မက္ကဆီကိုနဲ့ ဘိုလီဗီးယားနိုင်ငံတို့ အကြား သံတမန်ရေးအရ အငြင်းပွားမှုတွေ ပေါ်ပေါက်နေပါတယ်။
မြို့တော်လာပဇ်မှာရှိတဲ့ သံတမန်ဝန်ထမ်းတွေကို ဘိုလီးယားအစိုးရက အကြိမ်ကြိမ် အနှောင့်အယှက်ပေးနေတယ်လို့ မက္ကဆီကိုအစိုးရက ထပ်တလဲလဲ စွပ်စွဲပြီး၊ ဘိုလီးဗီးယား အစိုးရ တာဝန်ရှိသူတွေကလည်းမက္ကဆီကိုမှာရှိတဲ့ သံရုံးကို ခြိမ်းခြောက်နေလို့ လုံခြုံရေး တိုးမြှင့်ထားရတယ်လို့ အခိုင်အမာ ပြောဆိုနေတာပါ။
ပြီးခဲ့တဲ့လက မက္ကဆီကန်သမ္မတ အန်ဒရေးစ်မာနူဝယ်လိုပက်ဇ်အိုဘရာဒိုက လက်ဝဲဝါဒီ ဘိုလီးဗီးယား သမ္မတဟောင်း အီဗိုမိုရာလေ့စ်ကို နိုင်ငံရေးခိုလှုံခွင့် ပေးလိုက်ပြီးကတည်းက သံတမန်ဆက်ဆံရေး တင်းမာခဲ့ပြီး သံတမန်တွေကို ဘိုလီးဗီးယားက ခြိမ်းခြောက်ထားတယ်လို့ မက္ကဆီကိုအစိုးရက ဒီသီတင်းပတ်မှာပဲ စွပ်စွဲပြောပါတယ်။
မက္ကဆီကို နိုင်ငံခြားရေးဌာန ထုတ်ပြန်ချက်ထဲမှာ ဘိုလီးဗီးယားမှာရှိတဲ့ မက္ကဆီကို သံရုံးဝန်ထမ်းတွေရဲ့ အသွားအလာ လှုပ်ရှားမှုတွေကို ဘိုလီးဗီးယား ရဲတွေက မှတ်တမ်းယူတဲ့အပြင် သံရုံးမော်တော်ယာဉ်တွေကို နောက်ယောင်ခံလိုက်ပြီး သံအမတ်ကြီးကိုတောင် လွတ်လွတ်လပ်လပ် သွားလာခွင့်ကို တားဆီးဖို့ ကြိုးစားနေကြောင်း၊ ဒါဟာ သံတမန်ဆက်ဆံရေးဆိုင်ရာ ဗီယင်နာ ကွန်ဗင်းရှင်းကို တရားလွန် ချိုးဖောက်မှု ဖြစ်တယ်လို့ ဖော်ပြထားပါတယ်။
ဘိုလီးဗီးယားဘက်ကလည်း ဒီစွပ်စွဲချက်ကို ငြင်းဆန်ထားပြီး ဒါဟာ လာပက်ဇ်မှာရှိတဲ့ မက္ကဆီ ကန်သံရုံးဝန်ထမ်းများအတွက် လုံခြုံရေး ဆောင်ရွက်ပေးခြင်းသာ ဖြစ်ကြောင်းနဲ့ သံတမန်ဆိုင်ရာ စည်းမျဉ်းစည်းကမ်းများကိုလည်း ချိုးဖောက်ခြင်း မရှိပါကြောင်းပြောပါတယ်။
မက္ကဆီကန် သံရုံးပတ်ဝန်းကျင်မှာ မိုရာလေ့စ်ရဲ့ မဟာမိတ်တွေလည်း နေထိုင်နေကြတာကြောင့် လုံခြုံရေးတပ်ဖွဲ့တွေကို နေရာချထားပေးတာ ဖြစ်ပါတယ်လို့ ဘိုလီးဗီးယား သမ္မတရဲ့ အတွင်းရေးမှူး အဲရစ်ခ်ဖိုရွန်ဒါက ဖြေရှင်းပြောဆိုကြောင်း ဘိုလီးဗီးယား အစိုးရ သတင်းပြန်ကြားရေးအေဂျင်စီ (ABI) က ထုတ်ပြန်ပါတယ်။
2 years Ago
