ရခိုင်ပြည်နယ်၊ မောင်တောမြို့နယ်မြောက်ပိုင်း ဖားဝပ်ချောင်းကျေးရွာ နယ်ခြားစောင့်စခန်းမှာ တာဝန်ကျနေတဲ့ ရဲမှူးက ရွာသားတွေ ရွာမှာ မနေဝံ့အောင် နည်းမျိုးစုံနဲ့ ခြိမ်းခြောက်နေတယ်လို့ ဒေသခံတွေဆီက သိရပါတယ်။

ဖားဝပ်ချောင်းကျေးရွာသားတဦးက “ရွာသူရွာသားတွေကို ခေါ်တယ်။ အေအေ တပ်ဖွဲ့ဝင်တွေကို လက်ခံမထားဖို့နဲ့ လက်ခံထားတဲ့ နေအိမ်တွေကို မီးရှို့ပစ်မယ်လို့ ပြောဆိုခြိမ်းခြောက်တယ်။ အရင် မီးလောင်သွားခဲ့တဲ့ လူမနေတဲ့ နေအိမ်တွေကိုလည်း ဘယ်သူမေးမေး အေအေက မီးရှို့တယ်လို့ ပြောရမယ်လို့ လိမ်ညာခိုင်းတယ်” လို့ ပြောပါတယ်။

ရဲမှူး တွင်မင်းစိုးက ရွာမှာ လူမနေဝံ့အောင် နည်းမျိုးစုံနဲ့ ခြိမ်းခြောက်နေသလို အဲဒီစခန်းမှ ဗိုလ်ကြီး ဘန်းဆမ်းမန်း၊ ဗိုလ်လေးကျော်ကျော်နဲ့ သူတို့နောက်လိုက် ဝင်းမင်းသန်းတို့က ရွာသူရွာသားတွေ ရှာလာတဲ့ ငါး၊ ပုစွန်တွေကို အတင်းအဓမ္မ တောင်းယူနေတယ်လို့ ကျေးရွာ ဒေသခံတွေက ပြောပါတယ်။

“သူတို့ကိုယ်တိုင်လည်း ချောင်းကိုသွားပြီး ငါး၊ ပုစွန်တွေ မရှာဝံ့ကြဘူး။ ကျနော်တို့ ရှာလာတာကို အတင်းတောင်းတယ်။ အေအေနဲ့ ပတ်သက်တယ်ဆိုပြီး ဖမ်းမယ်။ ဘာညာနဲ့ ​ခြိမ်းခြောက်မှုတွေ လုပ်နေတယ်။ လမ်းတွေ ပိတ်ထားတော့ ကိုယ့်ဝမ်းစာကိုယ် ရှာစားနေကြရတာ။ ကျနော်တို့ ငတ်နေသလို သူတို့လည်း ငတ်နေတာဘဲ့။ သူတို့ဘာသာ သွားကြပေါ့။”

ဖားဝပ်ချောင်းကျေးရွာမှာ အိမ်ခြေ ၁၂၀ ကျော်ရှိပြီး အိမ်ခြေ ၁၀၀ ကျော်မှာ မောင်တောမြို့ပေါ်ကို နေရပ်စွန့်ခွာသွားကြပြီး လက်ရှိမှာ ၁၅ အိမ်လောက်သာ ကျန်ရှိနေတာပါ။

ဖားဝပ်ချောင်း နယ်ခြားစောင့်စခန်းမှာ အင်အား ၄၀ သာရှိပြီး အေအေ စစ်ဆေးရေးဂိတ်တွေ ဖွင့်လှစ်ချိန်က စခန်းအပြင်မထွက်ဝံ့ကြပါဘူးလို့ ဒေသခံက ပြောပါတယ်။

မောင်တောဒေသကို အောက်တိုဘာ ၆ ရက်နေ့က စစ်ကောင်စီက အင်အား  ၆၀၀ လောက် တိုးချလာရာ အေအေတပ်ဖွဲ့ဝင်တွေက ရွာမထိခိုက်စေဖို့ ထွက်သွားကြပြီးနောက်ပိုင်းမှာ နယ်ခြားစောင့်တွေက အခုလို ခြိမ်းခြောက်လာတာလို့ ဒေသခံရွာသားတွေဆီက သိရပါတယ်။

