အင်္ဂလန်လက်ရွေးစင်အသင်းမှာ နောက်ခံလူ ဘင်ဝှိုက်ကို မရွေးချယ်ခဲ့တဲ့ နောက်ကွယ်မှာ တစုံတရာ ရှိနေကြောင်း အင်္ဂလန်ဂိုးသမားဟောင်း ဘင်ဖော်စတာက ပြောပါတယ်။
အသက် ၂၅ နှစ်ရှိ ဘင်ဝှိုက်ဟာ အမှတ်ပေးဇယားကို ဦးဆောင်နေတဲ့ အာဆင်နယ်အသင်းရဲ့ ခံစစ်တန်းမှာ အဓိကကစားသမားအဖြစ် ခြေစွမ်းပြသနေသူပါ။
သူဟာ ပြီးခဲ့တဲ့ကမ္ဘာ့ဖလား ယှဉ်ပြိုင်နေစဉ် ကာလအတွင်းမှာ အသင်းလူစာရင်းကနေ နုတ်ထွက်ခဲ့ပြီး လက်ထောက်နည်းပြတဦးနဲ့ ပြဿနာဖြစ်ခဲ့တာကြောင့်လို့ သတင်းထွက်ပေါ်ခဲ့ဖူးပါတယ်။
ဂိုးသမားဟောင်း ဘင်ဖော်စတာကတော့ ခြေစွမ်းပြနေတဲ့ ဘင်ဝှိုက်ကို မရွေးချယ်ခဲ့တဲ့ နောက်ကွယ်မှာ တစုံတရာရှိနေကြောင်း၊ ကမ္ဘာ့ဖလားမှာ ဘယ်လိုပဲဖြစ်ခဲ့သည်ဖြစ်စေ ခြေစွမ်းပြနေတဲ့ ကစားသမားကို ရွေးချယ်သင့်ကြောင်း ဘင်ဖော်စတာက ပြောပါတယ်။
ဒါ့အပြင် ပုံမှန်ပွဲထွက်ခွင့်မရခဲ့တဲ့ မန်ယူနောက်ခံလူ မက်ဂွဲယားကို ရွေးချယ်ခဲ့တာဟာ မှန်ကန်တဲ့ လုပ်ဆောင်ချက် မဟုတ်ကြောင်း ဖော်စတာက သုံးသပ်ခဲ့ပါတယ်။
နည်းပြဆောက်ဂိတ်ကတော့ ဘင်ဝှိုက်ကို မရွေးချယ်ခဲ့တာဟာ ညာနောက်ခံလူနေရာမှာ သုံးဦးအထိ ရှိနေတာကြောင့်ဖြစ်ကြောင်း ဖြေရှင်းထားပါတယ်။
ပြီးခဲ့တဲ့ ကမ္ဘာ့ဖလားကွာတားဖိုင်နယ်ပွဲစဉ်မှာ ပြင်သစ်အသင်းရဲ့ ဦးဆောင်ဂိုးကို ခွင့်ပြုခဲ့ရတာနဲ့ ပတ်သက်လို့ အင်္ဂလန်ဂိုးသမား ပစ်ဖို့ဒ်ရဲ့ အထနှေးမှုကို ဝါရင့်ဂိုးသမားဟောင်း ဘင်ဖော်စတာက ဝေဖန်သွားပါတယ်။
ပစ်ဖို့ဒ်ဟာ ပြင်သစ်ကွင်းလယ်လူ ချူအာမန်နီရဲ့ အဝေးကန်ချက်နဲ့ သွင်းဂိုးကို မကာကွယ်နိုင်ဘဲ ဦးဆောင်ဂိုးခွင့်ပြုပေးလိုက်ရတာပါ။
အဲဒီဂိုးနဲ့ ပတ်သက်ပြီး ဂိုးသမား ပစ်ဖို့ဒ်ရဲ့ နှေးကွေးလွန်းတဲ့တုံ့ပြန်မှုကြောင့်လို့ ဘင်ဖော်စတာက အပြစ်တင်ခဲ့တာပါ။
“ပရီးမီးယားလိဂ်က ဂိုးသမားအများစုဆိုရင်တောင် အဲဒီလိုအလုံးကို ကာကွယ်နိုင်ပါလိမ့်မယ်” လို့ အင်္ဂလန်ဂိုးသမားဟောင်း ဘင်ဖော်စတာကဝေဖန်ခဲ့ပါတယ်။
အဲဗာတန်ဂိုးသမားဟာ ကမ္ဘာ့ဖလား ပွဲစဉ် ၅ ပွဲမှာ ပေးဂိုး ၄ ဂိုးပေးခဲ့ရပြီး ၇ ကြိမ်ပဲ ကာကွယ်မှု ပြုလုပ်နိုင်ခဲ့တာဖြစ်ပါတယ်။
