အမေရိကန်နိုင်ငံ ဖီလာဒဲလ်ဖီးယားမြို့မှာ နိုဝင်ဘာ ၅ ရက်ညက ပစ်ခတ်မှုကြောင့် အနည်းဆုံး လူ ၉ ယောက် သေနတ်ကျည်ဆန်ထိမှန်ခဲ့ပြီး ၂ ယောက်က အခြေအနေ စိုးရိမ်ရတယ်လို့ ရဲတပ်ဖွဲ့က ပြောပါတယ်။

ပစ်ခတ်မှုဖြစ်တဲ့နေရာမှာ ရဲတွေရောက်နေတာကို ဗွီဒီယိုမှတ်တမ်းတွေက ပြထားပါတယ်။

သေနတ်သမား အများအပြားဟာ ပင်ဆယ်လ်ဗေးနီးယားပြည်နယ် ကန်ဆင်းတွန် ဧရိယာက ကားတစီးထဲကနေ ထွက်လာပြီး သေနတ်နဲ့ အကြိမ် ၄၀ လောက် ပစ်ခတ်ခဲ့တယ်လို့ ဖီလာဒဲလ်ဖီးယားမြို့ ပထမ လက်ထောက်ရဲမင်းကြီး ဂျွန်စတန်းဖို့ဒ်က သတင်းစာရှင်းလင်းပွဲမှာ ပြောခဲ့ပါတယ်။ ဒဏ်ရာရသူ ၇ ယောက်က အခြေအနေ တည်ငြိမ်တယ်လို့ သူကပြောပါတယ်။

ကားဆီပြန်လာပြီး ထွက်သွားတဲ့ သေနတ်သမားရဲ့ ပစ်မှတ်ကို မသိရသေးဘဲ ရဲတပ်ဖွဲ့က စုံစမ်းစစ်ဆေးနေတယ်လို့ စတန်းဖို့ဒ်က ပြောပါတယ်။။

အမေရိကန်မှာ အခုနှစ်အတွင်း လူဒါဇင်နဲ့ချီ သေဆုံးပြီး ဒဏ်ရာရခဲ့တဲ့ ကျောင်းပစ်ခတ်မှုတွေကြောင့် ကာလရှည်ကြာ လည်ပတ်နေတဲ့ အမေရိကန် သေနတ်ထိန်းချုပ်ရေးကိစ္စကို ဆွေးနွေးနေကြပါတယ်။

တက္ကဆက်ပြည်နယ်မှာ မေလအတွင်း သေနတ်သမားတယောက်က ကလေးငယ် ၁၉ ယောက်နဲ့ အရွယ်ရောက်ပြီးသူ ၂ ယောက်ကို အသေပစ်ခတ်ခဲ့လို့ အသေအပျောက် အများဆုံး ပစ်ခတ်မှု ဖြစ်ခဲ့ပါတယ်။

ကန်းဆတ်မြို့နဲ့ ချီကာဂိုမြို့တွေမှာလည်း အောက်တိုဘာ ၃၁ ရက်က ပစ်ခတ်မှုကြောင့် လူတယောက်သေဆုံးပြီး အယောက် ၂၀ လောက် ဒဏ်ရာရခဲ့ပါတယ်။

အမေရိကန်နိုင်ငံ၊ ပင်ဆယ်လ်ဗေးနီးယားနိုင်ငံ ဖီလာဒဲလ်ဖီးယားမြို့က ရဲအရာရှိ ၂ ယောက်ဟာ ဘင်ဂျမင်ဖရန်ကလင် ပန်းခြံလမ်းအနားမှာ ပစ်ခတ်ခံခဲ့ရတယ်လို့ ရိုက်တာသတင်းဌာနက ဇူလိုင် ၅ ရက်မှာ ဖော်ပြပါတယ်။

ထောင်ချီတဲ့လူတွေက ဇူလိုင် ၄ ရက် ဂီတပွဲတော်နဲ့ မီးပန်းပြပွဲ ကျင်းပနေချိန်မှာ လုံခြုံရေးစည်း ပေါက်ခဲ့တာလို့ အရေးပေါ် အာဏာပိုင်တွေ၊ ဒေသန္တရ အရာရှိတွေနဲ့ မီဒီယာတွေက ပြောပါတယ်။

ဒဏ်ရာရတဲ့ အရာရှိ ၂ ယောက်လုံး အခြေအနေ တည်ငြိမ်တယ်လို့ CBS3 ဖီလာဒဲလ်ဖီးယား သတင်းဌာနက ရဲဌာနကို ကိုးကားပြောဆိုပါတယ်။ ရဲတွေက ပစ်ခတ်သူကို ရှာနေဆဲပါ။

လူတွေ ပန်းခြံလမ်းကနေ ပြေးထွက်လာချိန်မှာ ရဟတ်ယာဉ်တွေက ရှာဖွေရေးမီးတွေထိုးပြီး ပျံသန်းနေတာကို ရုပ်သံက ပြသပါတယ်။

လူတွေ အနားက အဆောက်အဦတွေထဲမှာ ခိုလှုံနေဖို့ကိုလည်း ရဲတွေက ညွှန်ကြားခဲ့ပါတယ်။

အဲဒီနေ့ အစောပိုင်းက ချီကာဂိုမြို့ ဆင်ခြေဖုံးက ဟိုက်လန်းပန်းခြံထဲမှာ ဇူလိုင် ၄ ရက် ချီတက်ပွဲမှာ အလံတွေကို ဝှေ့ယမ်းနေတဲ့ မိသားစုတွေကို ခေါင်မိုးပေါ်က သေနတ်သမားတယောက် ပစ်ခတ်ခဲ့လို့ လူ ၆ ယောက် သေဆုံးပြီး ၃၆ ယောက်ထက်မနည်း ဒဏ်ရာရခဲ့ပါတယ်။