ဘရာဇီးကစားသမားတွေနဲ့ ပရိသတ်တွေဟာ နည်းပြအန်စလော့တီကို ဘရာဇီးနည်းပြသစ်အဖြစ် ခေါ်ယူခန့်အပ်ဖို့ ဆန္ဒရှိနေကြပါတယ်။

အဲဒီသတင်းကို ဘရာဇီးဘောလုံးအဖွဲ့ချုပ်ဥက္ကဋ္ဌ အက်နယ်ဒိုရိုဒရီဂွက်စ် ကိုယ်တိုက် အတည်ပြုခဲ့တာဖြစ်ပြီး ဘရာဇီးနည်းပြရာထူးအတွက် အန်စလော့တီက လူကြိုက်အများဆုံးဖြစ်နေတယ်လို့ ပြောပါတယ်။

အန်စလော့တီဟာ ထိပ်တန်းနည်းပြတစ်ဦး ဖြစ်ပြီး အောင်မြင်မှုတွေလည်း အများကြီ; ရယူနိုင်ခဲ့သူဖြစ်ကြောင်း၊ ဘရာဇီးကစားသမားတွေနဲ့လည်း အဆင်ပြေတဲ့အပြင် ဘရာဇီးနိုင်ငံရဲ့ ဘယ်နေရာကိုသွားသွား ပရိသတ်တိုင်းက အလိုရှိတဲ့နည်းပြဖြစ်ကြောင်း ဥက္ကဋ္ဌရိုဒရီဂွက်စ်က ပြောပါတယ်။

ဘရာဇီးအသင်းကို ယာယီနည်းပြ ရာမွန်မက်နက်စ်က တာဝန်ယူနေပြီး ပြီးခဲ့တဲ့ရက်ပိုင်းက မော်ရိုကိုနဲ့ ခြေစမ်းပွဲမှာ ၂ ဂိုး ၁ ဂိုးနဲ့ရှုံးနိမ့်ခဲ့ပါတယ်။

ဘရာဇီး အက်ဖ်အေဟာ အခုနုစ်ရာသီပြီးဆုံးချိန်မှာ အန်စလော့တီနဲ့ အသေးစိတ်ဆွေးနွေးညှိနှိုင်းဖို့ စီစဉ်ထားတယ်လို့သိရပါတယ်။ 

ဘရာဇီးအစိုးရဘက်က ကယ်ဆယ်ရေး လေယာဉ်စီစဉ်ပေးဖို့ ယူကရိန်းရှိ ဘရာဇီးကစားသမားတွေ က တောင်းဆိုထားပါတယ်။ 

ရုရှားက ယူကရိန်းနိုင်ငံကို ကျူးကျော်စစ်ဆင်နွှဲခဲ့တာကြောင့် ယူကရိန်းပြည်တွင်းလိဂ်ပြိုင်ပွဲကို အနည်းဆုံးရက် ၃၀ ရပ်နားလိုက်ကြောင်း ထုတ်ပြန်ခဲ့ပါတယ်။ 

ယူကရိန်းထိပ်သီးကလပ်နှစ်သင်းဖြစ်တဲ့ ရှက်တာဒိုးနက် နဲ့ ဒိုင်နမိုကိယက်ဗ် အသင်းတွေမှာ ဘရာဇီးကစားသမားတွေ အများအပြား ပါဝင်ကစားနေကြတာပါ။ 

သူတို့ဟာ မိသားစုဝင်တွေနဲ့အတူ မြို့တော်ကိယက်ဗ်က ဟိုတယ်တစ်ခုမှာ စုရုံးနေထိုင်နေကြပါတယ်။ 

ဂျာနယ်လစ်တစ်ဦးဖြစ်သူ ဂွီဇာဒါက တွစ်တာမှာတင်လိုက်တဲ့ ဗွီဒီယိုဖိုင်တစ်ခုမှာ ဘရာဇီးကစားသမားတွေဟာ သူတို့ရဲ့ ဇနီး၊ ကလေးတွေနဲ့အတူ ဟိုတယ်မှာစုရုံးနေကြပြီး ကယ်ဆယ်ရေးလေယာဉ်စေလွှတ်ပေးဖို့ ဘရာဇီးအစိုးရကို တောင်းဆိုခဲ့ကြပါတယ်။ 

ရှက်တာဒိုးနက်အသင်းက ဘရာဇီးတိုက်စစ်မှူး ဂျူနီယာမိုရေးကတော့ ကိယက်ဇ်မှာ အခြေအနေဆိုးရွားနေလို့ နိုင်ငံကနေထွက်ခွာဖို့ အဖြေရှာနေပြီး ဟိုတယ်ထဲမှာ မိသားစုတွေနဲ့အတူ ရှိနေကြောင်းနဲ့ ဆုတောင်းပေးကြဖို့ အင်စတာဂရမ်ကနေ တိုက်တွန်းခဲ့ပါတယ်။ 

ယူကရိန်းထိပ်သီးကလပ် ရှက်တာဒိုနက်အသင်းမှာ ဘရာဇီးကစားသမား ၁၃ ဦးလောက်ရှိပြီး ဒိုင်နမိုကိယက်ဗ်နဲ့ ဇော်ယာအသင်းတွေမှာလည်း ဘရာဇီးကစားသမားတွေရှိပါတယ်။