ကိုးရက်အတွင်း ဒလန် ၁၆ ယောက်အပါအဝင် စုစုပေါင်း ၃၅ ယောက်ကို ရှင်းလင်းနိုင်ခဲ့တယ်လို့ နယ်စည်းမခြား မိုးကြိုးမုန်တိုင်းအဖွဲ့က ထုတ်ပြန်ထားပါတယ်။

အဆိုပါ ထုတ်ပြန်ချက်မှာတော့ ဩဂုတ် ၃ ရက်ကနေ့ ဒီကနေ့ ၁၁ ရက်နေ့အထိ လုပ်ငန်းဆောင်ရွက်ချက်အနေနဲ့ စစ်ကောင်စီခန့် အုပ်ချုပ်ရေးမှူး ၇ ယောက်၊ ဒလန် ၁၆ ယောက်၊ စစ်တပ်ကျောထောက်နောက်ခံပျူစောထီးအဖွဲ့ဝင် ၈ ယောက်တို့အပါအဝင် စုစုပေါင်း ၃၅ ယောက် ပါဝင်တယ်လို့ ဆိုပါတယ်။

နယ်စည်းမခြား မိုးကြိုးမုန်တိုင်းအဖွဲ့ဟာ မြန်မာနိုင်ငံတဝှမ်း မြို့တွေမှာ အကြမ်း ဖက်စစ်ကောင်စီယန္တရားတွေ လည်ပတ်နိုင်ရေး ထောက်တိုင်တွေအနေနဲ့ ဆောင်ရွက်ပေးနေတဲ့ ပြည်သူ့ဆန္ဒကို မျက်ကွယ်ပြုနေတဲ့ ရပ်/ကျေးအုပ်ချုပ်ရေးမှူးတွေအပါအဝင် ပျူစောထီး အဖွဲ့ဝင်တွေ၊ ဒလန်တွေကို သုတ်သင်ရှင်းလင်းနေတာ ဖြစ်ပါတယ်။

မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်နေ့က စတင်ကာ အကြမ်းဖက်စစ်အုပ်စုက မတရားအာဏာသိမ်းယူခဲ့တာကို ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေးကာလဟာ ၆ လကျော် ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီးထောင်ချခံရသူတွေနဲ့အတူ နိုင်ငံအဝန်း တောရောမြို့ပါမကျန် ဒေသခံပြည်သူ့ကာ ကွယ်ရေးတပ်တွေနဲ့ စစ်ကောင်စီတပ်တွေကြားတိုက်ပွဲတွေလည်း ပြင်းထန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ ထုတ်ပြန် ချက်အရ ဩဂုတ် ၁၀ ရက်နေ့အထိ အာဏာသိမ်းစစ် ကောင်စီတပ်ရဲ့ ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၉၆၅ ယောက်ထိ ရှိလာခဲ့ပြီလို့ ဆိုပါတယ်။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်၊ မောင်းကျောက်တော အုန်းပင်ကုန်း ဆိုင်ဂေါင်း လမ်းသုံးခွမှာ ဇူလိုင် ၉ ရက်နေ့ မနက် ၁၀ နာရီလောက်က ပျူစောထီးအဖွဲ့ဝင်တစ်ဦးကို ပစ်သတ်ခဲ့တယ်လို့ မိုးကြိုးမုန်တိုင်းအဖွဲ့ တာဝန်ရှိသူတဦးက ဒီဗွီဘီကို ပြောပါတယ်။

သေဆုံးသူဟာ ၄၀ အရွယ် ဦးအုံးခိုင်ဖြစ်ပြီး တရုတ်ပြည်နွားကုန်ကူးသူ၊ ၂၀၁၀က မဲရုံစောင့် ရဲလုပ်ဖူးပြီး နှစ်ပေါင်းများစွာ ကျေးရွာအတွင်းသာမက ပတ်ဝန်းကျင်က နွားကူးသူတွေဆီကနေ ငွေကြေးတောင်းခံ မိုက်ကြေးခွဲဒုက္ခပေးနေသူဖြစ်ကာ ပျူစောထီးအဖွဲ့ဝင်တွေကိုလည်း စုဆောင်းနေသူဖြစ်တယ်လို့ ဒေသခံတွေက ပြောပါတယ်။

သေနတ်ဒဏ်ရာသုံးချက်၊ ဓားဒဏ်ရာတစ်ချက်နဲ့ သေးဆုံးခဲ့တာလို့သိရပြီး ဒီနေ့လည်ပိုင်းအထိ အလောင်းလာကောက်တာမရှိသေးဘူးလို့ သိရပါတယ်။

ခင်ဦးမြို့နယ်မှာ ကျီးကန်၊ အိုင်ပေါက်ကြီး၊ နှောကုန်း၊ လောင်းရှည်၊ ကဘွက်၊ သရက်ကန်၊ ရွာသန်း၊ အုန်းပင်ကုန်းစတဲ့ ကျေးရွာတွေက ဒလန်နဲ့ပျူစောထီးအဖွဲ့ဝင် ၉ ဦးအထိ အသတ်ခံထားရတယ်လို့ သိရပါတယ်။

မိုးကြိုးမုန်တိုင်းအဖွဲ့ကို မတ်လ ၂၇ ရက်နေ့က စတင်ဖွဲ့စည်းခဲ့တာဖြစ်ပြီး စစ်ကိုင်းတိုင်း၊ မန္တလေးတိုင်းနဲ့ မကွေးတိုင်းတို့ကို အခြပြုဆောင်ရွက်နေတာလို့ အဖွဲ့က ပြောပါတယ်။