ဧရာဝတီတိုင်း၊ မြောင်းမြမြို့နယ်မှာ ဩဂုတ် ၁၉ ရက်နေ့ညက ခရိုင်ထွေအုပ်ရုံးအနီးမှာ ဗုံး ၂ လုံးပေါက်ကွဲခဲ့တယ်လို့ ဒေသခံတွေက ပြောပါတယ်။

မြောင်းမြမြို့ အမှတ် ၄ ရက်ကွက်မှာရှိတဲ့ ခရိုင်အထွေထွေအုပ်ချုပ်ရေးရုံးရှေ့မှာ ည ၈ နာရီခွဲလောက် ဗုံး ၁ လုံးစတင်ပေါက်ကွဲခဲ့ပြီး နောက်တလုံးက ဘုရားချောင်းရပ်ကွက်က စသုံးလုံးရုံးရှေ့မှာ ပေါက်ကွဲခဲ့တာလို့ ဆိုပါတယ်။

“ညကဖြစ်သွားတာက ၂ နေရာပေါ့။ မြို့လယ်ခေါင်က ထွေအုပ်ရုံးရှေ့နဲ့ စသုံးလုံးရုံးရှေ့တွေ ပေါက်တာ၊ အထိခိုက်တော့ မသိဘူး။ ရုံးဆင်းချိန်ဆိုတော့ ထိတာမရှိလောက်ဘူး” လို့ ဒေသခံတဦးက ပြောပါတယ်။

မြောင်းမြမြို့မှာ ဗုံးပေါက်ကွဲမှုတွေ မရှိတော့တာ လပိုင်းအကြာမှာ ခုလိုမျိုး စစ်ကောင်စီနဲ့ သက်ဆိုင်တဲ့နေရာတွေကို တိုက်ခိုက်တာတွေ လုပ်လာပေမယ့် ဘယ်အဖွဲ့အစည်းက လုပ်တယ်ဆိုတာတော့ မသိရသေးဘူးလို့ ဆိုပါတယ်။

ဧရာဝတီတိုင်းမှာ စစ်ဒေသခွဲကွပ်ကဲမှုအဖွဲ့ ဖွဲ့စည်းပြီးနောက်ပိုင်း စစ်ကောင်စီတပ်သားတွေက လုံခြုံရေးတင်းကြပ်လာသလို နေရာအနှံ့ စစ်ဆေးတာတွေရှိခဲ့ပေမယ့် ဩဂုတ်လထဲမှာတော့ ဧရာဝတီတိုင်းအတွင်း ပထမဆုံး စစ်ကောင်စီနဲ့သက်ဆိုင်တဲ့နေရာ ဖောက်ခွဲတိုက်ခိုက်ခံရတာလို့ သိရပါတယ်။

မန္တလေးတိုင်း မိုးကုတ်မြို့အရှေ့ပိုင်း ဘီးတောင်ရပ်ကွက်က နဂါးရုံဘုရားနားနဲ့ အချုပ်ထောင်နားမှာ ဇွန် ၂၆ ရက် ညနေ ၆ နာရီလောက်က ဗုံး ၂ လုံး တပြိုင်တည်းပေါက်ကွဲမှု ဖြစ်ပွားခဲ့တယ်လို့ ဒေသခံတွေက ပြောပါတယ်။  

ပေါက်ပွဲမှုဖြစ်ပွားပြီးနောက် အချုပ်ထောင် အနီးအနားနဲ့ တခြားရပ်ကွက်တွေအပြင် အနောက်ပိုင်းရဲစခန်းနားမှာ စစ်ကောင်စီတပ်သားတွေက ည ၈ နာရီလောက် သေနတ်နဲ့ ရမ်းသမ်း ပစ်ခတ်ခဲ့ကြတယ်လို့ ဒေသခံတဦးက ပြောပါတယ်။ 

အဲဒီလိုသေနတ်ပစ်ခတ်သံတွေက အပြန်အလှန်ပစ်ခတ်တာမျိုးမဟုတ်ပဲ ရမ်းသမ်းပစ်ခတ်နေတာ ဖြစ်တဲ့အတွက် ရပ်ကွက်နေပြည်သူတွေက နေအိမ်ထဲမှာပဲ ပုန်းအောင်းနေရတယ်လို့ ဆိုပါတယ်။  

ဇွန် ၂၇ ရက် ဒီနေ့မှာလည်း စစ်ကောင်စီက မြို့ထဲမှာ လှည့်လည်စစ်ဆေးနေသလို ဒေသခံတွေလည်း အသွားအလာမရှိဘဲ လူသူကင်းမဲ့နေတယ်လို့ သိရပါတယ်။  

အခုပေါက်ကွဲမှုတွေနဲ့ ပတ်သက်လို့ ထိခိုက်သေဆုံးမှုကိုတော့ အသေးစိတ်မသိရှိရသေးသလို ဘယ်အဖွဲ့အစည်းက ဆောင်ရွက်တယ်ဆိုတာကိုလည်း ထုတ်ပြန်ထားတာ မရှိသေးပါဘူး။