ဗိုလ်ရှုခံပွဲပြုလုပ်မယ့် စိန်ရတုပြည်ထောင်စုနေ့အခမ်းအနားမှာ ပါဝင်တက်ရောက်ကြဖို့နဲ့ ငြိမ်းချမ်းရေးဆွေးနွေးဖို့ တိုင်းရင်းသားလက်နက်ကိုင်တော်လှန်ရေးအဖွဲ့   EAOs တွေကို အာဏာသိမ်း စစ်ကောင်စီက ဖေဖော်ဝါရီ  ၆ ရက်မှာ ဖိတ်ကြားလိုက်ပါတယ်။

စိန်ရတု ပြည်ထောင်စုနေ့နဲ့ ကြုံကြိုက်တဲ့ အခါသမယမှာ တိုင်းရင်းသား လက်နက်ကိုင်အဖွဲ့အစည်း အားလုံးတို့ဟာ စည်ကားသိုက်မြိုက်စွာ ကျင်းပမယ့် စိန်ရတုပြည်ထောင်စုနေ့ အခမ်းအနားသို့ အချိန်မီတက်ရောက်ကြဖို့နဲ့ စိန်ရတု ပြည်ထောင်စုနေ့ အခမ်းအနား တက်ရောက်စဉ်ကာလအတွင်း ဒီမိုကရေစီနှင့် ဖက်ဒရယ်စနစ်ကိုအခြေခံတဲ့ ပြည်ထောင်စုကို တည်ဆောက်နိုင်ရေးအတွက် ကျင်းပမယ့် ထာဝရငြိမ်းချမ်းရေး အကြိုညှိနှိုင်းဆွေးနွေးပွဲသို့ တက်ရောက်ဆွေးနွေးကြဖို့ အထူးဖိတ်ကြားတယ်လို့ ဖိတ်ကြားချက်မှာဖော်ပြပါတယ်။

အကြမ်းဖက်အုပ်စုအဖြစ် ကြေညာထားတဲ့အဖွဲ့အစည်းများမှအပ NCA လက်မှတ်ရေးထိုးထားတဲ့ တိုင်းရင်းသား လက်နက်ကိုင် အဖွဲ့အစည်းတွေရော NCA လက်မှတ်မရေးထိုးရသေးတဲ့ တိုင်းရင်းသား လက်နက်ကိုင်အဖွဲ့အစည်းတွေပါ ထာဝရငြိမ်းချမ်းရေးအတွက် ဆွေးနွေးရန်ဖိတ်ခေါ်တယ်လို့ဆိုပါတယ်။

ဆွေးနွေးရာမှာ ဆွေးနွေးမယ့် အကြောင်းအရာတွေနဲ့ပတ်သက်လို့ ကြိုတင်ကန့်သတ်ချက်မထားဘဲ တတ်နိုင်သလောက် လွတ်လွတ်လပ်လပ် နှီးနှော ဖလှယ်နိုင်ဖို့ဖို့ ရည်ရွယ်ထားတယ်လို့လည်း ဆိုပါတယ်။

နိုင်ငံရဲ့ ပြည်တွင်းရေးဖြစ်တဲ့ သမိုင်းအစဉ်အဆက်ဖြစ်ပေါ် တည်ရှိလာတဲ့ နိုင်ငံရေးပြဿနာတွေကို နိုင်ငံရေးနည်းနဲ့ ဖြေရှင်းနိုင်ရေးအတွက် ဒီမိုကရေစီကျင့်စဉ်တွေနဲ့အညီ စေ့စပ်ညှိနှိုင်းအဖြေရှာရေး နည်းလမ်းနဲ့ ထာဝရငြိမ်းချမ်းရေးကို ရှေးရှုဆွေးနွေးသွားကြမယ်လို့လည်းဆိုပါတယ်။

မြန်မာနိုင်ငံတဝန်း တိုင်းရင်းသားဒေသတွေအပါအဝင် ပြည်နယ်နဲ့အတိုင်းတွေမှာ စစ်ကောင်စီ တပ်တွေက  မြေပြင်ကရော လေကြောင်းကပါ  အကြမ်းဖက်တိုက်ခိုက်မှုတိုးမြှင့်ပြုလုပ် နေချိန် တဖက်မှာ ငြိမ်းချမ်းရေးဆွေးနွေးဖို့ နေပြည်တော်ကို စစ်ကောင်စီက ဖိတ်ခေါ်နေတာဖြစ်ပါတယ်။ 

အာဏာသိမ်း စစ်ခေါင်းဆောင် မင်းအောင်လှိုင်ကလည်း ၇၅ နှစ်မြောက် စိန်ရတုနေ့ အခမ်းအနားမှာ ဗိုလ်ရှုခံဖို့စီစဉ်နေပြီး ပြည်နယ်နဲ့တိုင်းအလိုက် သူ့ကို ချီတက်အလေးပြုမယ့် အလှပြယာဉ် ကား အစီး ၅၀ လောက် နေပြည်တော်မှာတည်ဆောက်နေကာ ကျပ်ငွေ သိန်းပေါင်း ၉ သောင်းကျော် အသုံးပြုသွားမယ်လို့  သိရပါတယ်။

၂၀၂၂ ဖေဖော်ဝါရီ ၁၂ ရက်  ၇၅ နှစ်မြောက်ပြည်ထောင်စုနေ့ ဗိုလ်ရှုဘင်အခမ်းအနားမှာ အသုံးပြုဖို့ တနင်္သာရီတိုင်း ကိုယ်စားပြုအနေနဲ့ အလှပြယာဉ် ၃ စီးပြုလုပ်နေတဲ့အထဲမှာ တစ်စီးကိုတော့ တနင်္သာရီတိုင်းကိုယ်စားပြု ငါးဖမ်းလှေပုံစံ ပြုလုပ်ထားပါတယ်။