ရခိုင်ပြည်နယ်၊ မောင်တောမြို့က အေအေတပ်ဖွဲ့ဝင်တွေ အခြေစိုက်ရာ ဖားဝပ်ချောင်း ကျေးရွာမှာ အောက်တိုဘာ ၁၃ ရက် နေ့လယ်က ရွာသူရွာသားတွေကို စစ်ကောင်စီတပ်က နှင်ထုတ်ကာ နေအိမ်တွေကို စစ်ဆေးပြီးနောက် ရွာအပြင်က လူမနေတဲ့ နေအိမ်နှစ်လုံးကို မီးရှို့လိုက်တယ်လို့ ဖားဝပ်ချောင်းဒေသခံတွေက အတည်ပြု ပြောပါတယ်။

ဖားဝပ်ချောင်းကျေးရွာသားတယောက်က “ကျနော်တို့ ရွာသူ ရွာသားတွေကို စစ်ကြောင်းက ဘုန်းကြီးကျောင်းကို ပြောင်းနေကြဖို့ပြောတယ်။ ရွာသူ ရွာသားတွေလည်း ဘုန်းကြီးကျောင်းကို ထွက်သွားကြတော့ ရွာကနေအိမ်တွေကို သူတို့စိတ်ကြိုက် စစ်ဆေးမှုတွေလုပ်ပြီး ရွာပြင်က လူမနေတဲ့ နေအိမ် ၂ လုံးကို မီးရှို့သွားကြတယ်” လို့ ပြောပါတယ်။

အခုလို ဖားဝပ်ချောင်းကျေးရွာကို စစ်ကောင်စီတပ်က ရှောင်တခင် ဝင်ရောက်စစ်ဆေးတာ​ကြောင့် တခြားကျေးရွာတွေက ဒေသခံတွေလည်း စိုးရိမ်နေကြတယ်လို့ ဒေသခံတွေက ပြောပါတယ်။

ဒေသခံ စစ်ရေးလေ့လာသူတွေက “ဖားဝပ်ချောင်းက အေအေဘက်က စစ်ဆေးရေးဂိတ်တွေတောင် ဖွင့်ခဲ့တာ။ အခု စစ်ကောင်စီတပ်က အင်အားအလုံးအရင်းနဲ့ ရွာကို စစ်ချင်သလိုစစ်တယ်၊ လူမနေတဲ့ နေအိမ်တွေကို မီးရှို့တယ်ဆိုတော့ စစ်ကောင်စီက နယ်မြေတွေကို လက်လွတ်မပေးတဲ့သဘော တွေ့နေရတယ်” လို့ ပြောပါတယ်။

ပြီးခဲ့တဲ့ စက်တင်ဘာ ၂၇ ရက်ကလည်း အေအေတပ်ဖွဲ့ဝင်တွေ စုဝေးလှုပ်ရှားရာ ေမာင်တောမြောက်ပိုင်းက ဖားဝပ်ချောင်းကျေးရွာကို စစ်ကောင်စီအင်အား ၁၀၀ ကျော်လောက်ပါတဲ့ စစ်ကြောင်းတခု ရွာကိုဝင်ရောက်စစ်ဆေးပြီး အနီးအနား တောင်ကုန်းတွေကို လက်နက်ကြီး လက်နက်ငယ်တွေနဲ့ အဆက်မပြတ် ပစ်ခတ်ဝင်ရောက်ခဲ့ပါသေးတယ်။

လက်ရှိမှာတော့ ဖားဝပ်ချောင်း ရွာသူရွာသားတွေဟာ ဘုန်းကြီးကျောင်းကနေ မိမိနေအိမ်တွေကို ပြန်လည်ရောက်ရှိနေကြသလို စစ်ကောင်စီတပ်ကလည်း တရွာလုံးကို ဝိုင်းထားတယ်လို့ ဒေသခံရွာသားတွေဆီက သိရပါတယ်။