ဘိုဂိုတာ အနောက်ဘက် ၁၂၉ ကီလိုမီတာ အကွာရှိ နီဗာဒို ဒလ် ရူးအစ်ဇ် မီးတောင်ကနေ ပြာတွေ မီးခိုးတွေ မှုတ်ထုတ်ခဲ့ပြီးနောက်မှာ ကိုလံဘီယာအာဏာပိုင်တွေက ဩဂုတ် ၁၉ ရက်က မီးတောင်ကို အနီးကပ် စောင့်ကြည့်နေပါတယ်။ 

မျက်မြင်သက်သေ ရုပ်သံဖိုင်မှာတော့ ဩဂုတ် ၁၈ ရက်မှာ ထူထဲမဲမှောင်တဲ့ မီးခိုးတွေက လေထဲ လွင့်ပျံလာတာကို ပြထားပါတယ်။ 

မီးတောင်ရဲ့ ရက်နဲ့ချီ  ဆာလဖာထုတ်လွှတ်မှုဟာ ပေ ၁ သောင်းကျော်ထိ ရောက်အောင် မှုတ်ထုတ်နေတာကြောင့် မီးတောင်ဟာ အဝါရောင် သတိပေးချက်အောက်မှာ ဆက်ရှိနေတယ်လို့ ကိုလံဘီယာဘူမိဗေဒဌာနရဲ့ သြဂုတ် ၁၈ ရက် နောက်ဆုံးထုတ်ပြန်တဲ့ အစီရင်ခံစာအရ သိရပါတယ်။ 

အမြင့်ပေ ၅၃၀၀ ကျော်တဲ့ အင်ဒီးစ်တောင်တန်း မီးတောင်ဟာ မတည်မငြိမ်ဖြစ်ပြီး ငလျင် လှုပ်ရှားမှု ကွဲပြားပါတယ်။ 

နီဗာဒို ဒလ် ရူးအစ်ဇ် မီးတောင်ဟာ ၁၉၈၅ ခုနှစ်မှာ ပေါက်ကွဲခဲ့ပြီး ကိုလံဘီယာသမိုင်းမှာ လူ အသေအပျောက်အများဆုံး သဘာဝဘေးဒဏ်ကို ဖြစ်ပေါ်စေခဲ့ပါတယ်။

မီးတောင်ပေါက်ကွဲမှုကြောင့် အာမယ်ရိုမြို့မှာ ရွှံ့ရည်ပူတွေ ဖုံးလွှမ်းနစ်မြုပ်သွားခဲ့ပြီး လူပေါင်း ၂၅၀၀၀ သေဆုံးခဲ့ပါတယ်။ 

ကိုလံဘီယာနိုင်ငံဟာ လက်တင်အမေရိကရှိ မူးယစ်ဆေးဝါး တားမြစ်ချက်တွေကို အဆုံးသတ်ရေး စကားဝိုင်းကို ဘိုဂိုတာရှိ သမိုင်းဝင်အမှတ်တရ အမျိုးသားဗဟိုဌာနမှာ ကျင်းပသင့်ကြောင်း သြဂုတ်လ ၅ ရက်မှာ ကိုလံဘီယာရဲ့ရွေးကောက်ခံသမ္မတ ဂူစတာဗို ပီထရိုက ပြောကြားခဲ့ပါတယ်။ 

ဒါ့အပြင်  ပီထရိုဟာ နိုင်ငံတွင်း အကြမ်းဖက်မှုတွေ အဆုံးသတ်ဖို့အတွက် ပြောက်ကျားအုပ်စုတွေကို အားပေးအားမြှောက်ပြုတဲ့ ငြိမ်းချမ်းရေးလုပ်ငန်းစဉ်ကို အာမခံချင်ကြောင်းလည်း ပြောသွားပါတယ်။ 

စင်တာမှာကျင်းပတဲ့ အခမ်းအနားအတွင်း လက်ရှိသမ္မတ ဒူကေးဟာ လူ့အခွင့်အရေး ပလက်ဖောင်းတွေနဲ့ လူမှုရေးအဖွဲ့အစည်းတွေဆီက စာတမ်းတစောင်ကိုလည်း လက်ခံရရှိထားပြီး အဲဒီမှာ လူမှုရေးခေါင်းဆောင်တွေနဲ့ ငြိမ်းချမ်းရေးသဘောတူစာချုပ် လက်မှတ်ရေးထိုးထားသူတွေကို အကာအကွယ်ပေးမယ့် အစီအစဉ်တခုလည်း ပါဝင်ပါတယ်။ 

သြဂုတ် ၇ ရက်က ကျမ်းသစ္စာကျိန်ဆိုပွဲမတိုင်မီ တရားဝင်ဆောင်ရွက်ချက်အနေနဲ့ အစောပိုင်းမှာ ရွေးကောက်ခံသမ္မတ ပီထရိုဟာ လက်ရှိ ကိုလံဘီယာသမ္မတ အိုင်ဗန်ဒူကေးဆီက နိုင်ငံတော်အမိန့်စာနဲ့တကွ သမ္မတအစဉ်အဆက် လက်ဆင့်ကမ်းလာတဲ့ အဆောင်အယောင်တွေကို လက်ခံရရှိခဲ့ပါတယ်။