ကရင်အမျိုးသားအစည်းအရုံး၊ ကေအန်ယူ တပ်မဟာ ၅ နယ်မြေ၊ ဖာပွန်မြို့နယ်၊ စစ်ကောင်စီ(ဝါဒိုးစိုး) တပ်စခန်းကို မတ် ၃၁ ရက် မနက် ၉ နာရီလောက်က KNLA တပ်ဖွဲ့ဝင်တွေ ဝင်ရောက် တိုက်ခိုက်ခဲ့တဲ့အတွက် စစ်ကောင်စီတပ်ဖွဲ့ဝင် ၁ ဦး သေဆုံးတယ်လို့ ကေအန်ယူက သတင်းထုတ်ပြန်ပါတယ်။
စစ်ကောင်စီတပ်တွေနဲ့ BGF ပူးပေါင်းတပ်တွေက နယ်မြေကျော် ဝင်ရောက်ပြီး စစ်ရေးလှုပ်ရှားတာ၊ လူအင်အား၊ လက်နက်ခဲယမ်း ဖြည့်တင်းတာ၊ ရိက္ခာပို့ဆောင်နေတာတွေကြောင့် နေ့စဉ် တိုက်ပွဲတွေ ဖြစ်ပွားနေတာပါ။
မတ် ၃၀ ရက်က စစ်ကောင်စီရဲ့ ထောက်ပံ့ရေးအတွက် အဓိကအသုံးပြုနေတဲ့ ဖာပွန်မြို့၊ ရှမ်းကိုင်းရပ်ကွက်အတွင်းက တံတား ၁ စင်းကို KNLA တပ်ရင်း ၁၅၊ တပ်ခွဲ ၂ တပ်ဖွဲ့ဝင်တွေက ဝင်ရောက် ဖျက်ဆီးလိုက်နိုင်တယ်လို့ ဆိုပါတယ်။
အဲဒီနေ့မှာပဲ ထီးကဆောမဲ(ဆင်စွယ်) ကနေ ရိက္ခာပို့ဆောင်အပြီး ပြန်လာတဲ့ စစ်ယာဉ်တန်းနဲ့အတူ လိုက်ပါလာတဲ့ စစ်ကောင်စီလက်အောက်ခံ BGF တပ်စုတစုကို KNLA တပ်ဖွဲ့တွေက စောင့်ဆိုင်းပစ်ခတ်ခဲ့ရာ BGF တပ်ဖွဲ့ဝင် ၉ ဦးသေဆုံးခဲ့တယ်လို့ ဆိုပါတယ်။
အလားတူ အဆိုပါနေ့ မနက် ၉ နာရီလောက်က မကမို(ကမမောင်း) လမ်းကြောင်းအတိုင်း ထွက်ခွာလာတဲ့ စစ်ကောင်စီရဲ့ စစ်မြေပြင်ယန္တရားတပ်က ၆ ဘီးယာဉ် ၃ စီးကို KNLA တပ်ဖွဲ့ဝင်တွေက စောင့်ဆိုင်းပစ်ခတ်ခဲ့သလို မနက် ၁၁ နာရီလောက်မှာ ထပ်မံပြီး ဒုတိယကြိမ် စောင့်ဆိုင်းပစ်ခတ်ခဲ့ရာ ထိခိုက်ပျက်စီးမှု အသေးစိတ်ကို မသိရှိရသေးဘူးလို့ ကေအန်ယူက ထုတ်ပြန်ထားပါတယ်။
ကေအန်ယူ တပ်မဟာ ၅ နယ်မြေအတွင်း စစ်ကောင်စီတပ်တွေ စစ်ရေးလှုပ်ရှားမှုတွေ ပိုလုပ်လာတဲ့အတွက် နှစ်ဖက်တိုက်ပွဲတွေ ပိုမိုပြင်းထန်လာပြီး စစ်ကောင်စီက လက်နက်ကြီးအပြင် လေကြောင်းကနေ နေ့၊ ည ဗုံးကြဲတိုက်ခိုက်ခဲ့တဲ့အတွက် ဒေသခံ အရပ်သားပြည်သူတွေ ဗုံးဆန်ထိမှန် သေဆုံးသူ၊ ဒဏ်ရာရရှိသူတွေ ရှိသလို နေအိမ်နဲ့ အဆောက်အအုံတွေပါ ထိမှန်ပျက်စီးခဲ့ပါတယ်။
စစ်ကောင်စီရဲ့ ပစ်ခတ်တိုက်ခိုက်မှုတွေကြောင့် အရပ်သားပြည်သူတွေဟာ နေအိမ်စွန့်ခွာပြီး ဘေးလွတ်ရာ တော၊ တောင်တွေထဲ ထွက်ပြေးတိမ်းရှောင်နေရတဲ့အတွက် နေထိုင်စားသောက်ရေး၊ သောက်သုံးရေနဲ့ အရေးပေါ်ဆေးဝါးတွေ လိုအပ်နေတယ်လို့ စစ်ဘေးရှောင်အရေး ကူညီပေးနေသူတွေဆီက သိရပါတယ်။
ကရင်ပြည်နယ်၊ ကရင်အမျိုးသား အစည်းအရုံး (ကေအန်ယူ) တပ်မဟာ (၅) နယ်မြေ ဖာပွန်မြို့ရှိ စစ်ကောင်စီ လက်အောက်ခံ ဌာနဆိုင်ရာဝန်ထမ်းအားလုံးနီးပါး ထွက်ခွာသားပြီလို့ ကေအန်ယူ နိုင်ငံခြားရေးတာဝန်ခံ ပဒိုစောတောနီးက ပြောပါတယ်။
