ပြင်သစ်သမ္မတ မက်ခရွန်နဲ့ အိန္ဒိယဝန်ကြီးချုပ် မိုဒီတို့ဟာ မေ ၄ ရက်က ပါရီမြို့မှာ တွေ့ဆုံပြီး ယူကရိန်းအရေးနဲ့ နှစ်နိုင်ငံ ပူးပေါင်းဆောင်ရွက်ရေး ကိစ္စတွေကို ဆွေးနွေးခဲ့ကြပါတယ်။
အိန္ဒိယကို ရုရှားဆီက ဓာတ်ငွေ့နဲ့ ရေနံကို မှီခိုနေရတဲ့ဘဝကနေ လွတ်မြောက်အောင် ဘယ်လိုနည်းလမ်းရှာမလဲ ဆိုတာကိုလည်း ဆွေးနွေးခဲ့ကြတယ်လို့ ရိုက်တာသတင်းက ဆိုပါတယ်။
အိန္ဒိယဝန်ကြီးချုပ် မိုဒီဟာ ယူကရိန်းစစ်ပွဲ အဆုံးသတ်ရေးနဲ့ ယူကရိန်းနဲ့ ရုရှားတို့ကြား ငြိမ်းချမ်းရေးဆွေးနွေးဖို့ မေ ၃ ရက်က ဒိန်းမတ်နိုင်ငံမှာ ရောက်နေတုန်း တောင်းဆိုခဲ့ပါတယ်။
အခုအချိန်အထိ အိန္ဒိယဟာ ရုရှားရဲ့ ယူကရိန်းအပေါ် ကျူးကျော်မှုကို ပြတ်ပြတ်သားသား မဝေဖန်ဘဲ အကြမ်းဖက်မှု ရပ်တန့်ရေးလောက်ကိုပဲ ထိန်းထိန်းသိမ်းသိမ်း တောင်းဆိုနေတာပါ။
အိန္ဒိယဝန်ကြီးချုပ်ရဲ့ ပြင်သစ်နိုင်ငံခရီးစဉ်ဟာ ဂျာမနီ၊ ဒိန်းမတ်နဲ့ ပြင်သစ် ဥရောပသုံးနိုင်ငံ ခရီးရဲ့ နောက်ဆုံးခရီးတထောက် ဖြစ်ပါတယ်။
မက်ခရွန်နဲ့ မိုဒီတို့ဟာ ယူကရိန်းကိစ္စအပြင် အာဖဂန်နစ္စတန်အရေး၊ ရာသီဥတု ပြောင်းလဲမှု ကိစ္စနဲ့ နှစ်နိုင်ငံ ပူးပေါင်းဆောင်ရွက်ရေး ကိစ္စတွေကိုလည်း ဆွေးနွေးခဲ့တယ်လို့ ပြင်သစ်သမ္မတက ပြောပါတယ်။
ပြင်သစ်သမ္မတ အီမန်နျူရယ်မက်ခရွန် ပြန်လည်ရွေးချယ်ခံရတဲ့အတွက် ဝမ်းသာတဲ့အကြောင်း အမေရိကန် သမ္မတ ဘိုင်ဒင်က ဧပြီ ၂၅ ရက်နေ့မှာ ပြောပါတယ်။
ပြင်သစ် ရွေးကောက်ပွဲရလဒ်အတွက် စိတ်ကျေနပ်ရပါတယ်လို့ ဘိုင်ဒင်က သတင်းထောက်တွေ ကို ပြောပါတယ်။
ဧပြီ ၂၅ ရက်နေ့ ရွေးကောက်ပွဲမှာ ပြင်သစ်သမ္မတဟာ လက်ယာစွန်း ပြိုင်ဘက် မာရင်း လီပန်းကို အနိုင်ရလိုက်တာပါ။
အမေရိကန် ကာကွယ်ရေးဝန်ကြီးနဲ့ နိုင်ငံခြားရေးဝန်ကြီးတို့ ယူကရိန်းကိုသွားပြီး သမ္မတ ဇလန်းစကီးနဲ့ တွေ့ဆုံခဲ့တာကို သတင်းထောက်တွေက မေးမြန်းတဲ့အခါမှာလည်း သမ္မတက ကောင်းမွန်ပါတယ်လို့ ခပ်တိုတိုပဲ ပြန်ဖြေသွားပါတယ်။
အမေရိကန်ဝန်ကြီးတွေရဲ့ ယူကရိန်းခရီးစဉ်ဟာ အနောက်နိုင်ငံတွေက ယူကရိန်းကို ထောက်ခံကြောင်း ပြသဖို့ ဖြစ်သလို ယူကရိန်းနဲ့ ဒေသတွင်း နိုင်ငံတွေအတွက် နောက်ထပ် ဒေါ်လာ ၇၁၃ ဘီလီယံ အကူအညီကိုလည်း ကတိပြုခဲ့ပါတယ်။
ကာကွယ်ရေးဝန်ကြီး အော်စတင်နဲ့ နိုင်ငံခြားရေးဝန်ကြီး ဘလင်ကန်တို့နဲ့ ယူကရိန်း ခရီးစဉ်ကိစ္စ မကြာခင်မှာ ဆွေးနွေးဖို့ ရှိတယ်လို့ သမ္မတ ဂျိုးဘိုင်ဒင်က ပြောသွားပါတယ်။
