ကရင်ပြည်နယ်၊ ကြာအင်းဆိပ်ကြီးမြို့နယ်တိုက်ပွဲမှာ  စစ်ကောင်စီဘက်က အရာရှိစစ်သည်  ရာချီသေဆုံးပြီး ဖမ်းဆီးရမိထားတဲ့ ခလရ ၂၈၄ တပ်ရင်းမှူးဇနီး ပြန်လွတ်သွားတယ်လို့  ကြာအင်းဆိပ်ကြီးမြို့နယ် ပြည်သူ့အုပ်ချုပ်ရေးအဖွဲ့ (ပအဖ)က သတင်းထုတ်ပြန်ပါတယ်။

ကြာအင်းဆိပ်ကြီးမြို့နယ်ခြေစိုက် ခလရ ၃၂၊ ခလရ ၂၈၃၊ ခလရ ၂၈၄ တပ်ရင်းတွေကို KNLA တပ်မဟာ ၆ နဲ့ တော်လှန်ရေးတပ်ပေါင်းစုတွေက ဇန်နဝါရီ ၄ ရက် မနက်က ဝင်ရောက်စီးနင်း တိုက်ခိုက်ခဲ့တာဖြစ်ပါတယ်။

ကြာအင်းဆိပ်ကြီးမြို့နယ် ပြည်သူ့အုပ်ချုပ်ရေးအဖွဲ့ (ပအဖ) က သတင်းထုတ်ပြန်ချက်မှာတော့ တိုက်ပွဲစတင်ဖြစ်ပွားတာနဲ့ တပြိုင်နက်တည်းမှာ စစ်ကောင်စီတပ်တွေဘက်က တိုက်လေယာဉ်တွေ၊ တိုက်ခိုက်ရေး ရဟတ်ယာဉ်တွေနဲ့ အကြိမ်ပေါင်းများစွာ အဆက်မပြတ် လာရောက်ပစ်ကူပေးခဲ့တာကြောင့် တော်လှန်ရေးတပ်ပေါင်းစုတွေဘက်က ခက်ခဲစွာနဲ့ ထိုးဖောက်ဝင်ရောက်ခဲ့ရတယ်လို့ ဆိုပါတယ်။

“လေယာဉ်သာ တကြိမ်နှစ်ကြိမ်လောက်ပဲ လာနိုင်မယ်ဆို ကျနော်တို့တွေ တပ်ရင်း သုံးရင်းလုံးကို မီးသင်္ဂြိုဟ်ပေးနိုင်ပါတယ်။ အခုက ပစ်ပုံ ပုံထားပေးနိုင်ရုံပဲ ရှိတာပေါ့ဗျာ” လို့ တိုက်ပွဲမှာ ပါဝင်ခဲ့တဲ့ နဂါးနီ PDF ရဲဘော်တွေက ပြောပါတယ်။

စစ်ကောင်စီဘက်က သေဆုံးထိခိုက်မှု အခြေအနေ အသေးစိတ်ကိုတော့ မသိရသေးပေမဲ့ ခလရ ၃၂ နဲ့ ခလရ ၂၈၄ တပ်ရင်းတွေမှာ ဖြစ်ပွားတဲ့ တိုက်ပွဲတွေမှာတော့ စစ်ကောင်စီတပ်က သေဆုံးထိခိုက်များတယ်လို့ သိရပြီး တပ်ရင်း ၂ ရင်းပေါင်း စစ်ကောင်စီတပ်ဘက်က အယောက် ၂၀၀ လောက် သေဆုံးခဲ့ကာ ခလရ ၃၂ က ဘားတိုက်တချို့ကို မီးရှို့နိုင်ခဲ့တယ်လို့ တိုက်ပွဲဝင် တော်လှန်ရေးရဲဘော်တွေရဲ့ ပြောကြားချက်ကို ကိုးကားပြီး ကြာအင်းဆိပ်ကြီးမြို့နယ် ပြည်သူ့အုပ်ချုပ်ရေးအဖွဲ့ (ပအဖ) က ဆိုပါတယ်။

ဒါ့အပြင် ခလရ ၂၈၄ တပ်မှာတော့ အရာရှိနေအိမ်တွေကို ဖျက်ဆီးတာ၊ ကားတစီး မီးရှို့တာတွေကို လုပ်ဆောင်နိုင်ခဲ့ပြီး တပ်ရင်းမှူးဇနီးကို ဖမ်းဆီးရရှိခဲ့ပေမဲ့ ပြန်အဝိုင်းခံရပြီး လေယာဉ်နဲ့ ဗုံးကြဲတိုက်ခိုက်ခံရတာမို့ ဝပ်နေချိန်မှာ ရုတ်တရက် ပြန်လွတ်သွားခဲ့တယ်လို့ PDF ရဲဘော်တွေရဲ့ ပြောကြားချက်အရ သိရပါတယ်။

