ဒီကနေ့ညကစားမဲ့ အဂျက်စီယိုနဲ့ ပြင်သစ်လိဂ်ပွဲစဉ်မှာ မက်ဆီကို ပွဲထွက်ကစားခွင့်ပေးမယ်လို့ ပီအက်စ်ဂျီနည်းပြ ဂယ်တီယာက အတည်ပြုသွားပါတယ်။ 

မက်ဆီဟာ ဧပြီ ၃၀ ရက်က ကစားခဲ့တဲ့ လော်ရီးယန့်နဲ့ပွဲစဉ်မှာပါဝင်ကစားခဲ့ပြီးနောက် ဆော်ဒီနိုင်ငံ ကို အလည်အပတ် ခရီးထွက်ခဲ့တာပါ။ 

အဲဒီခရီးစဉ်ကို ပီအက်စ်ဂျီအသင်းက ခွင့်ပြုထားတာမဟုတ်လို့ မက်ဆီကို အရေးယူခဲ့ပြီး မေ ၈ ရက်က ထရိုင်းရက်စ်ကို ၃ ဂိုး ၁ ဂိုးနဲ့အနိုင်ရတဲ့ပွဲမှာ လူစာရင်းကနေ ချန်လှပ်ခဲ့ပါတယ်။

အစောပိုင်းက မက်ဆီကိုနှစ်ပတ်ပွဲပယ်မယ်လို့ သတင်းထွက်ခဲ့ပေမဲ့ မက်ဆီ ဘက်က တောင်းပန်စာ ထုတ်ပြန်ခဲ့ပြီးနောက်မှာ တပတ်ပဲ ပွဲပယ်ချမှတ်ခဲ့တာပါ။ 

ပီအက်စ်ဂျီအသင်းဟာ လက်ကျန် ၄ ပွဲ အလိုမှာ ဒုတိယနေရာက လန်းစ်အသင်းကို ၆ မှတ် ဖြတ် ထားပါတယ်။ မက်ဆီဟာ ရာသီကုန်ဆုံးချိန်မှာ စာချုပ်သက်တမ်းကုန်ဆုံးမှာဖြစ်ပြီး ပီအက်စ်ဂျီက နေ ထွက်ခွာဖို့ ရှိပါတယ်။ 

အာဂျင်တီးနားရဲတပ်ဖွဲ့ဟာ ကမ္ဘာကျော် ဘောလုံးစတား လီယွန်နယ်မက်ဆီရဲ့ မျက်နှာပုံကို တံဆိပ်ခတ် ရိုက်နှိပ်ထားတဲ့ အပြာရောင် အက်ခ်တက်ခ်ဆီ စိတ်ကြွဆေးပြား တဒါဇင်ကို သိမ်းဆည်းရမိခဲ့ကြောင်း ဒေသဆိုင်ရာ အာဏာပိုင်တွေက မေ ၅ ရက်မှာ ပြောပါတယ်။

ဗျူနိုအေရီးစ် အရှေ့ပိုင်းရှိ ပွာတိုမာဒီရိုရပ်ကွက်က အီလက်ထရွန်နစ်ဂီတ ပါတီပွဲတခုမှာ ဆေးပြားတွေကို ရောင်းချနေတဲ့ အသက် ၂၉ နှစ်အရွယ် အမျိုးသားတဦးကို ရဲတပ်ဖွဲ့က ဖမ်းဆီးခဲ့ပါတယ်။

ဒီအမှုကို ရဲတပ်ဖွဲ့က ဆက်လက်စုံစမ်းစစ်ဆေးနေပြီး ဖမ်းမိထားသူကိုလည်း ဆက်လက် ဖမ်းဆီးထားပြီးတော့ သံသယရှိသူဟာ တရားရင်ဆိုင်ရတော့မှာလည်း ဖြစ်ပါတယ်။

အသင်းခေါင်းဆောင် မက်ဆီ အသင်းပြောင်းရွှေ့မယ့်ကိစ္စဟာ အသင်းအပေါ်အကျိုးသက်ရောက်မှုမရှိနိုင်ဘူးလို့ အာဂျင်တီးနား နည်းပြ စကယ်လိုနီက ပြောသွားပါတယ်။

မက်ဆီဟာ လာမယ့်ရာသီမှာ ဆော်ဒီကလပ် အယ်လ်ဟီလာအသင်းဆီ ပြောင်းရွှေ့မယ်လို့ သတင်းတွေကျယ်ကျယ်ပြန့်ပြန့်ထွက်ပေါ်ခဲ့တာပါ။

အဲဒီသတင်းတွေကို မက်ဆီရဲ့ဖခင်ဖြစ်သူက ငြင်းဆန်ထားပြီး ရာသီကုန်ဆုံးချိန်ရောက်မှ ဆုံးဖြတ်မယ်လို့ ဆိုခဲ့ပေမဲ့ မက်ဆီအသင်းပြောင်းရွှေ့မယ့်ကိစ္စကတော့ သေချာသလောက်ရှိနေတာပါ။

မက်ဆီအနေနဲ့ အသင်းဖော်တွေ၊ ပရိသတ်တွေနဲ့ အဆင်ပြေနိုင်မယ့်အသင်းကို ပြောင်းရွှေ့ရမှာဖြစ်ပြီး၊ ဘယ်အသင်းဆီ ပြောင်းရွှေ့သည်ဖြစ်စေ နိုင်ငံ့လက်ရွေးစင် အသင်းအပေါ်မှာတော့ အကျိုးသက်ရောက်မှုမရှိနိုင်ကြောင်း အာဂျင်တီးနားနည်းပြ စကယ်လိုနီကပြောပါတယ်။

မက်ဆီအနေနဲ့ လာမယ့်ရာသီမှာ ပြောင်းရွှေ့နိုင်တဲ့နေရာ သုံးနေရာရှိပြီး ဆော်ဒီကလပ် အယ်လ်ဟီလာ၊ အသင်းဟောင်းဘာစီလိုနာနဲ့ မေဂျာလိဂ်ကလပ်အသင်းတစ်သင်းဆီ ဆိုပြီး မီဒီယာတွေက ခန့်မှန်းသုံသပ်ကြပါတယ်။