အမေရိကန်နိုင်ငံ၊ Jacksonville မြို့ Ramallah-American Club မှာ ဒါရိုက်တာ ကိုပေါက် ရိုက်ကူးထားတဲ့ “မသောက်မိသော မိုးခါးရေ” (The Road Not Taken) ရုပ်ရှင်ပြသခဲ့ရာ ရန်ပုံငွေ အမေရိကန်ဒေါ်လာ ၁၇,၀၀၀ ကျော် ရရှိခဲ့တယ်လို့ သိရပါတယ်။
“မသောက်မိသော မိုးခါးရေ” ရုပ်ရှင်ဇာတ်လမ်းတိုကို Jacksonville Myanmar Association အဖွဲ့က ဦးဆောင်ပြီး နိုဝင်ဘာ ၂၀ ရက် ညနေ ၅ နာရီကနေ ည ၈ နာရီအထိပြသရာ ရုံပြည့်ရုံလျှံ အားပေးခဲ့ကြပါတယ်။
ပန်ဆယ်လိုနဲ့ မြန်မာနိုင်ငံဆိုင်ရာ ကုလသမဂ္ဂ သံအမတ်ကြီး ဦးကျော်မိုးထွန်းတို့လည်း ဖလော်ရီဒါ မြန်မာမိသားစုနဲ့ Zoom မှတဆင့် နွေးထွေးစွာ တွေ့ထိဆွေးနွေးကြပါတယ်။
ရုပ်ရှင်ပြသမှုကို Jacksonville မြို့နဲ့ အနီးတဝိုက်မှာ နေထိုင်ကြတဲ့ မြန်မာပြည်ဖွား တိုင်းရင်းသားမိသားစုတွေနဲ့ အမေရိကန်မိတ်ဆွေမိသားစုတွေ လူဦးရေ ၂၀၀ ကျော် တခဲနက် တက်ရောက် အားပေးကြည့်ရှုခဲ့ကြပါတယ်။
ရုပ်ရှင်ပြပွဲမှာ ရန်ပုံငွေ တီရှပ်တွေအပြင် ရန်ပုံငွေ အစားသောက်စျေးရောင်းပွဲကိုပါ ပူးတွဲပြီး ရန်ပုံငွေ မြှင့်တင်နိုင်ခဲ့ပါတယ်။
ရရှိထားတဲ့ ရန်ပုံငွေအလှူငွေတွေကို မြန်မာနိုင်ငံအနှံ့ အရေးပေါ်လိုအပ်နေတဲ့ နေရာတွေကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန (MOD) ကတဆင့် ညှိနှိုင်းပြီး အမြန်ဆုံး ပေးအပ်လှူဒါန်းသွားမယ်လို့ သိရပါတယ်။
“မသောက်မိသော မိုးခါးရေ” ရုပ်ရှင်ဇာတ်လမ်းတိုကို ဒါရိုက်တာကိုပေါက်က တောတွင်းတနေရာမှာ ဖုန်းကင်မရာအသုံးပြုပြီး CDM စစ်ဗိုလ်တဦးရဲ့ ဖြစ်ရပ်မှန်ကို အခြေခံ ရိုက်ကူးထားတာ ဖြစ်ပါတယ်။
ဖလော်ရီဒါပြည်နယ်ကို ဝင်တိုက်ခဲ့တဲ့ ဟာရီကိန်းမုန်တိုင်း နီကိုးလ်ကြောင့် လူ ၄ ဦးထက်မနည်း သေဆုံးခဲ့ပြီး ကမ်းခြေဘေးက အိမ်တွေလည်း အတန်းလိုက်ကြီး တရွေ့ရွေ့ ယိမ်းခါ ကျန်ခဲ့ရပြီးတော့ ဖလော်ရီဒါရဲ့ အတ္တလန္တိတ်ကမ်းရိုးတန်းတလျှောက်ရှိ ဟိုတယ်တွေနဲ့ ကွန်ဒိုတွေ ပျက်စီးခဲ့ရပါတယ်။
ဗိုလူးရှားကောင်တီမှာ မုန်တိုင်းက အမျိုးအစား ၁ ဟာရီကိန်းအဖြစ် ကမ်းပေါ်ကို တိုက်ခတ်လာ ပြီးနောက် နာရီပိုင်းအကြာမှာ အဆောက်အအုံတွေဟာ မလုံခြုံတော့ဘူးလို့ ယူဆ လိုက်ပြီးနောက်မှာတော့ ကမ်းခြေရှိ ဟိုတယ်နဲ့ ကွန်ဒိုအခန်း ၂၄ ခုကို ဒေသခံအာဏာပိုင်တွေက ဘေးလွတ်ရာကို ရွှေ့ပြောင်းပေးခဲ့ပါတယ်။
နိုဝင်ဘာ ၁၁ ရက်က ဒါ့တိုင်ယာနာအပန်းဖြေကမ်းခြေမြို့ရဲ့ ဒရုန်းဗီဒီယိုမှာ ဆိုးဆိုးရွားရွား ပျက်စီးသွားတဲ့ အိမ်တွေ၊ ရေထိန်းနံရံတွေအပြင် အပျက်အစီးအပုံလိုက်တွေကိုလည်း ပြသခဲ့ပါတယ်။
အောရိန့်ချ်ကောင်တီမှာ မုန်တိုင်း တိုက်ခတ်ပြီးနောက်မှာ လူ ၂ ဦး ဓာတ်လိုက်ခံရလို့ သေဆုံးခဲ့ပြီး ဖလော်ရီဒါရဲ့ ကွေ့ပတ်လမ်းမှာလည်း နောက်ထပ် လူ ၂ ဦး ယာဉ်တိုက်မှုကြောင့် သေဆုံးခဲ့ရ ကြောင်း ပြည်နယ် အဝေးပြေးကင်းလှည့်ကို ကိုးကားပြီး Orlando Sentinel သတင်းစာက ဖော်ပြပါတယ်။
နီကိုးလ်မုန်တိုင်းဟာ တနာရီလျှင် ၇၅ မိုင်နှုန်းနဲ့ တိုက်ခတ်ခဲ့တာကြောင့် နိုဝင်ဘာ ၁၀ ရက်မှာ ဓာတ်အားလိုင်းတွေ ပြတ်တောက်ခဲ့ပြီး အိမ်ခြေ ၃ သိန်းကျော် လျှပ်စစ်မီးပြတ်တောက်ခဲ့ပါတယ်။
နိုဝင်ဘာ ၁၁ ရက်မနက်ပိုင်းမှာ နေအိမ်တွေနဲ့ စီးပွားရေး လုပ်ငန်းပေါင်း ၄၄,၅၀၀ လောက် လျှပ်စစ်မီးပြတ်တောက်ခဲ့ကြောင်း PowerOutages.us က ဖော်ပြခဲ့ပါတယ်။