ဒီတိုက်ပွဲတွေအတွင်း တော်လှန်ရေးအင်အားစုတွေဘက်က CDM စစ်သား သူရဲကောင်း ရဲဘော် ရဲနိုင်သွေး အပါအဝင် ၄ ယောက် ကျဆုံးခဲ့ပြီး ဒီသတင်းတွေကိုတော့ သက်ဆိုင်ရာ စစ်ရေးတာဝန်ရှိသူတွေဘက်က ထုတ်ပြန်ပေးမှသာ အတည်ဖြစ်ကြောင်းကိုလည်း ကြာအင်းဆိပ်ကြီးမြို့နယ် ပြည်သူ့အုပ်ချုပ်ရေးအဖွဲ့က မေတ္တာရပ်ခံ အသိပေးထားပါတယ်။

မြန်မာ့နွေဦးတော်လှန်ရေးမှာ တိုက်ပွဲဝင်ရင်း တိုင်းပြည်အတွက် အသက်ပေးသွားတဲ့ CDM လက်ထောက်ဘူမိဗေဒအရာရှိ ဦးသန်းဦးအတွက် ဝမ်းနည်းကြောင်း   အမျိုးသားညီညွတ်ရေးအစိုးရ (NUG)၊ သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနက ထုတ်ပြန်ထားပါတယ်။

ကရင်အမျိုးသားအစည်းအရုံး (ကေအန်ယူ) တပ်မဟာ ၆ ဒူးပလာယာခရိုင်ရုံးကို စစ်ကောင်စီတပ်က ရဟတ်ယာဉ် ၂ စင်းနဲ့ ဇန်နဝါရီ ၅ ရက် ဒီနေ့မနက် ၁၁ နာရီက လာရောက်ပစ်ခတ် တိုက်ခိုက်ခဲ့တယ်လို့ ကေအန်ယူ ဒူးပလာယာခရိုင် အတွင်းရေးမှူး ပဒိုစောလစ်စတန်က ဒီဗွီဘီကို ပြောပါတယ်။

ကြာအင်းဆိပ်ကြီးမြို့ရှိ နယ်မြေခံ အခြေချစစ်ဗျူဟာနဲ့ တပ်ရင်းဌာနချုပ်တွေနဲ့ ဖာပွန်မြို့နယ်ရှိ မဲဝိုင် တပ်မတော်ရှေ့တန်းလုံခြုံရေးစခန်းတို့ကို KNLA တပ်မဟာ ၆ နဲ့ PDF ပူးပေါင်းတပ်တွေက မနေ့မနက်က တိုက်ခိုက်ခဲ့လို့ အရာရှိ၊ စစ်သည်တချို့ ထိခိုက်ဒဏ်ရာ ရရှိခဲ့တယ်လို့ စစ်ကောင်စီဘက်ကလည်း သတင်းထုတ်ပြန်ပါတယ်။

အလစ်အငိုက် တိုက်ခိုက်ခဲ့ပေမဲ့ သတင်းကြိုရလို့ အရာရှိ၊ စစ်သည်၊ ရဲမေ၊ မှီခိုသူတွေက ကြံ့ကြံ့ခံ ပြန်လည်ပစ်ခတ်တိုက်ခိုက်ခဲ့လို့ အရေးကြီး အဓိကအဆောက်အဦတွေ၊ အုပ်ချုပ်မှုဆိုင်ရာ အဆောက်အဦနဲ့ လူနေအဆောက်အဦတွေအနီး ဝင်ရောက်နိုင်ခဲ့ခြင်းမရှိဘဲ တပ်ခြံစည်းရုံးနား လူနေထိုင်ခြင်းမရှိတဲ့ စွန့်လွှတ်အဆောက်အဦတချို့ကိုသာ မီးရှို့ဖျက်ဆီးခဲ့ကြောင်း၊ တိုက်ခိုက်သူတွေ အကျအဆုံးများလို့ ဖရိုဖရဲ ဆုတ်ခွာ ထွက်ပြေးသွားခဲ့တယ်လို့လည်း စစ်ကောင်စီက သတင်းထုတ်ထားပါတယ်။

