ပေါ်တူဂီနိုင်ငံ လစ္စဘွန်းရဲ့တောင်ပိုင်း မာဖရာနယ်မြေမှာ အကြီးအကျယ် တောမီးလောင်နေတာ ဇူလိုင် ၃၁ ရက် ညပိုင်းအထိ မထိန်းချုပ်နိုင်သေးပါဘူး။ 

ညနေ ၃ နာရီလောက်မှာ မီးစလောင်ပြီး ဒေသထဲမှာ အပူချိန်မြင့်မားတာနဲ့ လေပြင်း တိုက်ခိုက်နေတာကြောင့် မီးကို ငြှိမ်းသတ်ဖို့ ခက်ခဲနေပါတယ်။ 

အာဏာပိုင်တွေဟာ လမ်းတွေကို ပိတ်ထားပြီး အနီးနားက စောင့်ရှောက်ရေးဂေဟာတခုမှာ နေထိုင်သူတွေကို ကယ်ထုတ်ခဲ့ရပါတယ်။ အနီးနား နေထိုင်သူတွေကလည်း မီးဘေးကြောက်လို့ အိမ်တွေကို စွန့်ခွာသွားကြပါတယ်။ 

မာဇရာနယ်မြေမှာ လောင်ကျွမ်းနေတဲ့ မီးကို လစ္စဘွန်းမြို့လယ်ကနေ လှမ်းမြင်နေရတယ်လို့ သတင်းတွေက ဆိုပါတယ်။ 

တခြား ဥရောက နိုင်ငံတွေလိုပဲ မြင့်မားတဲ့ အပူချိန်နဲ့ ရင်ဆိုင်နေရတဲ့ ပေါ်တူဂီမှာ လွန်ခဲ့တဲ့ ၂ ပတ်ကလည်း အာရမ်း နယ်မြေမှာ ဟက်တာ ၂ ထောင်ကျော် တောမီးလောင်ခဲ့ပြီး တနိုင်ငံလုံးက မီးသတ်သမား တထောင်ကို သုံးပြီး မီးငြှိမ်းသတ်ခဲ့ရပါတယ်။ 

မိုးဇလဌာနကတော့  မြောက်ပိုင်းကမြို့နယ် သုံးခုကို ဩဂုတ် ၁ ရက်မှာ အပူချိန်မြင့်မားမှုဟာ အန္တရာယ်ရှိတဲ့ အနီရောင်အဆင့် သတ်မှတ်ထားပါတယ်။

စပိန်နိုင်ငံ ဇာမိုရာဒေသထဲမှာ လောင်ကျွမ်းနေတဲ့ တောမီးကို မထိန်းချုပ်နိုင်သေးဘဲ ကောင်းကင် တခွင်လုံး မီးခိုးတွေ ဖုံးလွှမ်းနေတာကို ဇူလိုင် ၁၈ ရက်က တွေ့ရပါတယ်။ 

စပိန်နိုင်ငံမှာ အပူလှိုင်း ဖြတ်သန်းနေတာ တပတ်ကျော်လာပြီး အပူဒဏ်ကြောင့် သေဆုံးသူ ၁၅၀ ရှိသွားပြီလို့  Carlos III Health Institute ကျန်းမာရေးဌာနက ခန့်မှန်းထားပါတယ်။

ဂါလီစီယာ၊ ကက်စတယ်လီနဲ့ လီယွန်၊ ကာတာလိုနီးယား၊ အိတ်ထရီးမာဒူရား၊ အန်ဒါလူစီယား ဒေသတွေမှာ အကျယ်အဝန်း ဟတ်တာ ထောင်ပေါင်းများစွာ တောမီးလောင်ကျွမ်းခဲ့ပြီး ဖြစ်ပါတယ်။ 

ဇာမိုရာခရိုင်ထဲမှာ တောမီးကို ငြှိမ်းဖို့ ကြိုးစားရင်း မီးသတ်သမား တယောက် သေဆုံးသွားခဲ့ပါတယ်။ 

တနိုင်ငံလုံး အတိုင်းအတာနဲ့ တောမီး အန္တရာယ် ရှိနေတယ်လို့ ရိုက်တာသတင်းက ဆိုပါတယ်။

ဒီတနှစ်လုံးအတိုင်းအတာနဲ့ ဟတ်တာ ၇၀,၀၀၀ ကျော် ( ဧက ၁၇၀,၀၀၀ ကျော်) တောမီး လောင်ကျွမ်းခဲ့ပြီးလို့ တရားဝင် ကိန်းဂဏန်းတွေအရ သိရပါတယ်။