အာဆင်နယ်ဂိုးသမား လေနိုဟာ ဖူဟမ်အသင်းကို ပေါင် ၈ သန်းနဲ့ အပြီးသတ် ပြောင်းရွှေ့သွားပါတယ်။
အသက် ၃ဝ အရွယ် ဂျာမနီဂိုးသမားဟာ အာဆင်နယ်ကို ဂိုးသမား ရမ်စ်ဒေး ရောက်ရှိလာပြီးနောက် ပွဲထွက်ခွင့်ပျောက်ဆုံးခဲ့ပြီး အခုနှစ်ရာသီမှာတော့ အသင်းပြောင်းဖို့ ဆုံးဖြတ်ခဲ့တာပါ။
ဖူဟမ်အသင်းဆီ ပြောင်းရွှေ့လာခဲ့ရလို့ ပျော်ရွှင်မိပြီး ပွဲထွက်ကစားဖို့ မစောင့်နိုင်တော့ကြောင်း လေနိုက ပြောပါတယ်။ တဆက်တည်းမှာပဲ အာဆင်နယ် ပရိသတ်တွေကိုလည်း နှုတ်ဆက်စကားဆိုခဲ့ပြီး ၄ နှစ်တာကာလအတွင်း အသင်းရဲ့ အစိတ်အပိုင်းတခု ဖြစ်ခွင့်ရခဲ့တာကို ဂုဏ်ယူဝမ်းမြောက်မိကြောင်း ပြောပါတယ်။
လေနိုဟာ အာဆင်နယ်အတွက် စုစုပေါင်း ၁၂၅ ပွဲ ကစားခဲ့တဲ့အနက် ၂၀၂၀-၂၀၂၁ ရာသီက ၄၉ ပွဲအထိ ကစားခဲ့ပြီး အာဆင်နယ်ကစားသမားတွေထဲမှာ ပွဲအများဆုံး ဖြစ်ခဲ့ပါသေးတယ်။
ချန်ပီယံရှစ်ကလပ် ဖူဟမ်အသင်းဟာ ပြိုင်ပွဲပြီးဆုံးဖို့ တပွဲအလိုမှာ ချန်ပီယံဖြစ်ခဲ့ပြီး ပရီးမီးယားလိဂ်ဆီ တန်းတက်ခွင့်ရရှိခဲ့ပါတယ်။
ဖူဟမ်အသင်းဟာ မနေ့ညက ကစားခဲ့တဲ့ လူတန်အသင်းနဲ့ပွဲစဉ်မှာ ၇ ဂိုး ဂိုးမရှိနဲ့ အနိုင်ရခဲ့ပြီး လက်ကျန် ၁ ပွဲအလိုမှာ ချန်ပီယံဖြစ်ဖို့ သေချာသွားခဲ့တာပါ။
ဒုတိယနေရာက ဘုန်းမောက်အသင်းထက် တပွဲပိုကစားထားပေမယ့် ၈ မှတ်အထိ ဖြတ်နိုင်ခဲ့တာကြောင့် ချန်ပီယံအဖြစ် အောင်ပွဲခံနိုင်ခဲ့တာပါ။
လူတန်နဲ့ပွဲမှာ တိုက်စစ်မှူး မီထရိုဗစ်က ၂ ဂိုး သွင်းယူနိုင်ခဲ့ပြီး စုစုပေါင်း ၄၃ ဂိုးအထိ ရှိလာခဲ့ပါတယ်။
ဒါဟာ ၁၉၉၂-၉၃ ရာသီက ဝိူက်တင်ဟမ် တင်ရှိထားတဲ့ တရာသီအတွင်း ၄၂ ဂိုးစံချိန်ကို ကျော်ဖြတ်နိုင်ခဲ့ပြီး စံချိန်သစ်တင်နိုင်ခဲ့တာပါ။
ဖူဟမ်အသင်းအနေနဲ့ကတော့ ၂၁ နှစ်အတွင်းမှာ ပထမဆုံးအကြိမ် ချန်ပီယံရှစ်မှာ ချန်ပီယံဖြစ်ခဲ့တာပါ။
ဖူဟမ်အသင်းဟာ ၂၀၁၈-၁၉ ရာသီက တန်းတက်ကစားခွင့်ရခဲ့ပြီးနောက်ပိုင်း ၂ ကြိမ်တန်းဆင်းခဲ့ရပြီး ပရီးမီးယားလိဂ်ဆီကို ၃ ကြိမ်မြောက် တန်းတက်နိုင်ခဲ့တာပါ။
ဖူဟမ်အသင်းဟာ လက်ကျန်တပွဲအလိုမှာ သွင်းဂိုးစုစုပေါင်း ၁၀၆ ဂိုးရရှိခဲ့ပြီး ၂၀၀၁-၀၂ ရာသီက ချန်ပီယံရှစ်မှာ မန်စီးတီးအသင်း တင်ရှိခဲ့တဲ့ ၁၀၈ ဂိုးစံချိန်ကိုမီဖို့ နီးစပ်လာခဲ့ပါတယ်။