ဖာပွန်မြို့နယ်ရှိ စစ်ကောင်စီလက်အောက်ခံ ဝန်ထမ်းအားလုံး ဖေဖော်ဝါရီ ၁၀ ရက်နေ့ နောက်ဆုံး ထားပြီး အမြန်ဆုံးထွက်ခွာကြဖို့ ကေအန်ယူ တပ်မဟာ ၅ က ဇန်နဝါရီ ၂၉ ရက်နေ့က သတိပေးချက် ထုတ်ပြန်ခဲ့ပါတယ်။
ဒီနေ့ ဖေဖော်ဝါရီ ၁၀ ရက်နေ့ ပြည့်တဲ့နေ့မှာတော့ ဖာပွန်မြို့ပေါ်က ဌာနဆိုင်ရာ အကြီးပိုင်းတွေကလွဲရင် အားလုံးနီးပါး ထွက်ခွာသွားကြပြီလို့ ပဒုစောတောနီးက ပြောပါတယ်။ေ
“ကျနော်တို့သိရသလောက် စပြီးတော့ စာထုတ်တဲ့ ဇန်နဝါရီလကုန်ပိုင်းကတည်းက လူ ၁၀ ရာခိုင်နှုန်းပဲ ရှိတော့တယ်လို့ သူတို့ ပြောတယ်လေ။ ပြောပြီးနောက် ရက်အနည်းငယ်အတွင်းမှာပဲ ကျနော်တို့ ထပ်ပြီးတော့ သိရတာကတော့ အဲဒီ ၁၀ ရာခိုင်နှိုင်းလည်း ထပ်ထွက်သွားတယ်လေ။ ဆိုတော့ အဲဒီ ၁၀ ရာခိုင်နှုန်းက မရှိတော့ဘူး။ ၅ ရာခိုင်နှိုင်း အနည်းဆုံးထွက်သွားပြီဆိုတော့ အခု အစွမ်းကုန် အလွန်ဆုံးရှိမှ ၅ ရာခိုင်နှုန်းလောက်ပဲ ရှိတော့မယ်။ သူတို့ ဌာနဆိုင်ရာလူကြီးတွေလောက်ပဲ ကျန်ခဲ့တယ်လို့ သိရတယ်ေ”
ကေအန်ယူ တပ်မဟာ ၅ က သတိပေးစာထုတ်ပြန်ပြီး ဒီကနေ ဖေဖော်ဝါရီလ ၁၀ ရက်နေ့အထိ ဌာနဆိုင်ရာ ဝန်ထန်း ၁၀၀ ကျော်ထွက်ခွာသွားပြီးဖြစ်တဲ့အတွက် ဝန်ထမ်းအနေအထား ယိုင်နဲ့သွားပြီလို့လည်း ပြောပါတယ်။
”ကျေးရွာပိုင်းကတော့ သိတဲ့အတိုင်းပဲ၊ သူတို့အာဏာသိမ်းကတည်းက ကျေးရွာပိုင်းမှာ သူတို့ အုပ်ချုပ်ရေးလုပ်ငန်းက ယိုင်နဲ့သွားပြီလေ။ ယိုင်နဲ့သွားတဲ့ပေါ်မှာ အဲဒီမှာ ကော်သူးလေဥပဒေအရ ပြန်ပြီးတော့ အစားထိုးလိုက်နိုင်တဲ့အပိုင်းလို့ ပြောလို့ရတာပေါ့။ ဒါက ဒေသတခုတည်း မဟုတ်ဘူး။ ကျနော်တို့ ဒေသ ၇ ခုစလုံးမှာ ဒီအတိုင်းပဲ ဖြစ်နေတာ။ အဲဒါကြောင့် ဒီက အထူးသဖြင့် ဖာပွန်ဘက်ကတော့ အခုနောက်ဆုံးအနေနဲ့ မြို့တွင်းပိုင်းအထိကို ဒီလိုအခြေအနေမျိုးရအောင် ဖန်တီးနိုင်တယ်ဆိုတာ၊ ဒါ ကျနော်တို့ ချတဲ့ပေါ်လစီအတိုင်းပဲလေ။ စစ်အာဏာရှင်စနစ်ကို ဆန့်ကျင်တယ်။ ကျနော်တို့ဆန့်ကျင်တဲ့လူတွေနဲ့ ပူးပေါင်းလုပ်ဆောင်သွားမယ်။ သူတို့အုပ်ချုပ်ရေး ယန္တရားကို မပျက်၊ ပျက်အောင်လုပ်ရမယ်ဆိုတာ ကျနော်တို့ ပေါ်လစီရှိထားပြီးသားဆိုတော့ အောက်ခြေကတော့ သူနည်းနဲ့သူဟာနဲ့ လုပ်ယူနေကြတာပဲလေ။ ”
ကေအန်ယူ တပ်မဟာ (၁) ထိန်းချုပ်နယ်မြေ ဘားအံမြို့နယ်ရှိ ကရင်နယ်ခြားစောင့်တပ် (BGF) တပ်ဖွဲ့ဝင်တွေနဲ့ ပြည်သူ့စစ် အဖွဲ့ဝင်တွေ၊ ဌာနဆိုင်ရာ ဝန်ထမ်းများအားလုံး အမြန်ဆုံး နုတ်ထွက်ကြဖို့နဲ့ စစ်ကောင်စီနဲ့ ပူးပေါင်း ဆောင်ရွက်ခြင်း မပြုလုပ်ဖို့ ကေအန်ယူ တပ်မဟာ ၁ က ဖေဖော်ဝါရီ ၈ ရက်နေ့ကတည်းက သတိပေးချက် ထုတ်ပြန်ထားပါတယ်။