ပြည်သူ့ခုခံတွန်းလှန်စစ် ၁ နှစ်တာ ကာလအတွင်း စစ်ကောင်စီတပ်သား ၁၅,၀၀၀ နီးပါး သေဆုံးခဲ့ပြီး ထိခိုက်ဒဏ်ရာရသူ အယောက် ၄,၈၀၀ ကျော်ထိ ရှိခဲ့တယ်လို့ NUG အစိုးရ ကာကွယ်ရေးဝန်ကြီးဌာနက ထုတ်ပြန်ထားပါတယ်။

ပြည်ထောင်စုလွှတ်တော်ကိုယ်စားပြုကော်မတီ (CRPH) နဲ့ အမျိုးသားညီညွတ်ရေးအစိုးရ (NUG) ပြည်ထဲရေးနှင့် လူဝင်မှုကြီးကြပ်‌ရေးဦးစီးဌာနမှ ထုတ်ပြန်တဲ့ ပြည်သူ့အုပ်ချုပ်ရေးအဖွဲ့အဖြစ် ဖွဲ့စည်းခြင်းဆိုင်ရာ ထုတ်ပြန်ချက်တွေနဲ့ ပတ်သက်ပြီး ကန့်ကွက်ကြောင်း ကရင်နီပြည်အစိုးရ ဒီကနေ့မှာ ထုတ်ပြန်ပါတယ်။

ကရင်နီ(ကယား)ပြည်နယ် ဒီးမော့ဆိုမြို့နယ် ပြည်သူ့အုပ်ချုပ်ရေးအဖွဲ့အနေနဲ့ ကြားကာလ ရပ်ကွက်/ကျေးရွာအုပ်စု ပြည်သူ့အုပ်ချုပ်ရေးအဖွဲ့တွေ  ဖွဲ့စည်းဖို့ ပြည်ထောင်စုလွှတ်တော်ကိုယ်စားပြုကော်မတီက  ဧပြီ ၁၄ ရက်က ထုတ်ပြန်ခဲ့ပါတယ်။

အလားတူ NUG ပြည်ထဲရေးနှင့်လူဝင်မှုကြီးကြပ်ရေးဌာနကလည်း ဧပြီ ၂၄ ရက် ရက်စွဲနဲ့ အထွေထွေအုပ်ချုပ်ရေးဦးစီးဌာန၊ CDM  ဝန်ထမ်းများ အုပ်ချုပ်မှုကော်မတီကို ပြည်သူ့အုပ်ချုပ်ရေးဦးစီးဌာနအဖြစ် ပြောင်းလဲဖွဲ့စည်းဖို့ ကြေညာလိုက်တာကို  ကန့်ကွက်ကြောင်း ကရင်နီပြည်အစိုးရက ဒီကနေ့ ထုတ်ပြန်လာတာ ဖြစ်ပါတယ်။

ဒီလို ပြည်သူ့အုပ်ချုပ်ရေးအဖွဲ့ ဖွဲ့စည်းလိုက်တာဟာ ဖယ်ဒယ်ပြည်ထောင်စု တည်ဆောက်ဖို့ ပြည်သူ့ညီလာခံက အတည်ပြုထားတဲ့ ဖယ်ဒရယ်ဒီမိုကစီပဋိညာဉ်နဲ့ ဆန့်ကျင်နေတာကြောင့် ကန့်ကွက်တာလို့ ကရင်နီအမျိုးသားတိုးတက်ရေးပါတီ (KNPP) အတွင်းရေးမှူး ၂ ဦးအောင်ဆန်းမြင့်က ပြောပါတယ်။

“ကျနော်တို့ ဖယ်ဒရယ် ဒီမိုကရေစီပဋိညာဉ်မှာ ကြားကာလ ပြည်နယ်တွေရဲ့ ဥပဒေပြုရေး၊ တရားစီရင်ရေးကို ပြည်နယ်တွေက လိုအပ်သလို ဖွဲ့စည်းတည်ဆောက်သွားမယ်ဆိုတာ သူက အတိအလင်း ပြောထားပြီးသားဖြစ်တယ်။ ဆိုတော့ ဒီနေ့က အုပ်ချုပ်ရေးအဖွဲ့တွေပေါ့နော် CRPH ကနေသော်လည်းကောင်း၊ NUG ကသော်လည်းကောင်း အုပ်ချုပ်ရေးအဖွဲ့တွေ ဖွဲ့စည်းတာရှိတယ်။ ဒါ့အပြင်ကို ကျနော်တို့ ပညာရေး၊ ကျန်းမာရေး အစုံပဲ အများကြီးရှိတယ်၊ ဟိုကနေ တိုက်ရိုက်လာဖွဲ့စည်းတာတွေပေါ့လေ။ ရှိတော့ တကယ်လို့ ဖွဲ့စည်းမယ်၊ ဒီလို ပြည်နယ်နဲ့ ပူးပေါင်းဆောင်ရွက်မယ်ဆိုလို့ရှိရင် ကျေကျေလည်လည် ညှိနှိုင်းဆောင်ရွက်မှုတွေ လုပ်သင့်တာပေါ့။ အခုဟာက ပြည်နယ်ထဲမှာ တစုံတရာ ညှိနှိုင်းဆောင်ရွက်မှုတွေ မလုပ်တဲ့အခါကျတော့ ပြဿနာတွေရှိလာတောပေါ့။ အဲဒါပဲ။”

