အမေရိကန်ပြည်ထောင်စုရှိ ဆီလီကွန်ဗယ်လီဘဏ် (SVB) ပြိုကျမှုကြောင့် ပြင်သစ်နဲ့ ဘယ်လ်ဂျီယံဘဏ်တွေမှာ ကူးစက်ပြိုလဲမယ့်အန္တရာယ် မရှိကြောင်း နှစ်နိုင်ငံ ဘဏ္ဍာရေးဝန်ကြီးတွေက မတ်လ ၁၃ ရက် ဘရပ်ဆဲလ်မှာကျင်းပနေတဲ့ Eurogroup ဘဏ္ဍာရေးဝန်ကြီးများ အစည်းအဝေးမှာ ပြောပါတယ်။
ပြင်သစ်အတွက် အထူးတလည် အန္တရာယ်ရှိတယ်လို့ မမြင်တွေ့ရတာကြောင့် ရင်းနှီးမြှုပ်နှံသူတွေ စိတ်အေးအေးထားကြဖို့လိုပါကြောင်း ပြင်သစ်ဘဏ္ဍာရေးဝန်ကြီး ဘရူနိုလီမဲရ်က အလေးပေး ပြောကြားပါတယ်။
ဘယ်လ်ဂျီယံဘဏ္ဍာရေးဝန်ကြီး ဗင်းဆင့်ဗန်ပေးတိဂမ်ကလည်း အခြေအနေကို နာရီအလိုက် စောင့်ကြည့်အကဲဖြတ်နေကြောင်းနဲ့ အခုလောလောဆယ် ဘယ်လ်ဂျီယံဘဏ်တွေအပေါ် သက်ရောက်မှုရှိတဲ့ ဘာအန္တရာယ် အရိပ်အယောင်မှ မရှိကြောင်း ပြောပါတယ်။
ဥရောပနဲ့ ဘယ်လ်ဂျီယံ စည်းမျဉ်းဘောင်မှာလည်း အခြေအနေ ဘယ်လိုရှိတယ်ဆိုတာ ရှင်းရှင်းလင်းလင်း သိနိုင်တာကြောင့် ဘဏ်လုပ်ငန်းစနစ်ကို ယုံကြည်စိတ်ချဖို့နဲ့ ကူညီပေးကြဖို့လည်း ဆိုပါတယ်။
ပြီးခဲ့တဲ့သီတင်းပတ် နှောင်းပိုင်းက ဆီလီကွန်ဗယ်လီဘဏ် (SVB) နဲ့ Signature Bank တို့ ပြိုကျခဲ့ပြီးနောက်မှာ အမေရိကန် ဘဏ်လုပ်ငန်းစနစ် ဘေးကင်းရေးအတွက် လိုအပ်သမျှ အရေးယူဆောင်ရွက်ပေးမယ်လို့ သမ္မတ ဂျိုးဘိုင်ဒင်က ကတိပြုထားပေမဲ့လည်း တနင်္လာနေ့မှာတော့ ကမ္ဘာတဝန်းရှိ ဘဏ်စတော့တွေ ကျဆင်းခဲ့ပါတယ်။
ဘယ်လ်ဂျီယံနိုင်ငံမှာ အစိုးရဝန်ထမ်းတွေဟာ ဝန်ထမ်းအင်အားနည်းပါး၊ ဘတ်ဂျက် လျှော့ချတာနဲ့ အလုပ်တာဝန် တိုးမြှင့်တာတွေအပေါ် ဆန္ဒပြတဲ့အနေနဲ့ တနိုင်ငံလုံး အတိုင်းအတာနဲ့ သပိတ်မှောက်ကြတာကြောင့် မတ် ၁၀ ရက်က ရထား ၃ စီးမှာ ၁ စင်းသာ ပြေးဆွဲခဲ့ကြောင်း ရထားလမ်းအော်ပရေတာ SNCB/NMBS က ပြောပါတယ်။
သပိတ်မှောက်မှုကြောင့် ဒေသဆိုင်ရာ အများပြည်သူ လမ်းပန်းဆက်သွယ်ရေးကိုလည်း ထိခိုက်ရပြီး မြို့နယ်ခန်းမတွေနဲ့ ပြန်လည်သုံးစွဲရေး ပန်းခြံတွေလို အများသူငှာ ဝန်ဆောင်မှု တချို့အတွက် ဖွင့်ချိန်တွေကို သက်ရောက်မှု ရှိနိုင်ကြောင်း ပြည်တွင်းမီဒီယာတွေက ဖော်ပြပါတယ်။
အမ်စတာဒမ်နဲ့ ဘရပ်ဆဲလ်ကြားရှိ ရထား ၁၂ တွဲကို ဖျက်သိမ်းထားကြောင်း ရထားလမ်းအော်ပရေတာ SNCB/NMBS က ကြေညာချက်နဲ့အတူ နိုင်ငံတကာ ရထားလိုင်းတွေ ကိုလည်း သက်ရောက်သွားပါတယ်။
ဥရောပ ၄ နိုင်ငံက မြို့ကြီး ၁၇ မြို့ကို ပြေးဆွဲနေတဲ့ Thalys ကျည်ဆံရထားလိုင်းရဲ့ ပြောရေးဆိုခွင့်ရှိသူက သူတို့ရဲ့ ရထား ၃ စင်းထဲမှာ ၂ စင်းကိုပဲ ပြေးဆွဲမယ်လို့ ဆိုပါတယ်။
မတ် ၁၀ ရက်က သပိတ်မှောက်ခြင်းဟာ သမဂ္ဂတွေက ဖန်တီးထားတဲ့ ဝန်ထမ်းအင်အား နည်းပါးခြင်းနဲ့ ပြည်သူ့ဝန်ဆောင်မှုတွေကို ရံပုံငွေလျှော့ချခြင်းတို့အပေါ် "အသိပညာပေး လှုပ်ရှားမှု ရက်သတ္တပတ်" ရဲ့ တစိတ်တပိုင်းဖြစ်ပါတယ်။
