မကွေးတိုင်း ဆိပ်ဖြူမြို့နယ်မှာ ဇန်နဝါရီ ၂၆ ရက်နေ့ ညက မြို့နယ်ပညာရေးမှူးရုံးနဲ့ လျှပ်စစ်ရုံး မိုင်းခွဲတိုက်ခိုက်ခံရပြီး ၁ ယောက်ဒဏ်ရာရရှိခဲ့တယ်လို့ သိန်းငှက်နက် ဆိပ်ဖြူတော်လှန်ရေးတပ်ဦး-BHRF ကနေ သိရပါတယ်။
ဆိပ်ဖြူမြို့နယ် ပညာရေးမှူးရုံးကို ဇန်နဝါရီ ၂၆ ရက်နေ့ ည ၆နာရီ ၄၂မိနစ်နဲ့ မြို့နယ် လျှပ်စစ်ရုံးကို ည ၆ နာရီ ၅၇ မိနစ်မှာ ဥသြ-UG(စလေ) နဲ့ပူးပေါင်းပြီး မိုင်းတလုံးစီဖောက်ခွဲတိုက်ခိုက်ခဲ့တာလို့ သိန်းငှက်နက် ဆိပ်ဖြူတော်လှန်ရေးတပ်ဦး ရဲ့ တာဝန်ခံ ဗိုလ် မိုရှေက ပြောပါတယ်။
အဲဒီတိုက်ခိုက်မှုအတွင်းမှာ မြို့နယ်လျှပ်စစ်ရုံးက Non CDM ဝန်ထမ်းတယောက် မိုင်းစထိမှန်ဒဏ်ရာရရှိကာ ဆိပ်ဖြူဆေးရုံမှာ ဆေးဝါးကုသမှုခံယူနေရပြီး မြို့နယ်ပညာရေးမှူးရုံးမှာတော့ ထိခိုက်သူမရှိခဲ့ဘူးလို့ဆိုပါတယ်။
မြို့နယ်ပညာရေးမှူးရုံးကတော့ CDM ဝန်ထမ်းတွေကို CDM မလုပ်ဖို့ ဖိအားပေးတဲ့အပြင် စစ်ကောင်စီရဲ့ အတုအယောင်ရွေးကောင်ပွဲမှာ မဲရုံတာဝန်ထမ်းဆောင်နိုင်ပြီး လျှပ်စစ်ရုံးကတော့ စ ပြည်သူတွေဆီကနေ မီတာခတွေ အတင်းအကြပ် တိုးမြှင့်ကောက်ခံနေတာကြောင့် သတိပေးတဲ့အနေနဲ့ တိုက်ခိုက်ခဲ့တာလို့ ပြောပါတယ်။
အဲဒီ တိုက်ခိုက်မှုအတွင်းမှာ မြို့နယ် လျှပ်စစ်ဝန်ထမ်း ထိခိုက်ဒဏ်ရာရရှိတဲ့အခြေနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
မွန်ပြည်နယ်၊ ရေးမြို့ရှိ မြို့နယ်ပညာရေးရုံးမှာ ဇန်နဝါရီ ၂၅ ရက် ဒီနေ့မနက် ၄ နာရီခွဲလောက်က မိုင်းခွဲခံရပြီးနောက် ပစ်ခတ်မှုတွေ ဖြစ်ပွားခဲ့တယ်လို့ ဒေသခံတွေက ဒီဗွီဘီကို ပြောပါတယ်။
မြို့နယ်ပညာရေးမှူးရုံးကို ရာမညပြောက်ကျားတပ်ဖွဲ့ (RGF) က လာရောက် မိုင်းထောင် ဖောက်ခွဲခဲ့တာကြောင့် စစ်ကောင်စီတပ်တွေနဲ့ ပြောက်ကျားတပ်ဖွဲ့တွေ နှစ်ဖက်အပြန်အလှန် ပစ်ခတ်မှု ဖြစ်ပွားခဲ့တာပါ။
“မနက်က အရင်ဆုံး အသံအကျယ်ကြီးတချက် ကြားတယ်။ ပြီးတော့ သေနတ်အသံ ၁၆ ချက်လောက် ဆက်တိုက်ကြားရတယ်။ အဲဒီဖြစ်စဉ်ပြီးတော့ ပိတ်ဆို့စစ်ဆေးတာတွေ ရှိတယ်။ အခုတော့ ပုံမှန်အတိုင်း သွားလာနေကြပြီ” လို့ ဒေသခံတဦးက ပြောပါတယ်။
မြို့နယ်ပညာရေးမှူးရုံး ဗုံးထောင်ဖောက်ခွဲခံရပေမဲ့ ရုံးအဆောက်အဦ ထိခိုက်ပျက်စီးတာ မရှိသလို ပစ်ခတ်မှုမှာလည်း ထိခိုက်သေဆုံးတာ မရှိဘူးလို့ ဆိုပါတယ်။
