တောင်ကိုရီးယား တေးရေးနဲ့ အဆိုတော်တဦးဖြစ်တဲ့ အဲရစ်နမ်ရဲ့ စကတ်ဝတ်ဆင်တဲ့ ဖက်ရှင်ဟာ သူ့ရဲ့ ပရိသတ်တွေအကြား ရေပန်းစားနေပြီး ကျား/မ မခွဲခြားကြောင်း သူ့ရဲ့ ဖက်ရှင်ကျနစွာ ဝတ်စားဆင်ယင်မှုနဲ့ သက်သေပြခဲ့ပါတယ်။

ဖေဖော်ဝါရီ ၁၄ ရက်က ပြုလုပ်ခဲ့တဲ့ 2023 New York Fashion Week ရဲ့ လေးရက်မြောက်နေ့ကို အမေရိကန် ဖက်ရှင်ဒီဇိုင်နာ သွမ်ဘရောင်းက တောင်ကိုရီးယား တေးရေးနဲ့ အဆိုတော် အဲရစ်နမ်ကို  ပွဲတက်ဖို့ ဖိတ်ခေါ်ခဲ့တာဖြစ်ပြီး အဲဒီပွဲမှာ အဲရစ်နမ်တယောက် စကတ်ဝတ်ဆင်ပြီး တတ်ရောက်ခဲ့တာကို တွေ့မြင်ခဲ့ကြတာပါ။

လူအများဆုံး အာရုံစူးစိုက်မှုရရှိခဲ့တဲ့ အဲရစ်နမ်ဟာ အဖြူရောင်ရှပ်လက်ရှည်ကို ကာဒီဂန်နဲ့ တွဲဖက်ဝတ်ဆင်ထားပြီး အပေါ်ကနေ ဂျာကင်တထည်ကို သပ်ရပ်စွာ ဝတ်ဆင်ထားရုံမကဘဲ အမျိုးသားဝတ် ဘောင်းဘီအစား စကတ်ကို ဝတ်ဆင်ခဲ့တာကြောင့် ဒီဖက်ရှင်ပွဲတော်မှာ သူ့ရဲ့ စကတ်ဖက်ရှင်နဲ့ အားလုံးဆီက အာရုံကို ဖမ်းစားနိုင်ခဲ့ပါတယ်။

တောင်ကိုရီးယား တေးရေးနဲ့ အဆိုတော် အဲရစ်နမ်ဟာ စကတ်ဝတ်ဆင်ထားတဲ့ သူ့ရဲ့ ဓာတ်ပုံတချို့ကို သူ့ရဲ့ ကိုယ်ပိုင် အင်စတာဂရမ်အကောင့်မှာ တင်ခဲ့ပြီး “စကတ်ခေတ် စတင်နေပြီ” လို့လည်း ရေးခဲ့ပါတယ်။

2023 New York Fashion Week မှာ အဲရစ်နမ်ရဲ့ ရဲရင့်ပြီး ယုံကြည်ချက်ရှိတဲ့ ဝတ်စုံရွေးချယ်မှုဟာ ဖက်ရှင်လောကမှာ ဂျန်ဒါအားလုံး ပါဝင်နိုင်မှုနဲ့ ကျားမ ကွဲပြားမှုတွေအတွက် ထိရောက်တဲ့ ပြယုဂ်တခု ဖြစ်ခဲ့ပါတယ်။

ဖက်ရှင်ဟာ လူမှုစံနှုန်းတွေကို စိန်ခေါ်ဖို့အပြင် မိမိကိုယ်ကို မြှင့်တင်ဖို့အတွက်ပါ အစွမ်းထက်တဲ့ ကဏ္ဍတခု ဖြစ်တဲ့အတွက် အဲရစ်နမ်ဟာ ပရိသတ်များစွာရဲ့ ချီးကျူးမှုကို ခံယူခဲ့ရသလို သတင်းခေါင်းကြီးပိုင်းတွေမှာလည်း ဖော်ပြခံခဲ့ရပါတယ်။

