ မြဝတီဘက်ခြမ်းမှာ ပြည့်တန်ဆာအဖြစ် လူကုန်ကူးခံရပြီး ပိတ်လှောင်ခံနေရတဲ့ ထိုင်းမိန်းကလေး ၂ ယောက်ဟာ သောင်ရင်းမြစ်ကိုလက်ပစ်ကူးပြီး ထိုင်းနိုင်ငံ မဲဆောက်ဘက်ကို ပြန်ရောက်လာတယ်လို့ ထိုင်းသတင်းတွေမှာ ဖော်ပြပါတယ်။

အဆိုပါမိန်းကလေးတွေဟာ ထိုင်းနယ်စပ်နဲ့ မီတာ ၄၀၀ အကွာရှိ နေအိမ်တလုံးမှာ အလှောင်ခံနေရတာဖြစ်ပြီး ပြည့်တန်ဆာအဖြစ် အတင်းစေခိုင်းခံရတာကြောင့် ထိုင်းလွှတ်တော်အမတ်ရဲ့ လက်ထောက် နိုင်းဧကဖုပ်ရိုင့်ပရဆစ်ကို လူမှုကွန်ရက်ကနေတဆင့် တိုင်ကြားခဲ့တယ်လို့ဆိုပါတယ်။

နိုင်းဧကဖုပ်လည်း မဲဆောက်ကိုလာရောက်ပြီး ထိုင်းနယ်ခြားစောင့်တပ်ကို အကြောင်းကြားထားရာမှာ မြန်မာစစ်တပ်ကင်းစောင့်အဖွဲ့ ဂျူတီချိန် အလဲအလှယ်လုပ်စဉ် မိန်းကလေး ၂ ယောက်က ထွက်ပြေးလာခဲ့ကြောင်း၊ သောင်ရင်းမြစ်နားရောက်တော့ အနောက်က ဓာတ်မီးတွေနဲ့ ထိုးပြီးလိုက်လာလို့ မြစ်ထဲ ခုန်ချကူးခတ်ခဲ့ကာ ထိုင်းစစ်သားတွေကို လှမ်းအော်ပြီးအကူအညီတောင်းခဲ့ကာ လွတ်မြောက်လာခဲ့တာလို့ သိရပါတယ်။

ဒီကနေ့မနက်မှာတော့ နိုင်းဧကဖုပ်က သူတို့ ၂ ယောက်လုံးကို ဘန်ကောက်ကို ပြန်ခေါ်လာခဲ့ပြီး ကာစီနို လောင်းကစားရုံမှာ ကျန်ရှိနေသေးတဲ့ အမျိုးသမီးတွေကို ကယ်တင်နိုင်ဖို့ ဆက်လက်ပြီးတော့လုပ်ဆောင်သွားမယ်လို့ ဆိုပါတယ်။