သတ်မှတ်ကာလအတွင်း ပို့ကုန်ရငွေ ဘဏ်စာရင်းထဲ ထည့်သွင်းရမယ့် အမိန့်ညွှန်ကြားချက်ကို မလိုက်နာတဲ့ ကုမ္ပဏီပေါင်း ၁၇၇ ခုကို ပို့ကုန်သွင်းကုန်လုပ်ငန်းရှင် မှတ်ပုံတင်လက်မှတ်ပိတ်သိမ်းပြီး အရေးယူထားတယ်လို့ စစ်ကောင်စီက ကြေညာပါတယ်။

သတ်မှတ်ကာလအတွင်း ပို့ကုန်ရငွေ မထည့်သွင်းတဲ့ ကုမ္ပဏီတွေကို မှတ်ပုံတင်လက်မှတ် ပိတ်သိမ်းတဲ့အထိ အရေးယူမယ်လို့ ဧပြီ ၂၇ ရက်နေ့ ရက်စွဲနဲ့ စစ်ကောင်စီ လက်အောက်ခံ စီးပွားရေးနဲ့ ကူးသန်းရောင်းဝယ်ရေးဝန်ကြီးဌာနက သတိပေးစာ ထုတ်ပြန်ထားတာပါ။

ပ်ို့ကုန်လုပ်ငန်းတွေက  ပို့ကုန်ရငွေကို တင်ပို့တဲ့နေ့ကနေ ၃ လအတွင်း ပြည်တွင်းက ဘဏ်စာရင်းကို နိုင်ငံခြားသုံးငွေနဲ့ မပျက်မကွက် ထည့်သွင်းရမယ်လို့ စစ်ကောင်စီ ဗဟိုဘဏ်က ညွှန်ကြားထားတာပါ။

ပို့ကုန်ကနေရတဲ့ နိုင်ငံခြားသုံးငွေနဲ့တွေကို အလုပ်လုပ်ရက် တရက်အတွင်းမှာ သတ်မှတ်ငွေလဲနှုန်းနဲ့ လဲလှယ်ရမယ်လို့လည်း စစ်ကောင်စီကကြေညာထားပြီး နောက်ပိုင်းမှာတော့ ပြည်ပကုမ္ပဏီတွေ၊ သံရုံးတွေနဲ့ နယ်စပ်ကုန်သွယ်မှုတွေကို ကင်းလွတ်ခွင့်တွေ ထုတ်ပြန်ခဲ့ပါတယ်။

မြန်မာပြည်တွင်းနေထိုင်သူတွေရဲ့ ဘဏ်စာရင်းတွေကိုဝင်ရောက်လာတဲ့ နိုင်ငံခြားငွေတွေကို အမေရိကန် တဒေါ်လာလျှင်  မြန်မာကျပ် ၁၈၅၀ နှုန်းနဲ့ ၂၄ နာရီအတွင်း လဲလှယ်ရမယ်လို့ စစ်ကောင်စီလက်အောက်ခံ ဗဟိုဘဏ်က ညွှန်ကြားပါတယ်။

ပြည်တွင်းမှာ နေထိုင်သူတွေရဲ့ ပြည်ပကနိုင်ငံခြားသုံးငွေနဲ့ရရှိတဲ့ ဝင်ငွေတွေကို မြန်မာနိုင်ငံထဲ ပြန်လည်ပေးပို့ပြီး နိုင်ငံခြားသုံးငွေ ရောင်းဝယ်ဖောက်ကားတဲ့လုပ်ငန်း လိုင်စင်ရဘဏ်တွေမှာ နိုင်ငံခြားငွေစာရင်းဖွင့်ပြီး အလုပ်လုပ်ရက် ၁ ရက်အတွင်း မြန်မာကျပ်ငွေဖြင့် လဲလှယ်ရောင်းချရမယ်လို့ ညွှန်ကြားချက်ထုတ်လိုက်တာပါ။

ဒီညွှန်ကြားချက်အရ ဘဏ်တွေအနေနဲ့ စာရင်းကို ဝင်ရောက်လာတဲ့ ကုန်သွယ်မှုကရတဲ့ငွေရော ကုန်သွယ်မှုမဟုတ်တဲ့ ရငွေတွေကိုပါ စာရင်းကိုဝင်ရောက်ပြီးတဲ့နေ့က အလုပ်လုပ်ရက် တရက်အတွင်း မြန်မာကျပ်ငွေနဲ့ လဲလှယ်ပြီး အဲဒီနိုင်ငံခြားငွေရသူဖွင့်ထားတဲ့ ကျပ်ငွေ စာရင်းကို ထည့်ပေးရမယ်လို့ ဆိုပါတယ်။

အမေရိကန်တဒေါ်လာကို ကျပ် ၁၈၅၀ နှုန်းဖြစ်ပြီး တခြားငွေကြေးတွေအတွက်ကိုလည်း ဒီနှုန်းကို အခြေခံပြီး ဗဟိုဘဏ်က တွက်ချက်ထားတဲ့နှုန်းနဲ့ လဲပေးရမယ်လို့ ဆိုပါတယ်။

ဒီမတိုင်ခင်က နိုင်ငံခြားငွေစာရင်းတွေထဲမှာရှိနေတဲ့ နိုင်ငံခြားငွေတွေကိုလည်း မြန်မာကျပ်ငွေနဲ့ လဲပစ်ဖို့ ညွှန်ကြားထားပါတယ်။

ပြီးတော့ ဧပြီ ၄ ရက် ဒီနေ့က စလို့ နိုင်ငံခြားသုံးငွေတွေ ပြည်ပကို လွှဲဖို့အတွက်  နိုင်ငံခြားသုံးငွေ ကြီးကြပ်မှုကော်မတီရဲ့ ခွင့်ပြုချက်နဲ့ပဲ ဆောင်ရွက်ရမယ်လို့ ဆိုပါတယ်။

နိုင်ငံခြားငွေကို ကျပ်ငွေနဲ့ လဲလှယ်တဲ့အခါ ကင်းလွတ်ခွင့်ပြုမယ့်ကိစ္စရပ်တွေ ပေါ်ပေါက်လာရင်လည်း သီးခြားထုတ်ပြန်မယ်လို့ဆိုပြီး ဒါတွေကို မလိုက်နာရင် အရေးယူမယ်လို့လည်း ဆိုပါတယ်။