အင်္ဂလန်လက်ရွေးစင်အသင်းမှာ တိုက်စစ်မှူး အိုင်ဗန်တိုနေး ပွဲကစားခွင့်ရရှိပါက သူ့ရဲ့အသင်းဟောင်း ပီတာဘရော့အသင်းက ပေါင်တသိန်း ဆုကြေးရရှိမှာ ဖြစ်ပါတယ်။

အိုင်ဗန်တိုနေးဟာ ၂၀၁၉ ခုနှစ်က ပီတာဘရော့အသင်းကနေ ပေါင် ၆ သန်းနဲ့ ဘရန့်ဖို့ဒ်အသင်းဆီကို ပြောင်းရွှေ့လာခဲ့တာပါ။

စာချုပ်ပါအချက်အလက်တွေအရ တိုနေးရဲ့ စွမ်းဆောင်ရည်အပေါ်မူတည်ပြီး ဆုကြေးတွေ ထည့်သွင်းချုပ်ဆိုခဲ့တာပါ။

အဲဒီစာချုပ်ပါ အချက်အလက်တွေထဲမှာ အင်္ဂလန်အသင်းမှာ ပွဲကစားခွင့်ရတာနဲ့ ပေါင်တသန်း ဆုကြေးပေးရမယ့် သဘောတူညီချက်လည်း ပါဝင်ခဲ့တာပါ။

ပီတာဘရော့ဟာ အရင်နှစ်တွေကလည်း တိုနေးရဲ့ စွမ်းဆောင်ရည်ကောင်းမွန်မှုတွေကြောင့် ပေါင် ၂ သန်းခွဲလောက် ဆုကြေးရရှိခဲ့ပြီးပါပြီ။

ဒါ့အပြင် တိုနေးအနေနဲ့ အသင်းပြောင်းရွှေ့ခဲ့မယ်ဆိုရင် အသင်းသစ်နဲ့အတူ လိဂ်ပွဲစဉ် ၅ ပွဲ ကစားရတိုင်း အနည်းငယ်သောဆုကြေးတခု ထပ်မံရရှိမယ်လို့ သိရပါတယ်။

အင်္ဂလန်အသင်းဟာ အီတလီ၊ ယူကရိန်းအသင်းတွေနဲ့ ယူရိုခြေစစ်ပွဲ ကစားရမှာဖြစ်ပြီး တိုနေးအနေနဲ့ အနည်းဆုံး ပွဲစဉ်တပွဲမှာ ပါဝင်ကစားခွင့်ရဖို့ ရှိပါတယ်။

ဘရန့်ဖို့ဒ်အသင်းဘက်က သက်တမ်းတိုးဖို့ ကမ်းလှမ်းချက်နှစ်ကြိမ်ကို ပယ်ချခဲ့ကြောင်း ဂိုးသမား ဒေးဗစ်ရာယာကပြောပါတယ်။

အသက် ၂၇ နှစ်ရှိ စပိန်ဂိုးသမား ရာယာဟာ အခုနှစ် ပရီးမီးယားလိဂ်မှာ ကာကွယ်မှု အများဆုံးပြုလုပ်ထားသူဖြစ်ပြီး မန်ယူနဲ့ စပါးအသင်းတွေက ခေါ်ယူလိုနေတယ်လို့ သတင်းထွက်ပေါ်ခဲ့သူပါ။

သူဟာ ဘရန့်ဖို့ဒ်နဲ့ တစ်နှစ်ခွဲစာချုပ်သက်တမ်းသာကျန်ရှိတော့တာဖြစ်ပါတယ်။ ဒေးဗစ်ရာယာက “မနှစ်တုန်းက တစ်ကြိမ်နဲ့ ပြီးခဲ့တဲ့ဇန်နဝါရီလက တစ်ကြိမ် စုစုပေါင်းနှစ်ကြိမ်စလုံးကို ပယ်ချခဲ့ပါတယ်။ သူတို့ရဲ့ ကမ်းလှမ်းချက်တွေက ကျနော်တို့ မျှော်လင့်ထားသလိုမဟုတ်ခဲ့ဘူး။ ဒီလောက်ပဲ ပြောနိုင်ပါသေးတယ်” လို့ Athletic သတင်းစာနဲ့ အင်တာဗျူးမှာပြောပါတယ်။ 

စပါးအသင်းဟာ အသက်အရွယ်ရလာတဲ့ ပြင်သစ်ဂိုးသမားလိုရစ်နေရာမှာ ရာယာနဲ့ အစားထိုးဖို့ ဆန္ဒရှိနေသလို မန်ယူအသင်းကလည်း ဒီဂီယာအလွန်မှာ အစားထိုးဖို့ ပစ်မှတ်ထားနေတာ ဖြစ်တယ်လို့ သိရပါတယ်။