ပါကစ္စတန်နိုင်ငံ မြို့တော်လာဟိုးကို ထူထဲတဲ့ မီးခိုးမြူလုံးတွေက ဒီဇင်ဘာ ၃ ရက်မှာ ဒုတိယနေ့အဖြစ် ဆက်တိုက် ဖုံးလွှမ်းခဲ့ပါတယ်။ 

အိန္ဒိယနဲ့ ပါကစ္စတန်ဘက်ခြမ်း နှစ်ဘက်စလုံးရှိ ပန်ဂျပ်ပြည်နယ်က လယ်သမားတွေဟာ နိုဝင်ဘာလကနေ ဖေဖော်ဝါရီလအထိ ဆောင်းရာသီအတွင်း ကောက်ပဲသီးနှံအမှိုက်တွေကို စတင် မီးရှို့ကြလေ့ရှိပြီး မီးခိုးတွေထူထပ်လာပြီးတော့ လေထုအရည်အသွေးဟာ များသောအားဖြင့် ပိုပြီးဆိုးရွားလာတတ်ပါတယ်။ 

ဒီဇင်ဘာ ၂ ရက်မှာတော့ လာဟိုးရှိ လေအရည်အသွေးညွှန်းကိန်း (AQI) ဟာ ၄၀၀ အထိ မြင့်တက်လာပါတယ်။

AQI ၁၀၀ အထက် ရှိတဲ့အခြေအနေဟာ လူတွေကို ယားယံခြင်းနဲ့ အဆုတ်ဆိုင်ရာ ပြဿနာတွေ ကြုံတွေ့ရနိုင်ခြေရှိတာကြောင့် ကျန်းမာရေးနဲ့ မညီညွတ်ဘူးလို့ သတ်မှတ်ထားတာပါ။

မြူခိုးတွေကြောင့် ဆိုးကျိုးတွေ အများကြီးတွေ့နေရတယ်လို့ လာဟိုးမြို့မှာ နေထိုင်သူ မိုဟာမက် အူမာက ပြောပါတယ်။

မနက်ခင်းမှာ မီးခိုးမြူတွေကြောင့် လမ်းမှာ အရှေ့ဘက်ကို ဘာမှမမြင်ရတာကြောင့် လမ်းမတော်တဆမှုတွေက အဖြစ်များပါတယ်။ 

ချောင်းဆိုးတာ၊ အအေးမိတာနဲ့ တခြားအသက်ရှူလမ်းကြောင်းဆိုင်ရာ ရောဂါတွေလည်း ပျံ့နှံ့နေပါတယ်လို့ အူမာက ‌ပြောပါတယ်။

ဩစတြေးလျ၏ အရှေ့ဘက်ကမ်းရိုးတန်းတစ်လျှောက်မှာ ဇွန် ၁၃ ရက်က လှိုင်းလုံးကြီးတွေ ရိုက်ခတ်ခဲ့အပြီး ရေလှိုင်းသတိပေးချက်တွေ ထုတ်ပြန်ခဲ့ရသလို ကမ်းခြေတွေကိုလည်း ပိတ်ထားခဲ့ရပါတယ်။

ဘွန်ဒီကမ်းခြေမှာရှိတဲ့ လမ်းလျှောက်လမ်းကို လှိုင်းလုံးကြီးတွေ ညတွင်းချင်း ဖုံးလွှမ်းခဲ့ပြီး ဆစ်ဒနီရဲ့ အထင်ကရအရှိဆုံး ကမ်းခြေတချို့မှာလည်း လှိုင်းတွေ အကြီးအကျယ် ဖုံးလွှမ်း ခဲ့ပါတယ်။

နယူးဇီလန်နိုင်ငံအနောက်ဘက်ကမ်းရိုးတန်းကနေ မြောက်ဘက်ကို တဖြည်းဖြည်း ရွေ့လျားလာတဲ့ လေဖိအားနည်း ရပ်ဝန်းတစ်ခုကြောင့် ဒီလို ရာသီဥတုဖြစ်ပေါ်လာတာလို့ မိုးလေဝသဌာနက ပြောပါတယ်။

လေဖိအားနည်း ရပ်ဝန်းစနစ်ကြောင့် သီတင်းပတ်ကုန်ပိုင်းက တက်စမေးနီးယား ကျွန်းဘက်ကို နှင်းမုန်တိုင်း တိုက်ခတ်ခဲ့တာပါ။

ဇွန် ၁၁ ရက်မှာ တောင်တက်သမား ၈ ဦးကို ကယ်ဆယ်နိုင်ခဲ့ပြီး ထောင်ချီတဲ့ အိမ်တွေ လျှပ်စစ်ဓာတ်အား ပြတ်တောက်နေပါတယ်။ လာမယ့် ရက်တွေမှာ အခြေအနေ ပြေလျော့ သက်သာလာမည်လို့ မျှော်လင့် ထားကြပါတယ်။