မနေ့ညက ယှဉ်ပြိုင်သွားတဲ့ ချန်ပီယံလိဂ်ရှုံးထွက် ဒုတိယအကျော့ပွဲစဉ်တွေမှာ ရီးရဲလ်မက်ဒရစ်နဲ့ နာပိုလီအသင်းတို့ နိုင်ပွဲကိုယ်စီနဲ့ နောက်တဆင့်ကို တက်ရောက်သွားပါတယ်။
နာမည်ကြီး ရီးရဲလ်မက်ဒရစ်က အိမ်ကွင်းမှာ လီဗာပူးကို တိုက်စစ်မှူး ဘန်ဇီမာ သွင်းတဲ့ဂိုးနဲ့ အနိုင်ရသွားတာပါ။
ရီးရဲလ်ဟာ နှစ်ပွဲပေါင်းရလဒ် ၆ ဂိုး ၂ ဂိုးနဲ့ ချန်ပီယံလိဂ် ကွာတားဖိုင်နယ်ကို တက်ရောက်သွားပါတယ်။
လီဗာပူးကတော့ ချန်ပီယံလိဂ်မှာ ၃ နှစ်ဆက်တိုက်ဆိုသလို ရီးရဲလ်မက်ဒရစ်နဲ့ဆုံတိုင်း ရှုံးပြီး ပြိုင်ပွဲကနေ ထွက်ခဲ့ရပါတယ်။
နောက်ပွဲစဉ်မှာ နာပိုလီက အိမ်ကွင်းမှာ ခြေစွမ်းပြကစားပြီး ဂျာမန်ကလပ် ဖရန့်ဖတ်အသင်းကို ၃ ဂိုးပြတ်နဲ့ အနိုင်ရသွားပါတယ်။
နာပိုလီအသင်းဟာ နှစ်ပွဲပေါင်း ရလဒ် ၅ ဂိုး ဂိုးမရှိနဲ့နိုင်ပြီး ချန်ပီယံလိဂ် ကွာတားဖိုင်နယ်ကို အသင်းရဲ့သက်တမ်းမှာ ပထမဆုံးအကြိမ် တက်ရောက်နိုင်ခဲ့ပါတယ်။
ဒီကနေ့မနက်ပိုင်းက ယှဉ်ပြိုင်သွားတဲ့ ယူရိုပါလိဂ် ဆီမီးဖိုင်နယ် ပွဲစဉ်တွေမှာ ရိန်းဂျားနဲ့ ဖရန့်ဖတ်အသင်းတို့ဟာ လိုက်ဇစ်နဲ့ ဝက်စ်ဟမ်းအသင်းတွေကို ကျော်ဖြတ်ပြီး ဗိုလ်လုပွဲ တက်ခဲ့ပါတယ်။
စကော့တလန်ကလပ် ရိန်းဂျားအသင်းဟာ နာမည်ကြီး လိုက်ဇစ်ကို ပထမအကျော့က ၁ ဂိုး ဂိုးမရှိနဲ့ ရှုံးနိမ့်ခဲ့ပေမဲ့ ဒုတိယအကျော့ အိမ်ကွင်းပွဲစဉ်မှာ ၃ ဂိုး ၁ ဂိုးနဲ့ အနိုင်ယူခဲ့ပါတယ်။ ဒါကြောင့် နှစ်ကျော့ပေါင်းရလဒ် ၃ ဂိုး ၂ ဂိုးနဲ့ ယူရိုပါလိဂ်ဗိုလ်ပွဲဆီ တက်လှမ်းနိုင်ခဲ့တာပါ။
ဂျာမန်ကလပ် ဖရန့်ဖတ်အသင်းဟာလည်း ဝက်စ်ဟမ်းအသင်းကို အိမ်ကွင်းမှာ ၁ ဂိုး ဂိုးမရှိနဲ့ အနိုင်ရခဲ့ပြီး နှစ်ကျော့ပေါင်းရလဒ် ၃ ဂိုး ၁ ဂိုးနဲ့ ဗိုလ်လုပွဲ တက်ခဲ့တာပါ။
ဗိုလ်လုပွဲစဉ်ကို လာမယ့် မေ ၁၉ ရက်မှာ စပိန်နိုင်ငံ ဆီဗီလာမြို့မှာ ကျင်းပသွားမှာ ဖြစ်ပါတယ်။
ယူရိုကွန်းဖရန့်လိဂ် ဆီမီးဖိုင်နယ်ပွဲစဉ်တွေမှာတော့ ဖီယင်နုက မာဆေးကို ဂိုးမရှိသရေ ကစားခဲ့ပြီး နှစ်ကျော့ပေါင်းရလဒ် ၃ ဂိုး ၂ ဂိုးနဲ့ ဗိုလ်လုပွဲတက်ခဲ့ပါတယ်။
အလားတူ ရိုးမားအသင်းကလည်း လက်စတာကို ၁ ဂိုး ဂိုးမရှိနဲ့ အနိုင်ရခဲ့ပြီး နှစ်ကျော့ပေါင်းရလဒ် ၂ ဂိုး ၁ ဂိုးနဲ့ ဗိုလ်လုပွဲတက်ခဲ့ပါတယ်။
ကွန်းဖရန့်လိဂ် ဗိုလ်လုပွဲကိုတော့ အယ်လ်ဘေးနီးယားနိုင်ငံမှာ မေ ၂၆ ရက်နေ့ ကျင်းပသွားမှာ ဖြစ်ပါတယ်။
