ထိုင်းတောင်ပိုင်း ဖူးကက်ခရိုင်၊ ဖူးကက်-ဖတ်ထလုန်းသွား ကားလမ်းပေါ်မှာ ဖေဖော်ဝါရီ ၁၀ ရက် ဒီနေ့မနက်က ခရီးသည်တင် ဘတ်စ်ကားတစီးပေါ် ပစ်ခတ်မှုဖြစ်ပြီး ၂ ဦး ဒဏ်ရာရ၊ ၁ ဦး သေဆုံးသွားတယ်လို့ ထိုင်းသတင်းတွေမှာ ဖော်ပြပါတယ်။

ဒီနေ့မနက် ၇ နာရီလောက်က ဖူးကက်မြို့ ကော်ကယောက်ရပ်ကွက် ထိပ်ကဆစ်တယား လမ်းမကြီးပေါ်မှာ ဘတ်စ်ကားတစီးပေါ် ပစ်ခတ်မှုရှိကြောင်း သတင်းပေးချက်ရတဲ့အတွက် သွားရောက်စစ်ဆေးခဲ့ကြောင်း၊ အခင်းဖြစ်တဲ့နေရာမှာ ဘတ်စ်ကားတစီး ရပ်ထားပြီး အထဲမှာ သေနတ်သမားက ခုံတွေကြားထဲ ပုန်းနေတာလို့ ဖူးကက်နယ်မြေရဲတပ်ဖွဲ့က ပြောပါတယ်။

ကားသမားရဲ့ ပြောပြချက်အရ သူဟာ ဒီနေ့မနက်က ခရီးသည် ၉ ဦး တင်ဆောင်ပြီး ကားဂိတ်ကနေ မောင်းထွက်လာကြောင်း၊ ၁ ကီလိုမီတာလောက် အကွာအဝေးမှာ အမျိုးသမီး ၁ ဦးက သူ သေနတ်ပစ်ခံရကြောင်း၊ ကားရပ်ဖို့ အော်ပြောကြောင်း၊ သူလည်း နောက်ကြည့်မှန်ကနေ ကြည့်ရာမှာ အလယ်မှာထိုင်နေတဲ့ ခရီးသည်က အနောက်ဘက်လျှောက်သွားတာ မြင်ရကြောင်း၊ သူ့ကြည့်တာ ဘာမှမဖြစ်သလို ခပ်တည်တည်နဲ့ ပြန်ထိုင်နေပြီး နောက်တချက် ပစ်ခတ်ရာ ခရီးသည် ၁ ဦးကို ထပ်ထိမှန်ပြီး သူလည်း ကားကို လမ်းဘေးထိုးချပြီး ရပ်လိုက်တာလို့ ဆိုပါတယ်။

ကားရပ်တော့ ခရီးသည်တွေ ဆင်းပြေးပြီး သေနတ်သမားကတော့ ကားထဲမှာရှိနေတယ်လို့ ဆိုပါတယ်။

ရဲတွေရောက်လာတော့ သေနတ်ဒဏ်ရာရသူ အမျိုးသား ၁ ဦးနဲ့ အမျိုးသမီး ၁ ဦးကို ဆေးရုံပို့ပေးလိုက်ပြီး အနီးနားတဝိုက်ကလူတွေ အန္တရာယ်ရှိမှာစိုးလို့ ၁ ကီလိုအကွာထိ စောင့်ကြပ်ထားလိုက်ကာ ကားထဲက သေနတ်သမားကို လက်နက်ချဖို့ ချော့မော့ ပြောဆိုခဲ့ကြပါတယ်။

သေနတ်သမားဟာ အသက် ၂၄ နှစ်ရွယ်ရှိ နိုင်းနားဝင်း ချွေ့ကလိန့်ဆိုသူ စစ်သားဟောင်းတဦးလို့ သိရတာကြောင့် သက်ဆိုင်ရာ ဆွေမျိုးတွေပါ ခေါ်ပြီး လာရောက်ဖျောင်းဖျ ချော့မော့ခဲ့ပါတယ်။

၄ နာရီကြာ ညှိနှိုင်းပေမဲ့ မအောင်မြင်ဘဲ ရဲတွေက မျက်ရည်ယိုဂက်စ်ကို ကားထဲ ပစ်ထည့်ခဲ့ကြောင်း၊ မနက် ၁၁ နာရီလောက်မှာ တုံ့ပြန်သံမကြားရတော့ တာဝန်ရှိသူတွေက ကားပေါ်တက်ကြည့်ရာမှာ သေနတ်သမားက သူ့ကိုယ်သူပြန်ပစ်ပြီး သွေးအိုင်ထဲ လဲကျ သေဆုံးနေတာကို တွေ့ရတယ်လို့ ဆိုပါတယ်။

