ရခိုင်ပြည်နယ်၊ မင်းပြားမြို့နယ်၊ ပန်းမြောင်းကျေးရွာအနီးရှိ တောင်ဖြူတောင်မှာ တပ်စွဲထားတဲ့ စစ်ကောင်စီတပ် ဇန်နဝါရီ ၂၂ ရက်က မိုင်းပေါက်ကွဲပြီး  တပ်ဖွဲ့ဝင် ၅ ဦး သေဆုံးသွားတယ်လို့ ပန်းမြောင်းဒေသခံတွေက ပြောပါတယ်။

တောင်ဖြူတောင်ဘက်မှာ မနေ့ည ၇ နာရီလောက်မှာ စစ်ကောင်စီတပ်က တပ်အ‌ပြောင်းအလဲလုပ်နေတုန်း အရင်နေထိုင်ခဲ့တဲ့ စစ်ကောင်စီတပ်ဖွဲ့ဝင်တွေ ထောင်ထားခဲ့တဲ့ မိုင်ကို နင်းမိပြီး ပေါက်ကွဲခဲ့တာဖြစ်ကြောင်း ဒေသခံတဦးက ပြောပါတယ်။

“အရင်နေခဲ့တဲ့တပ်က ထောင်ထားတဲ့မိုင်းကို အသစ်ပြောင်းလာတဲ့တပ်က လူတွေက နင်းမိပြီး ပေါက်ကွဲတာ။ တပ်ဖွဲ့ဝင် ၅ ဦးအထိ သေသွားတယ်လို့ သိရတယ်။”

အခုလို မိုင်းကွဲပြီး စစ်ကောင်စီတပ်ဖွဲ့ဝင်တွေ သေဆုံးမှုနဲ့ ပတ်သက်ပြီး  စစ်ကောင်စီဘက်ကတော့ သတင်းထုတ်ပြန်တာမရှိသေးပါဘူး။ 

၂၀၂၂ ခုနှစ် မေလ ၁၅ ရက်နေ့ကလည်း မင်းပြားမြို့နယ်၊ ပန်းမြောင်းကျေးရွာ၊ စာသင်ကျောင်းရပ်ကွက်က အမျိုးသားတဦး မိုင်းပေါက်ကွဲပြီး ပွဲချင်းပြီး သေဆုံးခဲ့ပါတယ်။

ရခိုင်ပြည်နယ်၊ မင်းပြားမြို့နယ်၊ နဂရာအုပ်စု၊ လက်ပံကုန်းကျေးရွာမှာ ဇန်နဝါရီ  ၇ ရက် မနက်ပိုင်းက ၁၂ ကြိမ်မြောက် ဒိုင်းနက်(ခေါ်)သက္ကမ အမျိုးသားနေ့ ကျင်းပခဲ့ပါတယ်။

ပွဲကျင်းပရေး ဦးဆောင်ဆရာတော် ဇောတိပါလက "အဓိက ဒိုင်းနက်(ခ)သက္ကမ လူမျိုးတို့ရဲ့စာပေနဲ့ ယဥ်ကျေးမှုပေါ်ပေါက်လာစေဖို့၊ အိန္ဒိယနိုင်ငံနဲ့ ဘင်္ဂလားဒေ့ရှ်နိုင်ငံတွေမှာ ရှိနေတဲ့ မိမိတို့လူတွေနဲ့ ဆက်သွယ်မှု ခိုင်မာလာစေဖို့၊ စာပေ၊ဂီတနဲ့ သမိုင်းတွေ ရှာဖွေဖို့နဲ့ သုတေသနပြုဖို့၊ နောင်လာ နောက်သားလူငယ်တွေ သိရှိစိတ်ဝင်စားလာစေဖို့ ရည်ရွယ်ပြီး အခုလို နှစ်စဥ်နှစ်တိုင်း ကျင်းပတာ” လို့ မိန့် ပါတယ်။

ဒိုင်းနက် အမျိုးသားနေ့တွေကို  မြောက်ဦး၊ မင်းပြား၊ ပုဏ္ဏားကျွန်းနဲ့ ဘူးသီးတောင်မြို့နယ်တွေမှာ နှစ်စဥ်အလည့်ကျ ကျင်းပတာဖြစ်ပါတယ်။

အခုနှစ် ဒိုင်းနက်အမျိုးသားနေ့ကို သက္ကမစာပေနှင့်ယဉ်ကျေးမှုအသင်းက စီစဉ်ကျင်းပခဲ့တာဖြစ်ပြီး ရခိုင်ရှိ မြို့နယ်ပေါင်းစုံမှ သက္ကမစာပေနှင့်ယဉ်ကျေးမူကော်မတီဝင်တွေ၊ သက္ကမ စာပေသင်ကြားပေးနေတဲ့ ဆရာ/ဆရာမတွေ၊ ယက္ကန်းဆရာမတွေ အပါအဝင် လူ ၁၀၀၀ ကျော်တက်ရောက်ခဲ့ ပါတယ်။

ရခိုင်ပြည်နယ်အတွင်း ဒိုင်းနက်(ခေါ်)သက္ကမ လူဦးရေ ၅၀,၀၀၀ လောက်ရှိကာ မြောက်ဦး၊ မင်းပြား၊ ကျောက်တော်၊ ပုဏ္ဏားကျွန်း၊ ဘူးသီးတောင်၊ မောင်တောမြို့နယ်တွေအပြင် အိန္ဒိယ၊ ဘင်္ဂလားဒေ့ရှ် စတဲ့ နိုင်ငံတွေမှာပါ နေထိုင်ကြပြီး  လယ်ယာ၊ ကိုင်းကျွန်းလုပ်ငန်းကို အဓိက လုပ်ကိုင်ကြပါတယ်။