အဆိုပါ ငါးဖမ်းလှေကိုတော့ မြိတ်မြို့က ရေလုပ်ငန်းရှင်သူဌေးကြီးတစ်ဦးဖြစ်တဲ့ မြိတ်အများပိုင်ကော်ပိုရေးရှင်းကုမ္ပဏီမှ ဦးလှသန်းကတာဝန်ယူ ပြုလုပ်ပေးခဲ့တာဖြစ်ပါတယ်။ သင်္ဘောတည်ဆောက်ခကုန်ကျငွေ ကျပ် သိန်း ၆၀၀ ကျော်အသုံးပြုထားကာ အဲဒီလို တည်ဆောက်ရေးတွေအတွက် ပစ္စည်းတန်ဖိုးမပါ လက်ခတင် ကျပ်သိန်း ၃၅၀ ပေးရတယ်လို့ တည်ဆောက်ရေးမှာ ပါဝင်နေသူတစ်ဦးက ပြောပါတယ်။ 

ဒါ့အပြင် တနင်္သာရီတိုင်းကိုယ်စားပြု အလှပြယာဉ်မှာ ပါရှိတဲ့ ထားဝယ်အိမ် အလှပြယာဉ်အတွက် ထားဝယ်က ပန်းပုဆရာတွေကို ခေါ်ယူအသုံးပြုထားပြီး တနင်္သာရီတိုင်းကိုယ်စားပြု အလှပြယာဉ်တွေ တည်ဆောက်ဖို့အတွက် မြိတ်မြို့က တည်ဆောက်ရေး ကျွမ်းကျင်သူတစ်ဦးဖြစ်သူကိုပါ ဦးဆောင်ခေါ်ယူထားတယ်လို့ ဆိုပါတယ်။ 

အဆိုပါ ဗိုလ်ရှုခံသဘင်ပွဲ ပြီးဆုံးသွားရင်တော့ အဆိုပါ အလှပြငါးဖမ်းလှေကို သူဌေးကြီး ဦးလှသန်းရဲ့သား ပိုင်ဆိုင်တဲ့ မြိတ်မြို့ကမ်းနားလမ်းမှာရှိတဲ့ အရက် Bar ဆိုင် အရှေ့မှာ အလှပြထားမယ်လို့ သိရပါတယ်။ 

မြိတ်မြို့က ရေလုပ်ငန်းရှင်သူဌေးဦးဆောင်ပြီး တနင်္သာရီတိုင်းကိုယ်စားပြု ဗိုလ်ရှုခံ အလှပြယာဉ်တွေအတွက် ကုန်ကျခံနေမှုအပေါ် မြို့ခံတွေအနေနဲ့လည်း ဝေဖန်မှုတွေရှိနေတာပါ။ 

ပြီးခဲ့တဲ့ရက်ပိုင်းက အာဏာသိမ်းစစ်ခေါင်းဆောင်ရဲ့ တနင်္သာရီတိုင်း ခရီးစဉ်မှာ အဆိုပါ မြိတ်အများပိုင်ကော်ပိုရေးရှင်းအတွက် ဒေါ်လာ သန်း ၃၀၀ ကျော်ရင်းနှီးမြှုပ်နှံမယ့် စီမံကိန်းကို စစ်ခေါင်းဆောင်ကိုယ်တိုင် အတည်ပြုပေးခဲ့သလို နိုင်ငံတော်ပိုင်ဖြစ်တဲ့ မြန်မာ့ဆိပ်ကမ်းအာဏာပိုင်မြေ ဧက ၇၀၀ ကျော်ကိုလည်း  အဆိုပါ ကုမ္ပဏီအတွက် လုပ်ကိုင်ခွင့် ပေးအပ်ခဲ့တာရှိတယ်လို့လဲ အဆိုပါကုမ္ပဏီနဲ့ နီးစပ်သူတွေက ပြောပါတယ်။

အဆိုပါကိစ္စတွေနဲ့ ပတ်သက်ပြီး သက်ဆိုင်ရာ ကုမ္ပဏီဘက်ကိုတော့ ဆက်သွယ်မေးမြန်းအတည်ပြုနိုင်ခြင်း မရှိသေးပါဘူး။

အာဏာသိမ်း စစ်ခေါင်းဆောင် မင်းအောင်လှိုင်က ၇၅ နှစ်မြောက် စိန်ရတုနေ့ အခမ်းအနားမှာ ဗိုလ်ရှုခံဖို့စီစဉ်နေပြီး ပြည်နယ်နဲ့တိုင်းအလိုက် သူ့ကို ချီတက်အလေးပြုမယ့် အလှပြယာဉ် ကား အစီး ၅၀ လောက် နေပြည်တော်မှာတည်ဆောက်နေကာ ကျပ်ငွေ သိန်းပေါင်း ၉ သောင်းကျော် အသုံးပြုသွားမယ်လို့  သိရပါတယ်။

ဒါ့ပြင် ဗိုလ်ရှုခံပွဲမှာ အာဏာသိုမ်းစစ်ခေါင်းဆောင်ကို အလေးပြုဖို့အတွက် NON-CDM ဝန်ထမ်းတွေကို လေ့ကျင့်ပေးနေတယ်လို့လည်း သတင်းတွေထွက်ပေါ်နေပါတယ်။