အင်ဒိုနီးရှားနိုင်ငံရဲ့ ဆူရာဘာယာတရားရုံးဟာ ၂၀၂၂ ခုနှစ် အောက်တိုဘာလက ဂျာဗားကျွန်း အရှေ့ပိုင်းမှာ ဖြစ်ပွားခဲ့တဲ့ ဘောလုံးပွဲအတွင်း လူအုပ်ပြုံတိုးမှုကြောင့် လူပေါင်း ၁၃၅ ဦး သေဆုံးခဲ့တဲ့ဖြစ်ရပ်နဲ့ ပတ်သက်လို့ လာမယ့် ဇန်နဝါရီ ၁၆ ရက်မှာ ပထမဆုံး ရုံးတင်စစ်ဆေးပါတယ်။
ဒီဖြစ်ရပ်အတွက် ရဲအရာရှိ ၃ ဦးနဲ့ ပွဲစီစဉ်သူ ၂ ဦး အပါအဝင် စုစုပေါင်း လူ ၅ ဦးဟာ မကြာခင်မှာ တရားရင်ဆိုင်ရမှာပါ။
အင်ဒိုနီးရှား လူ့အခွင့်အရေး ကော်မရှင်ကတော့ ရဲအရာရှိတွေရဲ့ မျက်ရည်ယိုဗုံးနဲ့ ပစ်ခတ်မှုဟာ ဒီဖြစ်ရပ်အတွက် အဓိကအကြောင်းအရင်း ဖြစ်တယ်လို့ ဆိုပါတယ်။
ဒီလိုလူသေဆုံးစေခဲ့တဲ့ အဖြစ်ဆိုးဟာ ပြီးခဲ့တဲ့ အောက်တိုဘာ ၁ ရက်က မာလန်းမြို့ရှိ ကန်ဂျူရူဟန် ဘောလုံးကွင်းမှာ ဖြစ်ပွားခဲ့တာပါ။
ဒါဟာ ၁၉၆၄ ခုနှစ်နောက်ပိုင်း ဘောလုံးပွဲစဉ်တခုအတွင်း အဆိုးရွားဆုံး ဖြစ်ရပ်တခုလည်း ဖြစ်ပါတယ်။
အင်ဒိုနီးရှား အာဏာပိုင်တွေနဲ့ အင်ဒိုနီးရှားဘောလုံးအဖွဲ့ချုပ် (PSSI) တို့ကလည်း ဒီကွင်းထဲမှာ မျက်ရည်ယိုဗုံး ၄၅ ကြိမ်အထိ ပစ်သွင်းခဲ့တဲ့ ရဲတပ်ဖွဲ့ရဲ့ လုပ်ရပ်အပေါ် မေးခွန်းထုတ်တာကို ရင်ဆိုင်နေရပါတယ်။
လူစုလူဝေးကို ထိန်းချုပ်ဖို့ လုပ်ဆောင်ခဲ့တဲ့ ဒီလိုကိုင်တွယ်ပုံမျိုးကို ကမ္ဘာ့ဘောလုံးအဖွဲ့ချုပ် (ဖီဖာ) က အရင်ကတည်းက တားမြစ်ထားပါတယ်။
ထောင်ပေါင်းများစွာသော ဘောလုံးပရိသတ်တွေကလည်း ပြီးခဲ့တဲ့ နိုဝင်ဘာ ၁၀ ရက်က ဂျာဗားကျွန်းအရှေ့ပိုင်းမှာ ဆန္ဒပြခဲ့ကြသလို ဒီဖြစ်ရပ်အတွင်း ရဲတပ်ဖွဲ့ရဲ့ ဆောင်ရွက်ချက်အပေါ်မှာ စုံစမ်းစစ်ဆေးမှုကို ဒီ့ထက်လုပ်ဆောင်ဖို့ တောင်းဆိုခဲ့ကြပါတယ်။
အယ်လ်ဆာဗေဒိုနိုင်ငံ၊ စန်ဆယ်လ်ဗေဒိုမြို့တော်က ပြည်တွင်းဘောလုံးပွဲမှာ ဒိုင်လူကြီးတယောက် အသတ်ခံရအပြီး လူသတ်သမားအဖြစ် သံသယရှိသူကို အာဏာပိုင်တွေက မီဒီယာမှာ ဇွန် ၁၅ ရက်က ထုတ်ပြခဲ့ပါတယ်။
အသက် ၃၁ နှစ်အရွယ် ဟွမ် မန်နျူယယ် ခရုစ် လိုရန်ဇာနာဟာ ပြီးခဲ့တဲ့သီတင်းပတ်ကုန်ရက်က ဘောလုံးဒိုင်လူကြီး အားနော့ဒို အာမာယာကို သတ်မှုအတွက် တာဝန်ရှိသူအဖြစ် လုံခြုံရေးဝန်ကြီးဌာန အာဏာပိုင်တွေက တင်ပြခဲ့တာပါ။
ဒိုင်လူကြီး အာမာယာဟာ ဘောလုံးကွင်းထဲမှာ ရန်ဖြစ်တာကို တားဖို့ ကြိုးစားနေတုန်း အသတ်ခံခဲ့ရတာပါ။
“ဒီကမ္ဘာပေါ်မှာ ပိုအရေးကြီးတဲ့ အရာဖြစ်တဲ့ ကမ္ဘာ့တရားစီရင်ရေးရော နတ်ဘုရားတွေရဲ့ တရားစီရင်ရေးပါ ရှိဖို့ ကျေနာ်တို့ မျှော်လင့်တယ်” လို့ အာမာယာရဲ့သူငယ်ချင်း ဘောလုံးဒိုင်လူကြီး နောက်တယောက်က ပြောပါတယ်။
လူသတ်သမားအဖြစ် သံသယရှိသူ ခရုဇ် လိုရန်ဇာနာဟာ မော်မော်ဂိုဏ်းရဲ့ လူသတ်သမားနဲ့ တက်ကြွတဲ့ဂိုဏ်းဝင်ဖြစ်တယ်လို့ အာဏာပိုင်တွေက ပြောပါတယ်။
သူဟာ လူသတ်မှု၊ တရားမဝင်အုပ်စုတွေရဲ့ အဖွဲ့ဝင်ဖြစ်မှုတွေ အပါအဝင် ပြင်းထန်တဲ့ ရာဇဝတ်မှုတွေနဲ့ တရားစွဲခံရလိမ့်မယ်လို့ ရိုက်တာသတင်းဌာနက ကြေညာထားပါတယ်။