ဆွေမျိုးတွေပြောပြချက်အရ နိုင်းနားဝင်းဟာ အဘွားနဲ့အတူနေပြီး အရင်က ထိုင်းတပ်မတော်ထဲ ဝင်ခဲ့ဖူးကြောင်း၊ သူ့မှာ စိတ်ပိုင်းဆိုင်ရာ ပြဿနာရှိပြီး စိတ္တဇဆေးရုံလည်း တက်ခဲ့ဖူးကြောင်း၊ ဆေးရုံက ဆင်းပြီးတဲ့နောက် ဆေးကို ပုံမှန်မသောက်တာ ၂ လရှိပြီလို့ ဆိုပါတယ်။

အလောင်းဘေးမှာတော့ စိတ်မပူနဲ့၊ ကောင်းတဲ့ဘဝသစ်ကိုသွားမယ်၊ အိမ်ကိုတော့ ပြန်မလာတော့ဘူးလို့ ရေးထားတဲ့ စာတစောင်ကို တွေ့ရတာလို့ ဆိုပါတယ်။

ပါကစ္စတန်နိုင်ငံတောင်ပိုင်း ဘလူချစ္စတန်ပြည်နယ်မှာ ဇန်နဝါရီ ၂၉ ရက်က ဘတ်စ်ကားတစီး လျှိုမြောင်တခုထဲကို ထိုးကျမီးလောင်ခဲ့တာကြောင့် လူအယောက် ၄၀ နဲ့အထက် သေဆုံးခဲ့ရတယ်လို့ အာဏာပိုင်တွေက ပြောပါတယ်။

ဒီအပျက်အစီးတွေကြားထဲက ရုပ်အလောင်း ၄၁ လောင်း ပြန်ရခဲ့ပေမဲ့ တချို့ကတော့ မမှတ်မိလောက်အောင်ကို မီးလောင်ကျွမ်းသွားတယ်လို့ ခရိုင်ရဲအရာရှိတဦးဖြစ်သူ အစ္စရာ အူမာရာနီက ရိုက်တာသတင်းဌာနကို ပြောပါတယ်။

အကူအညီပေးရေးအဖွဲ့ အက်ဒ်ဟီဖောင်ဒေးရှင်းနဲ့ အရေးပေါ်တုံ့ပြန်မှုအဖွဲ့အစည်းက မျှဝေထားတဲ့ ဗီဒီယိုမှတ်တမ်းထဲမှာတော့ာ ဒါဇင်နဲ့ချီတဲ့လူတွေကို အပျက်အစီးပုံတွေထဲက သယ်ထုတ်လာကြပြီး လူနာတင်ယာဉ်လုပ်သားတွေကလည်း ရုပ်အလောင်းတခုကို အိတ်ထဲထည့်ကာ မြေပြင်ကမ်းပါးမှာ တန်းစီထားတာကို တွေ့ရပါတယ်။

ခရီးသည် ၄၈ ဦး လိုက်ပါစီးနင်းလာတဲ့ ဒီဘတ်စ်ကားဟာ ဘလူချစ္စတန်ပြည်နယ်ရဲ့ မြို့တော် ကွက်တာကနေ ပါကစ္စတန်တောင်ပိုင်းမြို့တခုဖြစ်တဲ့ ကရာချိကို ဦးတည်မောင်းနှင်လာစဉ် ဒီလိုဖြစ်ရပ်ဆိုးနဲ့ ကြုံတွေ့ခဲ့ရတာလို့ တာဝန်ရှိသူတွေက ပြောပါတယ်။

ဒါပေမဲ့ ဒီလို ယာဉ်မတော်တဆမှုတွေဟာ ပါကစ္စတန်နိုင်ငံမှာ အဖြစ်များလေ့ရှိပြီး ယာဉ်စည်းကမ်းလိုက်နာမှု အားနည်းသလို ကျေးလက်ဒေသအများစုက လမ်းတွေဟာလည်း အခြေအနေ ဆိုးရွားပါတယ်။

ပြီးခဲ့တဲ့နှစ် ဇွန်လတုန်းက ဘလူချစ္စတန်ပြည်နယ်မှာ ခရီးသည်တင် ဗင်ကားတစီး နက်ရှိုင်းတဲ့ လျှိုမြောင်ထဲ ပြုတ်ကျခဲ့တဲ့အတွက် မိသားစုဝင် ၉ ဦး အပါအဝင် လူ ၂၂ ဦးထက်မနည်း သေဆုံးခဲ့ပါတယ်။