တောင်ဆူဒန်နိုင်ငံကို ပုပ်ရဟန်းမင်းကြီး ဖရန်စစ် မလာရောက်ခင် တရက်အလိုက အလယ်ပိုင်း အီကွေတိုရီးယားပြည်နယ်မှာ ကျွဲနွားထိန်းကျောင်းသူတွေနဲ့ ပြည်သူ့စစ်အဖွဲ့ဝင်တွေအကြား လက်တုံ့ပြန် အကြမ်းဖက်မှုမှာ လူ ၂၇ ဦး သေဆုံးခဲ့ကြောင်း ကာဂျိုကဲဂျီ ခရိုင်ကော်မရှင်နာ ဖနွဲလ် ဒူမိုက ရိုက်တာသတင်းဌာနကို ပြောပါတယ်။ 

ဖေဖော်ဝါရီ ၂ ရက်က သူပုန်အဖွဲ့မှ တိုက်ခိုက်ရေးသမားတွေဟာ တိရစ္ဆာန်ထိန်းကျောင်းနေတဲ့ အသိုင်းအဝိုင်းထဲက လူ ၆ ယောက်ကို သတ်ဖြတ်လိုက်ပြီးနောက်မှာ တိရစ္ဆာန်ထိန်းကျောင်းသူ တွေကလည်း လက်တုံ့ပြန် တိုက်ခိုက်ခဲ့ရာမှာ အနီးနားတစ်ဝိုက်က အရပ်သား ၂၁ ဦး သေဆုံးခဲ့ရပြီး အဲ့ဒီထဲမှာ ကလေး ၅ ဦးနဲ့ ကိုယ်ဝန်ဆောင်အမျိုးသမီး ၁ ဦးတို့ပါ သေဆုံးသွားခဲ့ရကြောင်း ခရိုင်ကော်မရှင်နာ ဖနွဲလ် ဒူမို က ပြောပါတယ်။ 

အခု လောလောလတ်လတ် သတ်ဖြတ်ကြမှု သတင်းကြောင့် ထိတ်လန့်သွားမိရတယ်လို့ တောင်ဆူဒန်ကို ပုပ်ရဟန်းမင်းကြီးနဲ့အတူ လိုက်ပါသွားတဲ့ ကန်တာဘာရီ ဂိုဏ်းချုပ်ကြီးက မိန့်ကြားပါတယ်။ 

“ဒါမျိုးအဖြစ်တွေက တောင်ဆူဒန်မှာ ခဏခဏ ကြားနေရတာပါ။ တောင်ဆူဒန်မှာ တရားမျှတတဲ့ ငြိမ်းချမ်းရေးအတွက် လက်တွဲဆောင်ရွက်ဖို့ တခြားနည်းလမ်းကိုလည်း ထပ်ပြီး တောင်းဆို ပါတယ်”လို့ သူ့ရဲ့တွစ်တာမှာ ရေးထားပါတယ်။ 

ပုပ်ရဟန်းမင်းကြီးဟာ အိမ်နီးချင်း ကွန်ဂိုဒီမိုကရက်တစ်သမ္မတနိုင်ငံကနေ တောင်ဆူဒန်ကို ဖေဖော်ဝါရီ ၃ ရက်မှာ ကြွရောက်ဖို့ စီစဉ်ထားတာပါ။

လူပေါင်း ရာထောင်ချီ သေဆုံးခဲ့ကြရတဲ့ တိုင်းရင်းသား မျိုးနွယ်စုတွေရဲ့နယ်မြေတွေပေါ်မှာ နှစ်ပေါင်းဆယ်ချီ ကြာမြင့်အောင် ဖြစ်ပွားခဲ့တဲ့ ပဋိပက္ခတွေကို ချုပ်ငြိမ်းစေဖို့ အဓိကရည်ရွယ်ပြီး ငြိမ်းချမ်းရေး လုပ်ငန်းစဉ်ကို အကောင်အထည်ဖော်ဖို့ မျှော်လင့်ထားပါတယ်။ 

၂၀၁၃ - ၂၀၁၈ ပြည်တွင်းစစ်ရဲ့ အဓိကအင်အားစုတွေ ၂၀၁၈ မှာ လက်မှတ်ရေးထိုးခဲ့တဲ့ ငြိမ်းချမ်းရေးသဘောတူညီချက်ကြောင့် လတ်တလောနှစ်တွေအတွင်း တောင်ဆူဒန်မှာ အကြမ်းဖက်မှုတွေ သိသိသာသာ လျော့ကျသွားခဲ့ပေမယ့် ပြိုင်ဘက်အသိုင်းအဝိုင်းတွေကြား အောက်ခြေအဆင့် ထိပ်တိုက်တွေ့မှုတွေ ဆက်တိုက်ဆိုသလို ဖြစ်ပွားနေပါတယ်။ 

နေပြည်တော်ရဲ့ ကျေးရွာရပ်ကွက်တိုင်းနီးပါးမှာ မဘသအဖွဲ့ဝင်တွေပါဝင်တဲ့ ပြည်သူ့စစ်အဖွဲ့တွေ ဖွဲ့စည်းပြီး သင်တန်းတွေ ပေးနေတယ်လို့ သိရပါတယ်။

စစ်ကောင်စီအနေနဲ့ ပြည်သူ့စစ်အဖွဲ့တွေကို နေပြည်တော်မှာ ပြီးခဲ့တဲ့ မေလပိုင်းလောက်ထဲက ဖွဲ့စည်းထားတာဖြစ်ပြီး လက်ရှိအချိန်မှာတော့ အခြေခံစစ်ပညာတွေကို သင်တန်းပေးနေတယ်လို့ သိရပါတယ်။ ပြည်သူ့စစ်တွေကို နေပြည်တော်က ရပ်ကွက်ကျေးရွာတွေအလိုက် ဖွဲ့စည်းထားတယ်လို့လည်း သိရပါတယ်။

“လယ်ဝေးဘက်က ရွာအချို့ကို သင်တန်းပေးပြီးသွားပြီ။ အခု ပျဉ်းမနားထဲမှာ သက်တန်းပေးနေတယ် ပြောတယ်။ ပြည်သူ့စစ်အဖွဲ့ဝင် အများစုကတော့ အုပ်ချုပ်ရေးမှူးတွေနဲ့ နီးစပ်ရာရာတွေပေါ့” လို့ နေပြည်တော် ဒေသခံတယောက်က ပြောပါတယ်။

ပြည်သူ့စစ်တွေအနေနဲ့ မိမိရပ်ရွာကို ကာကွယ်စောင့်ရှောက်ဖို့အတွက် ဖွဲ့စည်းထားတာဖြစ်ပြီး စစ်ကောင်စီက လက်နက်တပ်ဆင်ပေးမှာဖြစ်တယ်လို့လည်း ပြည်သူ့စစ်အဖွဲ့ဝင်တယောက်က ပြောပါတယ်။

စစ်ကောင်စီအနေနဲ့ ပြည်သူ့စစ်အဖွဲ့ဝင်တွေကို ကျေးရွာ၊ ရပ်ကွက်အလိုက် စစ်မှုထမ်းဟောင်းတွေနဲ့ ဦးဆောင်ဖွဲ့စည်းထားပြီး အခုနောက်ပိုင်းမှာ မဘသအဖွဲ့ဝင်တွေကိုပါ ထည့်သွင်းဖွဲ့စည်းထားတယ်လို့လည်း သိရပါတယ်။