ဗြိတိန်ဘုရင် ချားလ်စ်ဘုရင်နန်းတက်ပွဲမတိုင်ခင် ရက်ပိုင်းအလို မေလ ၂ ရက်က ဘက်ကင်ဟမ်နန်းတော် အပြင်ဘက်မှာ သေနတ်ကျည်တောင့်တွေလို့ သံသယရှိတဲ့ ပစ္စည်းတွေကို ပစ်ပေါက်ခဲ့တဲ့ အမျိုးသားတယောက်ကို ဖမ်းဆီးခဲ့ပြီး အရာရှိတွေဟာ အဲဒီဧရိယာအတွင်းမှာပဲ ထိန်းချုပ်ဆောင်ရွက်တဲ့ ဖောက်ခွဲမှုကို ပြုလုပ်ခဲ့ပါတယ်။

အဲဒီအမျိုးသားဟာ သူ့ကို ရဲတွေမဖမ်းခင် ဂရင်းနစ်စံတော်ချိန် ၁၈ နာရီလောက်က ဘက်ကင်ဟမ်နန်းတော် ဂိတ်တံခါးတွေနားကို ချဉ်းကပ်လာပြီး သေနတ်ကျည်ကတ်တွေလို့ သံသယရှိတဲ့ ပစ္စည်းတွေကို နန်းတော်မြေနေရာထဲ ပစ်ချခဲ့ကြောင်း ရဲတပ်ဖွဲ့က ပြောပါတယ်။

သူ့ကိုရှာဖွေရာ ဓားတလက် တွေ့ရှိခဲ့ပြီးနောက်မှာ ထိခိုက်ဒဏ်ရာရစေတဲ့ တိုက်ခိုက်ရေးလက်နက် လက်ဝယ်ထားရှိမှု သံသယနဲ့ ဖမ်းဆီးထားကြောင်း လန်ဒန်မြို့တော် ရဲတပ်ဖွဲ့က နောက်ဆုံးထုတ်ပြန်ချက်တခုမှာ ပြောပါတယ်။

အင်္ဂါနေ့ အခင်းဖြစ်ပွားချိန်မှာ ချားလ်စ်ဘုရင်နဲ့ ကြင်ယာတော် ကမီလာတို့ဟာ နန်းတော်မှာ မရှိခဲ့ကြောင်း ဘက်ကင်ဟမ်နန်းတော်က ပြောပါတယ်။

ရဲတပ်ဖွဲ့ကတော့ အဲဒီကိစ္စကို အကြမ်းဖက်မှုနဲ့ ဆက်နွှယ်မှုအဖြစ် လောလောဆယ် သဘောထားခြင်း မရှိဘူးလို့ ထုတ်ပြန်ချက်မှာ ဖော်ပြထားပါတယ်။

ရဲတပ်ဖွဲ့နဲ့ လုံခြုံရေးအဖွဲ့တွေဟာ စနေနေ့မှာ ကမ္ဘာတဝန်းက နိုင်ငံ့ခေါင်းဆောင်တွေ တက်ရောက်ကြမယ့် ချားလ်စ်ဘုရင်ရဲ့ နန်းတက်ပွဲအတွက် ပြင်ဆင်နေကြပြီး လန်ဒန်မြို့ရဲ့ လမ်းမတွေပေါ်မှာ လူအုပ်ကြီးတွေ တန်းစီစောင့်ကြည့်နေကြမယ်လို့လည်း မျှော်လင့်ထားပါတယ်။

ဗြိတိန်ဘုရင်သစ် ချားလ်စ်ရဲ့ နန်းတက်ပွဲကို လာမယ့် ၂၀၂၃ ခုနှစ်၊ မေလ ၆ ရက်၊ စနေနေ့မှာ လန်ဒန်ရှိ အင်္ဂလန်ဘုရင်တွေ အစဉ်အဆက် ထီးနန်းဆက်ခံ သရဖူဆောင်းတဲ့နေရာဖြစ်တဲ့ ဝက်စ်မင်စတာအက်ဘေးဘုရားကျောင်းကြီးမှာ ကျင်းမယ်လို့ ဘက်ကင်ဟမ်နန်းတော်က အောက်တိုဘာ ၁၁ ရက်မှာ ကြေညာပါတယ်။

Canterbury ဂိုဏ်းချုပ်ကနေ ကြီးမှူးကျင်းပပေးမှာဖြစ်တဲ့ ထီးနန်းဆက်ခံပွဲမှာ လွန်ခဲ့တဲ့ နှစ်ပေါင်း ၁,၀၀၀ ကျော်က ဘိသိက်ခံဘုရင်တွေ ဘိသိက်ခံရာမှာ အသုံးပြုတဲ့ ရိုးရာအစဉ်အလာ ထုံးတမ်းအတိုင်း အခမ်းအနားကျင်းပပြီး သရဖူအပ်နှင်းမယ်လို့ သိရပါတယ်။

အခမ်းအနားမှာ တတိယမြောက်ချားလ်စ်ဘုရင်မင်းရဲ့ နံဘေးမှာ ကြင်ယာတော် မိဖုရားလည်း အတူရှိနေမယ်လို့ ဆိုပါတယ်။

နန်းတက်ပွဲဟာ ဒီနေ့ခေတ် ရှင်ဘုရင်ရဲ့ အခန်းကဏ္ဍကို ထင်ဟပ်စေပြီး ကာလရှည်ကြာ ခိုင်မာမြဲမြံနေတဲ့ ရိုးရာထုံးတမ်းဓလေ့တွေနဲ့ အစဉ်အလာ အခမ်းအနားတွေနဲ့အညီ အနာဂတ်ကို ဦးတည်မှာဖြစ်ကြောင်းလည်း နန်းတော်ရဲ့ ထုတ်ပြန်ချက်မှာ ဖော်ပြထားပါတယ်။

တတိယမြောက် ချားလ်စ်ဘုရင်ဟာ အင်္ဂလန်ထီးနန်း ရာဇဝင်မှာ ၄၁ ယောက်မြောက် ဘုရင်ဖြစ်ပြီး သူဟာ သရဖူဆောင်းရမယ့် အသက်အကြီးဆုံးဘုရင် ဖြစ်လာမှာပါ။

၁၉၅၃ ခုနှစ် ဇွန်လ ၂ ရက်က သူ့မိခင် အဲလိဇဘက်ဘုရင်မကြီးရဲ့ နန်းတက်ပွဲ ကျင်းပခဲ့တုန်းက ခင်ပွန်းဖြစ်သူ ဖိလစ်မင်းသားကြီးရဲ့ တွန်းအားပေးမှုအရ ရုပ်မြင်သံကြားကနေ ပထမဆုံး ထုတ်လွှင့်ခဲ့ပါတယ်။

ဗြိတိန်မီဒီယာတွေကတော့ ချားလ်စ်ဘုရင်ဟာ တိုင်းပြည်မှာ လူနေမှုစရိတ်တွေ အကျပ်အတည်းနဲ့ ရင်ဆိုင်နေရချိန်ကို သတိပြုမိပြီး ကြုံကြိုက်လာတဲ့ နန်းတက်ပွဲကာလမှာ ထုံးတမ်းစဉ်လာ ကြီးကျယ်ခမ်းနားမှုတချို့ကို လျှော့ချလိုကြောင်း ဖော်ပြထားကြပါတယ်။