အဲဒီပွဲမှာ တောင်ကိုရီးယား လူငယ်အဆိုတော်အဖွဲ့ NCT က အဖွဲ့ဝင် ဂျွန်နီကိုလည်း ပွဲတက်ဖို့ ဖိတ်ခေါ်ခံခဲ့ရပြီး တောင်ကိုရီးယား အနုပညာရှင်နှစ်ဦးစလုံးဟာ ဒီဇိုင်နာ သွမ်ဘရောင်းရဲ့ ဒီဇိုင်းတွေနဲ့ လူအများရဲ့ အာရုံစိုက်မှု ရယူနိုင်ခဲ့ပြီး အဆိုပါဖက်ရှင်ပွဲတော်ကို Lil Nas X၊ Queen Latifah၊ Pusha T၊ ICE SPICE နဲ့ တခြားနာမည်ကျော်တွေလည်း ပါဝင်တက်ရောက်ခဲ့ပါတယ်။

တိုင်ပေဖက်ရှင်ရက်သတ္တပတ်မှာ မြန်မာလူငယ်ကျောင်းသားတယောက်ရဲ့ “Spring Revolution” အမည်နဲ့ ဖန်တီးမှုလက်ရာတွေကို ပြသခွင့်ရခဲ့ပါတယ်။

ဖန်တီးရှင်လူငယ် ဒီဇိုင်နာ Philip Shun က “ဒီ collection ကတော့ အရေးတော်ပုံမှာ ရဲရင့်စွာ လှုပ်ရှားကြသော မြန်မာပြည်သူအားလုံးကို နွေဦးပန်းလို့ တင်စားပြီး ပုံဖော်ထားခြင်း ဖြစ်ပါတယ်။ မြန်မာပြည်ဖွားတယောက်အနေနဲ့ ကျနော့်ဘက်က လုပ်ပေးနိုင်တာဆိုလို့ အခုလို ဝတ်စုံ ၆ ထည်နဲ့ ဂုဏ်ပြုမှတ်တမ်းတင်တာကလွဲလို့ တခြားထွေထွေထူးထူး လုပ်ပေးနိုင်ခဲ့တာမရှိပါဘူး။ ဒါပေမဲ့ ကျနော့်ရဲ့စိတ်ကတော့ မြန်မာနိုင်ငံက ညီကိုမောင်နှမအားလုံးနဲ့ တသားတည်းပါပဲ”လို့ ပြောပါတယ်။

ဒီဝတ်စုံတွေကိုတော့ သူတယောက်တည်း အချိန် ၁ နှစ်လောက်ယူကာ ဖန်တီးခဲ့ရတာဖြစ်ပြီး စစ်အာဏာသိမ်းကာလ နွေဦးတော်လှန်ရေးအခင်းအကျင်းတွေ၊ အရောင်တွေနဲ့အတူ ပုံဖော်ထားခဲ့ တာကို တွေ့ရပါတယ်။ The eternity, The heroism, The envoy, The purity, The justice နဲ့ The peacock လို့ အမည်ပေးထားတဲ့ ဝတ်စုံ ၆ စုံစလုံးမှာတော့ နွေဦးတော်လှန်ရေးရဲ့ အငွေ့အသက်တွေနဲ့ အသက်ဝင်နေခဲ့တာ ဖြစ်ပါတယ်။

“နွေဦးကာလမှာ ဝေဝေဆာဆာပွင့်လန်းလေ့ရှိကြတဲ့ ပန်းလေးတွေဟာ ဆောင်းဥတုဆိုးကြီးရဲ့ ပြင်းထန်လှတဲ့ အအေးဒဏ်ကို အန်တုနေကြရပေမယ့် လက်မလျှော့တဲ့ ဇွဲလုံ့လတွေနဲ့ တောင့်ခံ ရင်ဆိုင်နေကြပါတယ်။ ဒီ့ပြင် ဆောင်းရာသီဆိုးကြီးလည်း ရောက်ရှိနေပြီဖြစ်တာမို့ ပန်းလေးတွေ တောင့်တနေကြတဲ့ နွေဦးဟာလည်း မကြာခင် ကျရောက်လာတော့မှာ အသေအချာပဲ မဟုတ်ပါလား။”