မန်စီးတီးနဲ့ ပီအက်စ်ဂျီအသင်းတွေကြောင့် ဥရောပဘောလုံးလောကဟာ အန္တရာယ်ရှိနေပြီဖြစ်ကြောင်း စပိန်လာလီဂါလိဂ်ဥက္ကဋ္ဌ ယာဗီယာတီဘက်စ်က ပြောပါတယ်။

အဆိုပါ နှစ်သင်းဟာ ဥရောပဘောလုံးအဖွဲ့ချုပ်က သတ်မှတ်ထားတဲ့ ဘဏ္ဍာရေး ကန့်သတ်ချက်တွေကို ဖောက်ဖျက်နေပြီး ဘောလုံးလောကအတွက် အန္တရာယ်ရှိနေပြီဖြစ်ကြောင်း လာလီဂါဥက္ကဋ္ဌကဝေဖန်ခဲ့တာပါ။

ပရီးမီးယားလိဂ်ကလပ် မန်စီးတီးအသင်းကို ယူအေအီးနိုင်ငံသား ရှိတ်မန်စော်က အဓိကပိုင်ဆိုင်ပြီး၊ ပြင်သစ်ကလပ် ပီအက်စ်ဂျီကို ကာတာစော်ဘွားတွေကပိုင်ဆိုင်ထားတာပါ။ အဲဒီပိုင်ရှင်တွေဟာ နိုင်ငံပိုင်လုပ်ငန်းရှင်တွေဖြစ်ကြတာကြောင့် ဘဏ္ဍာရေးနဲ့ ပတ်သက်ပြီး လိုအပ်သလို လက်တစ်လုံးခြားပြီး သုံးစွဲနေတယ်လို့ လာလီဂါဥက္ကဋ္ဌကဝေဖန်ပါတယ်။ 

“ကျနော်တို့အနေနဲ့ ဥရောပဘောလုံးလောကရဲ့ စီးပွားရေးစနစ်ကို ကာကွယ်ဖို့ လုပ်ဆောင်နေပါတယ်။ ဒီအချိန်မှာ ဥရောပဘောလုံးလောကက အန္တရာယ်အတွင်းကို ကျရောက်နေတယ်။ နိုင်ငံပိုင်ကလပ်တွေကို ထိန်းချုပ်နိုင်တဲ့စနစ်တစ်ခု ကျနော်တို့ မလုပ်ဆောင် နိုင်သေးဘူး” လို့ တီဘက်စ်ကပြောပါတယ်။

ပြီးခဲ့တဲ့ရာသီက ပီအက်စ်ဂျီရဲ့ တစ်နှစ်စာလုပ်ခက ယူရိုသန်း ၆၀၀ ဆိုတာ မဖြစ်နိုင်ဘဲ အမ်ဘာပေရဲ့ လုပ်ခမပါသေးတာပဲဖြစ်နိုင်ကြောင်း၊ စပွန်ဆာဝင်ငွေတွေကနေရရှိတဲ့ မန်စီးတီးရဲ့အမြတ်ငွေက ၆၈ ရာခိုင်နှုန်းအထိ ရှိနေတာကလည်း ရီးရဲလ်မက်ဒရစ်လိုအသင်းထက်တောင်များနေတာဟာ မဖြစ်နိုင်တဲ့ကိစ္စဖြစ်ကြောင်း တီဘက်စ်ကဝေဖန်ပါတယ်။

ပီအက်စ်ဂျီက အမ်ဘာပေကို များပြားလှတဲ့ငွေကြေးတွေအသုံးပြုပြီး စာချုပ်သက် တမ်းတိုးတဲ့အပေါ်မှာလည်း လာလီဂါအဖွဲ့ချုပ်ဟာ တရားဝင်စာပို့ပြီး ကန့်ကွက်မှုခဲ့ပါတယ်။

ယူရို၂၀၂၀ ဘောလုံးပွဲ  ဖင်လန်နဲ့ကစားခဲ့တဲ့ပွဲစဉ်အတွင်း ပွဲကစားနေစဉ် လဲကျခဲ့တဲ့ ဒိန်းမတ် လက်ရွေးစင်ကစားသမား အဲရစ်ဆင်ဟာ လက်ရှိအချိန်မှာတော့ ကျန်းမာရေး ပြန်လည်ကောင်းမွန်နေပြီဖြစ်ပါတယ်။

ဒါပေမဲ့ နှလုံးရောဂါရှိတယ်လို့ စစ်ဆေးတွေ့ရှိခဲ့ မယ်ဆိုရင်တော့ ဘောလုံးပြန်ကစားဖို့မဖြစ်နိုင်တော့ဘူးလို့ အမျိုးသားကျန်းမာရေးဗဟိုဌာနက အကြံပေး ဆရာဝန် စကော့မာရေးက ပြောပါတယ်။

အီတလီနိုင်ငံမှာလည်း နှလုံးရောဂါရှိတဲ့ သူတွေကို စီးရီးအေမှာကစားခွင့်မပြုတာကြောင့် အင်တာမီလန်နဲ့လည်း စာချုပ်ဖျက်သိမ်းရဖွယ်ရှိနေတာပါ။

ဒီအခြေအနေတွေကြောင့် အဲရစ်ဆင်အနေနဲ့ ကစားသမားဘဝ အဆုံးသတ်သွားတဲ့အထိ ဖြစ်လာနိုင် တယ်လို့ ဒေါက်တာ စကော့မာရေးက သုံသပ်ခဲ့တာဖြစ်ပါတယ်။ 

အဲရစ်ဆင် လဲကျသွားခဲ့ပြီးနောက် ပွဲရပ်နားခဲ့ရပြီး  နာရီပိုင်းအတွင်း ပွဲကိုပြန်ကစားခဲ့ရာမှာ ဒိန်းမတ်အသင်းဟာ ဖင်လန်ကို ၁ ဂိုး ဂိုးမရှိနဲ့ရှုံးနိမ့်ခဲ့ပါတယ်။