လာမယ့်ရာသီမှာ ပိုကောင်းတဲ့ခြေစွမ်းနဲ့ ပြန်လာမယ်လို့ ဒဏ်ရာရသွားတဲ့ မန်ယူနောက်ခံလူ မာတီနက်ဇ်က ပြောသွားပါတယ်။

မာတီနက်ဇ်ဟာ ခြေဖမိုးရိုးကျိုးတဲ့ဒဏ်ရာကြောင့် ရာသီကုန်အထိ အနားယူရတော့မှာဖြစ်ပြီး အဲဒီအပေါ် အင်စတာဂရမ်ကနေ စာရေးသားထုတ်ပြန်ခဲ့တာပါ။

အလွန်ထူးခြားတဲ့ဘောလုံးရာသီတစ်ခုကို ဒီလိုပုံစံနဲ့ အဆုံးသတ်ရလိမ့်မယ်လို့ မျှော်လင့်မထားပေမဲ့ တခါတလေမှာ ပိုကောင်းတာတွေဖြစ်ဖို့အတွက် အခက်အခဲအတားအဆီးတွေကြုံရလေ့ရှိပြီး အဲဒီကို သင်ခန်းစာယူဖို့လိုကြောင်း မာတီနက်ဇ်ကပြောပါတယ်။

လာမယ့်ရာသီရောက်မှပဲ ခုထက်ပိုကောင်းတဲ့ခြေစွမ်းနဲ့ ပြန်လာမှာဖြစ်ပြီး လက်ရှိအချိန်မှာတော့ အသင်းရဲ့ရည်မှန်းချက်တွေကို ဆက်ပြီးလုပ်ဆောင်ကြမယ့် အသင်းဖော်တွေကို ဆက်လက်အားပေးသွားမှာဖြစ်ကြောင်း မာတီနက်ဇ်က ပြောပါတယ်။

ဒဏ်ရာအခြေအနေနဲ့ ပတ်သက်ပြီး ဆုတောင်းစကားတွေအများကြီးလက်ခံရရှိခဲ့ပြီး အားပေးမှုတွေ အတွက် နှလုံးသားထဲကနေ ကျေးဇူးတင်ရှိကြောင်းလည်း မာတီနက်ဇ်က အင်စတာဂရမ်ကနေ ရေးထားခဲ့ပါတယ်။

ပြင်သစ်နဲ့ မန်ယူနောက်ခံလူဟောင်း ပတ်ထရစ်အီဗရာဟာ လာမယ့် ဧပြီ ၃ဝ ရက်နေ့မှာ ပထမဆုံး လက်ဝှေ့ပွဲစဉ်အနေနဲ့ ယှဉ်ပြိုင်ထိုးသတ်သွားမှာပါ။ 

လန်ဒန်မြို့မှာရှိတဲ့ O2 အားကစားရုံမှာ ထိုးသတ်မယ့် လက်ဝှေ့ပြိုင်ပွဲမှာ အီဗရာက အမေရိကန်နိုင်ငံသား ဆယ်လီတဦးဖြစ်သူ အဒမ်ဆာ လက်နဲ့ ထိုးသတ်သွားမှာပါ။ 

အဒမ်ဆာလက်ဟာလည်း အပျော်တမ်းလက်ဝှေ့သမားတဦးဖြစ်ပေမယ့် အီဗရာထက် အရင် လက်ဝှေ့ထိုးနေတာဖြစ်ပြီး စုစုပေါင်း ၃ ပွဲမှာ ၂ ပွဲနိုင် ၁ ပွဲသရေ ကျထားတာပါ။ 

အသက် ၄ဝ ရှိ အီဗရာဟာ ၂၀၁၉ ခုနှစ်က ကစားသမားဘဝကနေ အနားယူခဲ့တာဖြစ်ပြီး အဲနှစ်ကတည်းက လက်ဝှေ့ထိုးသတ်ဖို့အတွက် လေ့ကျင့်ပြင်ဆင်မှုတွေ လုပ်ဆောင်ခဲ့ပါတယ်။ 

လက်ဝှေ့သမားတွေကို အလွန်လေးစားပြီး ပထမဆုံးအကြိမ် ထိုးသတ်ရမယ့် ပွဲစဉ်အတွက် စိတ်လူပ်ရှားနေမိတယ်လို့ အီဗရာက ပြောပါတယ်။ 

“လက်ဝှေ့ဆိုတာ ပါဝါ နဲ့ ခွန်းအားပဲလိုတာမဟုတ်ပါဘူး။ နည်းစနစ်ပိုင်းနဲ့ ဗျူဟာတွေလည်း လိုပါတယ်။ ကျနော်စိတ်အဝင်စားဆုံးက နည်းစနစ်ပိုင်းပါ။ လက်ဝှေ့လေ့ကျင့်တဲ့ပုံစံက ဘောလုံးနဲ့ သိသိသာသာကွဲပြားပါတယ်‌။ ကျနော့်အနေနဲ့ အကောင်းဆုံး ကြိုးစားလေ့ကျင့်ရင်း ပုံမှန်လူနေမှုဘဝကနေ ရုန်းထွက်ပြီး ကိုယ့်ကိုယ်ကိုယ် စိန်ခေါ်မှု လုပ်ခဲ့တာပါ” လို့ အီဗရာက ပြောပါတယ်။ 

အီဗရာပါဝင်ထိုးသတ်မယ့် လက်ဝှေ့ပွဲမှာ တခြားတွဲဆိုင်း ၁၁ ပွဲလည်း ပါဝင်ထိုးသတ်ကြမှာဖြစ်ပါတယ်။