မကွေးတိုင်း၊ ပွင့်ဖြူမြို့နယ် မဲဇလီရဲစခန်းကို ဒီဇင်ဘာ ၃၁ ရက်က ရှော့တိုက်ဒုံးနဲ့ တိုက်ခိုက်ခဲ့လို့ စစ်ကောင်စီဘက်က ၄ ယောက် ဒဏ်ရာရရှိခဲ့တယ်လို့ ပွင့်ဖြူ ပ.က.ဖက ဇန်နဝါရီ ၂ ရက် ညနေပိုင်းမှာ ထုတ်ပြန်ပါတယ်။
ပွင့်ဖြူမြို့နယ် မဲဇလီရဲစခန်းကို ဒီဇင်ဘာ ၃၁ ရက် ည ၉ နာရီလောက်မှာ ရှော့တိုက်ဒုံး ၄ လုံးနဲ့ ပစ်ခတ်တိုက်ခိုက်ရာ ၃ လုံး Error ဖြစ်ပြီး တလုံးပေါက်ကွဲခဲ့တာကြောင့် ရဲ ၂ ယောက်၊ စစ်သား ၁ ယောက်နဲ့ စစ်ကောင်စီသတင်းပေး ၁ ယောက် ဒဏ်ရာရခဲ့တယ်လို့ ပွင့်ဖြူ ပ.က.ဖ တာဝန်ခံ ရာဇာကြီးက ဒီဗွီဘီကို ပြောပါတယ်။
အဲဒီတိုက်ခိုက်မှုဟာ မဲဇလီကြိုးတံတားပေါ်မှာ မြင့်မြတ်စွာ ကျဆုံးခဲ့တဲ့ သရက်-ကံမ ပြည်သူ့ကာကွယ်ရေးရဲဘော်တွေအတွက် လက်စားချေတာဖြစ်သလို နှစ်သစ်ကူး အထိမ်းအမှတ်အနေနဲ့ တိုက်ခိုက်ခဲ့တာလို့ ဆိုပါတယ်။
ပွင့်ဖြူ ပ.က.ဖ အနေနဲ့ နောက်နောင်မှာ ပြည်သူလူထုကို ဒုက္ခရောက်အောင် လျှပ်စစ်မီတာတွေကို ဖြုတ်ယူတာတွေ၊ မီတာဘေတွေကို ဖိအားပေးပြီး အတင်းအကျပ် ဆောင်ခိုင်းတာတွေ ပြုလုပ်ကာ စစ်ကောင်စီကို အားပေးအားမြှောက်လုပ်နေတဲ့ လျှပ်စစ်မန်နေဂျာနဲ့ လျှပ်စစ်ရုံးကိုလည်း တိုက်ခိုက်သွားမယ်လို့ ရာဇာကြီးက ပြောပါတယ်။
ပွင့်ဖြူ ပ.က.ဖ ရဲဘော်တွေ အထိအခိုက် အကျအဆုံးမရှိဘဲ ဆုတ်ခွာနိုင်ခဲ့ပြီး ရဲဘော်တွေ လုံခြုံတဲ့နေရာရောက်အောင် စောင့်နေရတာကြောင့် သတင်းထုတ်ပြန်တာ နောက်ကျခဲ့ရတယ်လို့ ဆိုပါတယ်။
အဲဲဒီတိုက်ပွဲနဲ့ ပတ်သက်လို့တော့ စစ်ကောင်စီဘက်က ထိခိုက်ဒဏ်ရာရတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
မကွေးတိုင်း၊ ပွင့်ဖြူမြို့နယ် သရက်ကုန်းကျေးရွာက ရပ်ကျေး NLD ပါတီဝင် ဦးဝင်းဌေးကို ဒီဇင်ဘာ ၄ ရက်နေ့ ည ၈ နာရီလောက်မှာ အမည်မသိလူတစုက ဖမ်းဆီးပြီး လည်လှီးသတ်ဖြတ်ခဲ့တယ်လို့ NLD ပါတီဝင် တယောက်က ဒီဗွီဘီကိုပြောပါ။
သူက ပွင့်ဖြူမြို့နယ် NLD ပါတီဝင် ရပ်ကျေး အဖွဲ့ဝင်တယောက်ဖြစ်သလို NLD အစိုးရလက်ထက်က သရက်ကုန်းကျေးရွာ အုပ်ချုပ်ရေးမှူးအဖြစ် တာဝန်ထမ်းဆောင်ခဲ့ပြီး အပျော်တန်းဓာတ်ပုံဆရာနဲ့ ယာဥ်မောင်း အလုပ်လုပ်ကိုင်သူတယောက်ဖြစ်တယ်လို့ ဆိုပါတယ်။
ဦးဝင်းဌေးဟာ မကွေးမြို့ကနေ ကားနဲ့ ပြန်လာတဲ့ဘအချိန်မှာ လက်နက်ကိုင်ဆောင်ထားတဲ့ လူတစုက သစ်ချိုကုန်းရွာအဝင်မှာ သေနတ်နဲ့ချိန် ဖမ်းဆီးသွားတာဖြစ်ပြီး စစ်ကောင်စီက ဖမ်းဆီးတယ်ထင်လို့ ရဲစခန်းကို လိုက်လံစုံစမ်းပေမဲ့ စခန်းမှာမရှိဘူးလို့ ပြောတာကြောင့် လိုက်လံရှာဖွေခဲ့တာလို့ ပြောပါတယ်။
မိသားစုဝင်တွေနဲ့ မိတ်ဆွေအပေါင်းသင်းတွေက ဝိုင်းဝန်းရှာဖွေရာ ဒီဇင်ဘာ ၅ ရက်နေ့ မနက် ၉ နာရီလောက်က ကျောင်းကုန်းကြီးကျေးရွာ မြောက်ဘက်က တောထဲမှာ လည်လှီးဒဏ်ရာနဲ့ သေဆုံးနေတဲ့ ဦးဝင်းဌေးရဲ့ အလောင်းကို တွေ့ရှိခဲ့ရပြီး ကျောင်းကုန်းကြီးရွာက ပျူစောထီးတွေလက်ချက် ဖြစ်နိုင်တယ်လို့ ဒေသခံတွေက ပြောပါတယ်။
“စစ်အာဏာသိမ်းပြီးကတည်းက ပြည်သူတွေရဲ့ အသက်အိုးအိမ်စည်းစိမ် လုံခြုံမှုမရှိဘူး၊ တယောက်နဲ့ တယောက် တဖက်နဲ့တဖက် လူသားမဆန်စွာ သတ်ဖြတ်နေတာတွေကို ရှုတ်ချပါတယ်” လို့ ဒေသခံတဦးက ပြောပါတယ်။
ပွင့်ဖြူမြို့နယ် ကျောင်းကုန်းကြီးရွာမှာ ၂၀၂၁ ခုနှစ် မတ် ၆ ရက်နေ့ကလည်း NLD ပါတီအလုပ်အမှုဆောင် ဦးထွေးနိုင်နဲ့ ပါတီဝင်ကို နန်းဝေတို့ ၂ ယောက်ကို စစ်တပ်ထောက်ခံသူ အယောက် ၃၀ လောက်က ဝိုင်းဝန်းသတ်ဖြတ်ခဲ့ပြီး ဒီနေ့အထိ အရေးယူမှုမရှိဘူးလို့ ဒေသခံတွေက ပြောပါတယ်။