CRPH နဲ့ NUG အစိုးရက ဒီလို အုပ်ချုပ်ရေးပိုင်းမှာ တိုက်ရိုက် အကောင်အထည်ဖော် လုပ်ဆောင်မှုတွေဟာ အမျိုးသားညီညွတ်ရေးအတိုင်ပင်ခံကောင်စီ (NUCC)ကနေ ရေးဆွဲပြီး ပြည်သူ့ညီလာခံမှာ အတည်ပြုထားတဲ့ ဖယ်ဒရယ် ဒီမိုကရေစီပဋိညာဉ်အစိတ်အပိုင်း ၂၊ အခန်း ၈ ပါ ပုဒ်မ ၅၂ ၊ ၅၃ အရ ကြားကာလ ပြည်နယ်/ ဖယ်ဒရယ် ယူနစ်တွေရဲ့ အုပ်ချုပ်ရေး၊ ဥပဒေပြုရေး၊ တရားစီရင်ရေးကဏ္ဍမှာ ဖော်ပြထားတဲ့ လုပ်ပိုင်ခွင့်တဲ့ ဆန့်ကျင်နေကြောင်းလည်း ထုတ်ပြန်ထား ပါတယ်။

ဒါ့အပြင် အမျိုးသားညီညွတ်ရေး အတိုင်ပင်ခံကောင်စီ (NUCC) မှာ ပါဝင်တဲ့ အဖွဲ့အစည်းတိုင်းဟာ Chapter အတိုင်း လိုက်နာကျင့်သုံးပါမယ်လို့  ကတိကဝတ်ပြုထားတဲ့အတိုင်း ဆောင်ရွက်ဖို့လည်း တိုက်တွန်းထားပါတယ်။

ဒါကြောင့် ကရင်နီပြည်နယ်အတွင်း အရင်က ဖွဲ့စည်းတည်ဆောက်ထားတဲ့ တိုင်းရင်းသား တော်လှန်ရေးအဖွဲ့အစည်းနဲ့သော်လည်းကောင်း၊ ကရင်နီပြည်နယ် အတိုင်ပင်ခံကောင်စီနဲ့သော် လည်းကောင်း တစုံတရာ ကျေလည်မှုရှိအောင် ညှိနှိုင်းဆောင်ရွက်ခြင်းမပြုဘဲ ဖွဲ့စည်းတည်ဆောက်ထားတဲ့ ဘယ်အုပ်ချုပ်ရေးအဖွဲ့ကိုမဆို လက်ခံမှာ မဟုတ်ကြောင်းနဲ့ သက်ဆိုင်ရာကနေ အမြန်ဆုံး ပြန်လည်ရုပ်သိမ်းဖို့လည်း ကရင်နီပြည်အစိုးရ၊ ပြည်ထဲရေးဝန်ကြီးက အသိပေးထုတ်ပြန်ကြေညာထားပါတယ်။ကရင်နီပြည်နယ် အတိုင်ပင်ခံကောင်စီအပါအဝင် သက်ဆိုင်ရာအဖွဲ့အစည်းတွေနဲ့ ဘာကြောင့် ညှိနှိုင်းဆောင်ရွက်တာမရှိဘဲ အခုလို ပြည်သူ့အုပ်ချုပ်ရေးအဖွဲ့တွေဖွဲ့စည်းဖို့ လုပ်ဆောင်တာလဲ ဆိုတာကိုတော့ ပြည်ထောင်စုလွှတ်တော်ကိုယ်စားပြုကော်မတီ (CRPH) နဲ့ အမျိုးသားညီညွတ်ရေးအစိုးရ (NUG) ဘက်က ရှင်းလင်းထုတ်ပြန်တာ မရှိသေးပါဘူး။