စစ်ကောင်စီရဲ့ တက္ကသိုလ်ဝင်စာမေးပွဲကျင်းပပြီးတဲ့နောက် ရန်ကုန်မြို့မှာ လျှပ်စစ်မီးပြတ်တောက်ချိန် ပိုတိုးလာနေတယ်လို့ မြို့ခံက ပြောပါတယ်။

တက္ကသိုလ်ဝင်စာမေးပွဲဘာသာတွဲတွေမနေ့က ဖြေဆိုပြီးတဲ့နောက် မြို့နယ်တချို့မှာ တညလုံးမီးပျက်ခဲ့သလို ဒီနေ့မှာလည်း မကြာခဏ မီးပြတ်တာခဲ့တယ်လို့ ဆိုပါတယ်။

သင်္ဃန်းကျွန်းမြို့နယ်မှာ နေထိုင်သူတဦးက "ညက ၆ နာရီကျော်က ပျက်တာ မနက် ၈ နာရီလောက်မှပြန်လာတယ်။ ဘယ်လောက်မှမကြာဘူး ပြန်ပျက်သွားတယ်။ လာလိုက်ပျက်လိုက်နဲ့ ဘာမှလုပ်မရဘူး" လို့ ပြောပါတယ်။

ဒဂုံမြို့သစ်(အရှေ့ပိုင်း)မြို့နယ်မှာ နေထိုင်သူတဦးကလည်း စာမေးပွဲရက်မှာလည်း မီးမမှန်သလို အခုဆိုရင် တရက်မီးလာချိန်က လေးနာရီလောက်ပဲရှိတော့တယ်လို့ ဆိုပါတယ်။

တက္ကသိုလ်ဝင်စာမေးပွဲတွေ ဖြေဆိုချိန်မှာ လျှပ်စစ်မီး အပိုင်းလိုက် ၄ နာရီလာ၊ ၄ နာရီပျက်နဲ့ ညဘက်ပုံမှန်မီးပေးတဲ့စနစ် အကောင်အထည်ဖော်ခဲ့တာဖြစ်ပါတယ်။

အဲဒီလိုစာမေးပွဲကာလမှာ လျှပ်စစ် မီးပေးနိုင်ဖို့အတွက် လုပ်ငန်းသုံးနဲ့ စက်မှုလက်မှုလုပ်ငန်းတွေအနေနဲ့ ညနေ ၅ နာရီမှ ည ၁၀ နာရီအထိ ဌာနက ဖြန့်ဖြူးတဲ့လျှပ်စစ်အားကို မသုံးဖို့၊ သုံးစွဲတာတွေ့ရင် အုပ်ချုပ်မူနည်းလမ်းအရ အရေးယူမယ်ဆိုပြီး ကန့်သတ်သတိပေးတာတွေ လုပ်ခဲ့ပါတယ်။

အခုလို လျှပ်စစ်မီး မကြာခဏပြတ်တောက်လာတာကြောင့် လျှပ်စစ်အားအသုံးပြုလုပ်ငန်းတွေ ထိခိုက်ဆုံးရူံးမှုတွေ နဲ့ လူမှုဘဝအဆင်မပြေမှုတွေ ရှိနေကာ ဝေဖန်မူတွေလည်း ထွက်ပေါ်နေပါတယ်။

ရုရှားက ယူကရိန်းရဲ့ အခြေခံအဆောက်အအုံတွေကို ပြီးခဲ့တဲ့ ဆောင်းဦးရာသီအတွင်း ပစ်မှတ်ထား တိုက်ခိုက်ခဲ့ပြီးနောက် ယူကရိန်းနိုင်ငံ ကိဗ်မြို့မှာ မှောင်မိုက်အေးခဲတဲ့ ဆောင်းရာသီကို အန်တုနေရပါတယ်။

လျှပ်စစ်၊ ရေနဲ့ အပူပေးစနစ်တွေ ကာလအပိုင်းအခြားအလိုက် ပြတ်လတ်မှုရှိနေပေမဲ့ ကိဗ်မြို့ခံတွေဟာ ပုံမှန်လူနေမှုဘဝအတိုင်း နေထိုင်နိုင်ဖို့၊ အလုပ်သွားနိုင်ဖို့၊ ကော်ဖီဆိုင် လည်ပတ်ဖို့ အပါအဝင် အများပြည်သူနေရာမှာ ကခုန်တာ စတဲ့ ပုံစံမျိုးစုံနဲ့အတူ ကြိုးစားနေထိုင်နေကြတာပါ။

ဒီဇင်ဘာ ၁ ရက်နေ့က ကိဗ်မြို့တော်ဝန် Vitaliy Klitschko ဟာ ရုရှားရဲ့ လေကြောင်းတိုက်ခိုက်မှုကြောင့် အလုံးစုံအမှောင်ကျသွားနိုင်တဲ့ အခြေအနေအတွက် ရေ၊ အစားအစာနဲ့ နွေးထွေးတဲ့ အဝတ်အထည်တွေ စုဆောင်းထားဖို့၊ ဖြစ်နိုင်ရင် ယူကရိန်းမြို့တော်ရဲ့ ဆင်ခြေဖုံးနေရာတွေမှာ သူငယ်ချင်းတွေနဲ့အတူ စုပေါင်းနေထိုင်ဖို့ စဉ်းစားထားသင့်တယ်လို့ ပြောပါတယ်။

အခြေခံအဆောက်အအုံတွေကို ဖျက်ဆီး တိုက်ခိုက်ခံရတဲ့အခါ အလုံးစုံအမှောင်ကျပြီး လျှပ်စစ်မီး၊ ရေပေးဝေမှု၊ ရေနုတ်မြောင်းနဲ့ အပူပေးစနစ်တို့ လုံးဝပြတ်တောက်သွားနိုင်တာကြောင့် အပူချိန် တဟုန်ထိုး ကျဆင်းသွားတာမျိုးတွေလည်း ကြုံရနိုင်တယ်လို့ ကိဗ်မြို့တော်ဝန် က သတိပေးထားပါတယ်။