ရုရှားနိုင်ငံက ဝဂ္ဂနာ ကြေးစားစစ်တပ်ရဲ့ အကြီးအကဲ ယက်ဗ်ဂျေညီ ပရီဂေါ့ရှင်က သူ့ရဲ့ တိုက်ခိုက်ရေးသမားတွေဟာ ယူကရိန်းနိုင်ငံ ဘတ်ခ်မွတ်မြို့ကို သိမ်းထားနိုင်ပြီး ယူကရိန်းစစ်တပ်က ထိန်းချုပ်နိုင်တဲ့ ဧရိယာဟာ ဘတ်ခ်မွတ်မြို့ရဲ့ ၂ ဒသမ ၃၇ စတုရန်းကီလိုမီတာသာ ကျန်တော့တယ်လို့ မေ ၈ ရက်မှာ ကြေညာချက်ထုတ်ပြန်ခဲ့ပါတယ်။

ရုရှားကာကွယ်ရေးဝန်ကြီးဌာနက ပေးမယ်လို့ ကတိပြုထားတဲ့ လက်နက်ခဲယမ်းတွေကို သူ့ရဲ့ ချေမှုန်းရေးတပ်ဖွဲ့တွေက စောင့်ဆိုင်းနေရတုန်းပဲလို့လည်း ပရီဂေါ့ရှင်က ပြောပါတယ်။

ကြီးမားတဲ့ ဆုံးရှုံးမှုတွေနဲ့ ခဲယမ်းမီးကျောက်တွေ မလုံလောက်မှုကြောင့် သူ့တပ်တွေဟာ မေ ၁၀ ရက်မှာ ဘတ်ခ်မွတ်မြို့ကနေ နုတ်ထွက်ပြီး ယူကရိန်းပဋိပက္ခရဲ့ အရှည်ကြာဆုံးနဲ့ သွေးထွက်သံယိုအများဆုံး တိုက်ပွဲမှာ ပါဝင်ပတ်သက်မှုကို အဆုံးသတ်မယ်လို့လည်း ပရီဂေါ့ရှင်က မေ ၅ ရက်မှာ ကြေညာခဲ့ပါတယ်။

ဘတ်ခ်မွတ်မြို့သိမ်းတိုက်ပွဲဟာ ယူကရိန်းနဲ့ ရုရှား နှစ်နိုင်ငံလုံးအတွက် အရေးပါပါတယ်။ ယူကရိန်းဟာ ပုံမှန်ရုရှားတပ်တွေနဲ့ ဝဂ္ဂနာ ကြေးစားစစ်တပ်တို့ကို လပေါင်းများစွာ အပြင်းအထန် တိုက်ခိုက်ပြီးတဲ့နောက် မြို့ရဲ့ တချို့နေရာတွေကို ဆက်လက်ထိန်းသိမ်းထားဆဲပါ။

ဝဂ္ဂနာဟာ ဘတ်ခ်မွတ်မြို့ကို သိမ်းပိုက်ဖို့ ရည်ရွယ်တဲ့ ရုရှားထိုးစစ်ရဲ့ မောင်းနှင်အားလို့ အကဲခတ်တွေက ယူဆကြပါတယ်။ မြို့တွင်းတိုက်ပွဲဟာ ၂၀၂၂ ခုနှစ် ဩဂုတ်လကတည်းက ပြင်းထန်လာခဲ့ပါတယ်။

ယူကရိန်းစစ်သားတွေဟာ ဘတ်ခ်မွတ်မြို့  မြောက်ဘက်ဆီ ချီတက်ဖို့ ကြိုးပမ်းနေတဲ့ ရုရှားစစ်တပ်တွေကို  ဆိုဗီယက်လုပ် D-30 ဟောင်ဝစ်ဇာ လက်နက်ကြီးနဲ့  မေလ ၆ရက်က ပစ်ခတ်ခဲ့ပါတယ်။

ဘတ်ခ်မွတ်မြို့ မြောက်ဘက် ကီလိုမီတာ ၄၀ အကွာက စပီးယန်းရွာဆီကို ဦးတည်ပြီး ရုရှားတပ်ဖွဲ့နှစ်ဖွဲ့အထိ ချီတက်ခဲ့ကြတာလို့ အမြောက်တပ်မှူး ဗလာဒီစလာ့ဗ် ဟာမန် ကိဗ်စကီ က ဆိုပါတယ်။

သူတို့ချီတက်နိုင်အောင် ပံ့ပိုးပေးနေတဲ့ စက်သေနတ်တစ်လက်ကို  ဖျက်ဆီးခဲ့တယ်လို့ အီဟိုး ဆာဗီယက်ခ်က ပြောပါတယ်။ 

ယူကရိန်းအရှေ့ပိုင်း ဘတ်ခ်မွတ်မြို့ကနေ ဆုတ်ခွာဖို့ မေလ ၅ ရက် မှာ ရုရှားရဲ့ အဓိက ကြေးစား စစ်အုပ်စုကအစီအစဉ်ကို ကြေညာခဲ့ပေမဲ့ယူကရိန်းအစိုးရကတော့ သူ့ရဲ့ တိုက်ခိုက်ရေးသမားတွေက လာမယ့်သီတင်းပတ်မှာ ရုရှားနိုင်ငံက  ဒုတိယကမ္ဘာစစ် အောင်ပွဲနေ့ နှစ်ပတ်လည်နေ့ မကျရောက်မီ မြို့ကို သိမ်းပိုက်ဖို့ အင်အား တိုးမြှင့်ထားတယ်လို့ ယူကရိန်းမြို့တော် ကိယက်ဗ်က ပြောပါတယ်။