စစ်ကိုင်းတိုင်းအထက်ပိုင်း မြို့အတော်များများ အောက်တိုဘာ ၁ ရက်နောက်ပိုင်းက စတင်ကာ ဖုန်းလိုင်းနဲ့ အင်တာနက်လိုင်းတွေ ပြတ်တောက်နေပြီး အောက်တိုဘာ ၇ ရက်မှာ ဖုန်းလိုင်း ပြန်ရတယ်လို့ ဒေသခံတွေထံက သိရပါတယ်။

မော်လိုက်မြို့နယ် ဒေသခံအမျိုးသားတဦးက "မော်လိုက်မြို့ပေါ်နဲ့ မော်လိုက်မြို့နယ်တွေမှာ MPT ၊ Ooredoo, Telenor ဖုန်းလိုင်းတွေ ဖြတ်တောက်ခံထားရတယ်။ စက်တင်ဘာ ၃၀ ရက်က တိုက်ပွဲဖြစ်စဉ်ရဲ့ နောက်ဆက်တွဲလို့ ထင်မိပါတယ်။ မော်လိုက်မြို့ပေါ်က ပြည်သူတွေနဲ့ နယ်က ပြည်သူတွေအတွက် များစွာစိုးရိမ်မိတယ် " လို့ ပြောပါတယ်။

မော်လိုက်မြို့နယ်မှာ MPT ၊ Ooredoo, Telenor ဖုန်းလိုင်းတွေရှိပေမယ့် Mytel ဖုန်းလိုင်း တခုသာ ဖုန်းလိုင်း၊ အင်တာနက်လိုင်း ရနေတယ်လို့ ဒေသခံတွေထံက သိရပါတယ်။

ဟုမ္မလင်းမြို့နယ်အတွင်းမှာလည်း ဖုန်းလိုင်းများပြတ်တောက်ပြီး ဆက်သွယ်ရေး အခက်အခဲ ဖြစ်ခဲ့တယ်လို့ လွှဲ‌ငွေလုပ်ငန်းလုပ်ကိုင်တဲ့ စီးပွားရေးလုပ်ငန်းရှင်တွေက ပြောပါတယ်။

ဒေသခံ စီးပွားရေးလုပ်ကိုင်နေသူတဦး " MPT ကတော့ လုံးဝလိုင်းပျောက်သွားတယ်။ Telenor ကတော့ လိုင်းပေါ်လိုက် ပျောက်လိုက် ဖုန်းပြောလို့ ရလိုက်နဲ့ အင်တာနက်လိုင်းကတော့ ရကို မရတာ Mytel ကတော့ သုံးတဲ့ သူ သုံးကြတယ်။ ဒါပေမဲ့ မရှိသုံး သုံးကြတာပါ " လို့ ပြောပါတယ် ။

မော်လိုက်မြို့မှာ ဖုန်းလိုင်တွေ မကြာခဏပြတ်တောက်လေ့ရှိပေမဲ့ ၂ ရက် လောက်သာ ပြတ်တောက်လေ့ရှိပြီး အခုလို သီတင်းပတ်နဲ့ချီ ပြတ်တောက်တာကတော့ အခုတကြိမ် ပထမဆုံးဖြစ်တယ်လို့ ဒေသခံတွေထံက သိရပါတယ်။

ဆက်သွယ်ရေးကုမ္ပဏီတွေအနေနဲ့ ထမင်းရှင် ပြည်သူတွေရဲ့ မျက်နှာကို မကြည့်ဘဲ စစ်ကောင်စီအလိုကျ အင်တာနက်ဖြတ်တောက်တာ၊ ဖုန်းလိုင်းဖြတ်တောက်တာ စတဲ့ Customer Rights ချိုးဖောက်နေတာတွေေ ချက်ချင်းရပ်တန့်ပြီး ထီးလင်းတမြို့နယ်လုံးကို အင်တာနက်ပြန်ဖွင့်ပေးဖို့ YDF ထီးလင်းက မေ ၁၂ ရက်မှာ တောင်းဆိုလိုက်ပါတယ်။

၂၀၂၁ ခုနှစ် ဖေဖော်ဝါရီ ၁ ရက် စစ်တပ်က နိုင်ငံ့ခေါင်းဆောင်တွေကို ဖမ်းဆီးကာ မတရား အာဏာသိမ်းခဲ့ချိန်ကစပြီး ထီးလင်းမြို့နယ်မှာ အချိန်အကန့်အသတ်နဲ့ပဲ အင်တာနက် ရရှိခဲ့ကာ စက်တင်ဘာလဆန်းပိုင်းက စတင်ပြီး အင်တာနက် လုံးဝဖြတ်တောက်ခံခဲ့ရလို့ အခုအချိန်မှာ အင်တာနက် လုံးဝမရရှိတာ ၈ လကျော် ကြာမြင့်ခဲ့ပြီ ဖြစ်ပါတယ်။

ထီးလင်းမြို့နယ် ဧရိယာ ၅၀ ရာခိုင်နှုန်းခန့်သာ ပုံမှန်ဖုန်းလိုင်းရရှိပြီး စစ်ကြောင်းတွေ ထိုးတဲ့အချိန်တိုင်း ဖုန်းလိုင်းတွေကို ဖြတ်တောက်ပစ်တာကြောင့် ပြည်သူတွေ သတင်းမရရှိဘဲ အခက်အခဲ ကြုံနေကြရတယ်လို့ သိရပါတယ်။

“ကျနော်တို့ ထီးလင်းနယ်မှာ အင်တာနက်လိုင်း ဖြတ်ခံရတာ ၈ လကျော်ပြီ။ ဒေသခံတွေ အခက်အခဲတွေ ဖြစ်ကြတယ်။ ငွေလွှဲဝင်ဆောင်မှုတွေရော သတင်းအချက်အလက်တွေ မသိကြရတာရော။ ဒါကြောင့်မို့ ဆက်သွယ်ရေးကုမ္ပဏီတွေ အနေနဲ့ အင်တာနက်လိုင်းတွေ ပြန်လည်ဖွင့်ပေးစေလိုတယ်။ စစ်ကောင်စီ‌တပ်တွေ စစ်ကြောင်းရှိတဲ့အခါဆိုရင် ဖုန်းလိုင်းတွေဖြတ်တယ်” လို့ YDF ထီးလင်းရဲ့ တာဝန်ခံက ဒီဗွီဘီကို ပြောပါတယ်။

အဆိုပါတောင်းဆိုချက်ကို ဒီကနေ့‌‌ မေ ၁၂ ရက်ကနေ နောက်တလအတွင်း အကောင်အထည်ဖော်ဖို့နဲ့ တလပြည့်ချိန်ထိ အင်တာနက်လိုင်း၊ ဖုန်းလိုင်းတွေ ပြန်လည်မရရှိပါက ထီးလင်းမြို့နယ်တွင်းက ဆက်သွယ်ရေး တာဝါတိုင်တွေ အားလုံးကို တစစီဖြိုချကာ တော်လှန်ရေးအတွက် အသုံးချသွားမယ်လို့ YDF ထီးလင်းက သတိပေး တောင်းဆိုလိုက်ပါတယ်။