မြန်မာနိုင်ငံမှာ မတရားအာဏာသိမ်းကာလ ၁၁ လအကြာ အကြမ်းဖက်စစ်တပ်ရဲ့ ပစ်ခတ် သတ်ဖြတ်မှုတွေကြောင့် အပြစ်မဲ့ကျဆုံးပြည်သူ ၁၃၉၃ ယောက်နဲ့ လက်ရှိအချိန်ထိ ဖမ်းဆီးခံထားရသူ ၁၁၂၉၆ ယောက် ရှိတယ်လို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက်မှ ၂၀၂၂ ခု ဇန်နဝါရီ ၁ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေးကာလအတွင်း ဒီနေ့အထိ ၈၃၄၄ ယောက် လက်ရှိချုပ်နှောင်ခံထားရဆဲဖြစ်ပြီး အဲဒီထဲက အယောက် ၅၀၀ ကတော့ ထောင်ဒဏ်ချမှတ်ခံထားရပါတယ်။

ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက်အပါအဝင် ၃၉ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။

ဖမ်းဝရမ်းထုတ်ခံထားရတာကြောင့် တိမ်းရှောင်နေသူ ၁၉၆၄ ဦးအနက် မျက်ကွယ် သေ ဒဏ်ချမှတ်ခြင်းခံထားရသူ ၃၉ ဦး အပါအဝင် ၁၁၈ ဦးမှာ မျက်ကွယ် ပြစ်ဒဏ်ချခံထားရပြီး သေဒဏ်ချမှတ်ခံထားရသူ စုစုပေါင်း ၇၈ ဦးရှိပြီဖြစ်ပါတယ်။

ဒီဇင်ဘာ ၃၀ ရက်နေ့က မန္တလေးတိုင်းလွှတ်တော်ဥက္ကဋ္ဌ ဦးအောင်ကျော်ဦးကို အကျဉ်းထောင်တွင်းတရားရုံးမှ အလုပ်ကြမ်းနဲ့ ထောင်ဒဏ် ငါးနှစ် ကျခံစေဖို့ အမိန့်ချမှတ်ခဲ့တယ်လို့ သိရပါတယ်။

ဦးအောင်ကျော်ဦးကို ရာဇသတ်ကြီးပုဒ်မ ၅၀၅(က) နဲ့ ထောင်ဒဏ် သုံးနှစ်၊ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ ပုဒ်မ ၂၅ နဲ့ ထောင်ဒဏ် ၂ နှစ်၊ စုစုပေါင်း ထောင်ဒဏ် ၅ နှစ် ပြစ်ဒဏ်ချမှတ်ခဲ့တာပါ။

ဒီဇင်ဘာလ ၂၈ ရက်နေ့ကလည်း ပြည်တက္ကသိုလ် ကျောင်းသားများသမဂ္ဂရဲ့ အလုပ်အမှုဆောင်အဖွဲ့ဝင် ကိုရန်နိုင်အောင်၊ ဖခင် ဦးဝင်းလှိုင်နဲ့ အစ်ကိုဖြစ်သူ ကိုရွှေဖြိုးအောင်တို့ကို ပြည်အကျဉ်းထောင်တွင်း တရားရုံးက ထောင်ဒဏ် ၂ နှစ်စီ ချမှတ်ခဲ့ကြောင်း သိရှိရပါတယ်။ 

ကိုရန်နိုင်အောင်ဟာ ပြည်တက္ကသိုလ် ရုက္ခဗေဒဌာနက တတိယနှစ်ကျောင်းသားဖြစ်ပြီး ကိုရွှေဖြိုးအောင်ကတော့ ပြည်တက္ကသိုလ်(အဝေးသင်) ဒသနိကဗေဒဌာနမှ တတိယနှစ်ကျောင်းသား ဖြစ်ပါတယ်။ ဖခင်ဖြစ်သူ ဦးဝင်းလှိုင်ကတော့ နိုင်ံရေးတက်ကြွလှုပ်ရှားသူတစ်ဦး ဖြစ်ပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေစတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရတာတွေနဲ့ ပတ်သက်လို့ နွေဦးတော် လှန်ရေးကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီ ကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီးအချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။

စစ်ကိုင်းတိုင်း၊ ဒီပဲယင်းမြို့နယ်၊ မူးခတွင်းကျေးရွာက အကြောင်းမဲ့ဖမ်းဆီးခံခဲ့ရတဲ့ ရွာသား ၇ ဦးကို စစ်တပ်ကပြန်လည်လွှတ်ပေးလိုက်ပြီလို့ ဒေသခံရွာသားတွေက ပြောပါတယ်။

အဆိုပါရွာသားတွေကို ဩဂုတ်လ ၈ ရက်နေ့က စစ်ကောင်စီ စစ်တပ်က ရွာကို စီးနင်းပြီးဖမ်းဆီးသွားခဲ့တာဖြစ်ပြီး ၁၄ နှစ်အရွယ် ကလေးတစ်ဦးလည်း ဖမ်းဆီးခံရတဲ့ အထဲပါသွားတာဖြစ်ပါတယ်။  

ဒေသခံရွာသားတစ်ဦးက “သူတို့ ဒီနေ့မနက်ပဲ ပြန်လွှတ်ပေးလိုက်တယ်ဗျ။ အသက် ၁၄ နှစ်လောက်ရှိတဲ့ ကလေး တစ်ယောက်အပါအဝင် အသက်အရွယ်စုံ ၇ ယောက်ပေါ့‌ဗျာ။ ကျနော်တို့ရွာကို စစ်တပ်ဝင်တုန်းက ဖမ်းသွားတာ။ စစ်တပ်ဝင်တဲ့အချိန်တုန်းကတော့ ဘယ်သူ့ပါတယ်၊ ဘယ်နှယောက်ဖမ်းတယ် ဆိုတာ အတိအကျမသိကြဘူးလေ၊ ပြေးကြရလွှားကြရတာဆိုတော့။ အခုမှပဲ ဘယ်သူ ဘယ်ဝါ တွေ ဖမ်းတယ်ဆိုတာသိရတာ။ သူတို့အားလုံး  ကျန်းမာရေးကတော့ ကောင်းပါတယ်”လို့ပြောပါတယ်။

ဒီပဲယင်းမြို့နယ်မှာ ၈ လေးလုံးနှစ်ပတ်လည်နေ့ကစပြီး ကျေးရွာ ၁၀ ရွာလောက်ကို  စစ်တပ်က စီးနင်းဝင်ရောက်ခဲ့တာဖြစ်ပြီး ဩဂုတ်လ ၂၁ ရက်နေ့မှာတော့ ဒီပဲယင်းအရှေ့ပိုင်းကျေးရွာတွေ အားလုံးကို မီးရှို့ဖျက်ဆီး ပစ္စည်းယူ ဒေသခံတွေကို ဖမ်းဆီးခဲ့တာဖြစ်ပါတယ်။