ရာမညပြောက်ကျားတပ်ဖွဲ့ (RGF) ကတော့ မြို့နယ်ပညာရေးရုံးကို မိုင်းထောင်ဖောက်ခွဲရတာဟာ တနှစ်တာကုန်ဆုံးတော့မယ့် စစ်ကျွန်ပညာရေး အကောင်အထည်ဖော်မှုကို အထမမြောက်စေချင်တဲ့အတွက် တိုက်ခိုက်ခဲ့တာလို့ ထုတ်ပြန်ထားပါတယ်။
နှစ်ဖက်အပြန်အလှန် ပစ်ခတ်မှုအတွင်း စစ်ကောင်စီတပ်ဖွဲ့တွေရဲ့ ရမ်းသန်းပစ်ခတ်မှုကြောင့် ပြည်သူတွေထိခိုက်မှာ စိုးရိမ်တာကြောင့် ပြန်လည်ဆုတ်ခွာပေးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ဇန်နဝါရီ ၆ ရက်ကလည်း ရေးမြို့ရှိ မြို့နယ်အထွေထွေအုပ်ချုပ်ရေး ဦးစီးဌာနရုံးနဲ့ မြို့နယ်မြေစာရင်းရုံးကို ရေးဘီလူးအဖွဲ့က လက်နက်ကြီးနဲ့ လာရောက်တိုက်ခိုက်ခဲ့တာကြောင့် အဆောက်အဦတချို့ ထိခိုက်ပျက်စီးခဲ့ပါတယ်။
မွန်ပြည်နယ်၊ ရေးမြို့နယ်ပညာရေးမှူးရုံးကို ဇန်နဝါရီ ၂၅ ရက် ဒီနေ့မနက် ၄ နာရီခွဲမှာ မိုင်းခွဲတိုက်ခိုက်ခဲ့တယ်လို့ ရာမညပြောက်ကျားတပ်ဖွဲ့ဝင်တယောက်က ပြောပါတယ်။
“ပညာရေးမှူးရုံးမှာ လုံခြုံရေးယူထားတဲ့ စစ်ကောင်စီတပ်ဖွဲ့ကို အဝေးထိန်းမိုင်းနဲ့ ဖောက်ခွဲခဲ့တယ်။ ရာမည ပြောက်ကျားတပ်ဖွဲ့နဲ့ စစ်ကောင်စီ လုံခြုံရေးကင်းသမားတွေ မိနစ်အနည်းငယ်ကြာ အပြန်အလှန်ပစ်ခတ်ပေမဲ့ မြို့ပေါ် လူနေရပ်ကွက်ဖြစ်တော့ လူထိခိုက်မှာစိုးလို့ ရာမညပြောက်ကျားတပ်ဖွဲ့က ပြန်ဆုတ်သွားခဲ့တယ်။”
မြို့ခံတယောက်ကလည်း “မနက်အစောကြီးက ပေါက်ကွဲသံကြားရပြီးတဲ့နောက် လက်နက်ငယ် အပြန်အလှန်ပစ်ခတ်သံပါ ထပ်ကြားရပြီး ပညာရေးမှူးရုံးမှာ ကင်းပုန်းချထားတဲ့ စစ်ကောင်စီတပ်ဖွဲ့ဝင်တော့ ရှိတယ်။ ထိခိုက်သေဆုံးတာတွေ မကြားရသေးသလို ကျောင်းတွေက ဆက်ဖွင့်ထားတယ်” လို့ ပြောပါတယ်။
အဆိုပါ ပညာရေးမှူးရုံး မိုင်းဆွဲတိုက်ခိုက်ခံရမှုကြောင့် အဆောက်အဦ အစိတ်အပိုင်းတချို့ ထိခိုက်ပျက်စီးခဲ့ပြီး ပညာရေးမှူးရုံးပိုင်းဆိုင်ရာ ပစ္စည်းတွေကို ဖယ်ရှားလိုက်ပါတယ်။
ရေးမြို့နယ်ပညာရေးမှူးရုံး တိုက်ခိုက်ခံရတဲ့ဖြစ်စဥ်နဲ့ ပတ်သက်ပြီး စစ်ကောင်စီဘက်က သတင်းထုတ်ပြန်တာ မတွေ့ရသေးပါဘူး။
ရာမညပြောက်ကျားတပ်ဖွဲ့ကတော့ ပညာသင်နှစ် တနှစ်တာကာလ ကုန်ဆုံးတော့မှာဖြစ်လို့ စစ်ကျွန်ပညာရေးကို အကောင်အထည်ဖော် အသက်သွင်းနေတဲ့ သူတို့ရဲ့ အကြံတွေ အထမမြောက်စေချင်တာကြောင့် အခုလို တိုက်ခိုက်ရတာလို့ ထုတ်ပြန်ထားပါတယ်။
