ရန်ကုန်၊ နေပြည်တော် အပါအဝင် တိုင်းနဲ့ပြည်နယ် ၁၅ ခုမှာ လာမယ့်တပတ်အတွင်း အချိန်အခါမဟုတ် မိုးရွာနိုင်မယ်လို့ မိုးလေဝသနဲ့ ဇလဗေဒညွှန်ကြားမှုဦးစီးဌာနက ခန့်မှန်းထားပါတယ်။

ဧပြီ ၂၆ ရက် ညနေပိုင်း တိုင်းထွာချက်အရ ဧပြီ ၃၀ ရက်ကနေ မေ ၃ ရက်အတွင်း အရှေ့ဘက်က ရွေ့လျားလာတဲ့ လေပွေလှိုင်း‌‌တွေရဲ့ အရှိန်၊ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့က ရွေ့လျားလာတဲ့ တိမ်တိုက်တွေနဲ့ အပူပျံတက်တိမ်‌တွေ ဖြစ်ထွန်းမှု အားကောင်းနေတာကြောင့် နေပြည်တော်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နဲ့ မွန်ပြည်နယ်တို့မှာ နေရာကွက်ကျားကနေ နေရာကျဲကျဲ မိုးထစ်ချုန်းရွာနိုင်တယ်လို့ မိုးဇလဌာနက အသိပေး ထုတ်ပြန်ထားတာပါ။

ဒါ့အပြင် မိုးတိမ်တောင်‌‌တွေ ဖြစ်ထွန်းတာ၊ အချိန်အခါမဟုတ် မိုးရွာတာနဲ့အတူ လေပြင်းတိုက်ခတ်တာ၊ မိုးထစ်ချုန်းပြီး မိုးကြိုးပစ်တာ၊ လျှပ်စီးလက်တာနဲ့ မိုးသီးကြွေတာ စတဲ့ မိုးလေဝသဖြစ်စဉ်တွေလည်း ဖြစ်ပေါ်နိုင်ကြောင်း မိုးဇလက ကြိုတင်သတိပေးထားပါတယ်။

ဒါ့အပြင် နောက်နှစ်ရက်အတွင်း စစ်ကိုင်းတိုင်းဒေသကြီးအထက်ပိုင်း၊ တနင်္သာရီတိုင်း၊ ကချင်ပြည်နယ်တို့မှာ နေရာကွက်ကျား မိုးထစ်ချုန်းရွာနိုင်တယ်လို့လည်း ခန့်မှန်းထားပါတယ်။

ဧပြီလအတွင်းက နိုင်ငံတဝန်း မြို့အများစုရဲ့ နေ့အပူချိန်ဟာ သိသိသာသာတိုးလာပြီး တချို့မြို့နယ်တွေမှာ အမြင့်ဆုံးအပူချိန် စံချိန်သစ်တင်တဲ့အထိ ရောက်ရှိနေပါတယ်။

အပူချိန်လွန်ကဲမှုကြောင့် ရန်ကုန်အပါအဝင် ဒေသတချို့မှာ ကျန်းမာရေးဆိုင်ရာ ထိခိုက်မှု တွေ့လာရတာကြောင့် သတိပြုကြဖို့ ကျန်းမာသတိပေးမှုတွေ ရှိနေသလို အပူရှိန်ကြောင့် မိုးခေါင်နိုင်မယ့် အခြေအနေ၊ ဆည်ရေခန်းခြောက်မှုတွေ၊ ဆည်ရေခန်းတာတွေ ဖြစ်ပေါ်လာနိုင်တာကြောင့် သောက်ရေ သုံးရေအတွက် ကြိုတင်ပြင်ဆင်တာတွေ လုပ်ထားကြဖို့ ကျွမ်းကျင်သူတွေကလည်း သတိပေးထားကြပါတယ်။

ဒီဇင်ဘာ ၁၅ ရက်နေ့ မနက် ၃ နာရီလောက်က စတင်လှုပ်ခတ်ခဲ့တဲ့ ငလျင်ဟာ ၄၈ နာရီအတွင်းမှာ ပြင်းအားအသင့်တင့်ရှိတဲ့ ငလျင်အကြိမ်ပေါင်း ၅ ကြိမ် လှုပ်ခတ်ခဲ့တယ်လို့ မိုးလေ၀သနဲ့ ဇလဗေဒညွှန်ကြားရမှုဦးစီးဌာနက ထုတ်ပြန်ချက်ပါတယ်။

ဒီဇင်ဘာ ၁၅ ရက် မနက်က မန္တလေး ငလျင်စခန်းတောင်ဘက် ၁၅ မိုင်အကွာ၊ တံတားဦးအရှေ့ဘက် ၄ မိုင်အကွာကို ဗဟိုပြုပြီး ရစ်ချ်တာစကေး ၅.၂ ငလျင်လှုပ်ခဲ့အပြီး ညဘက်မှာတော့ တမူးမြေငလျင်စခန်းအရှေ့ဘက် ၆၅ မိုင်အကွာ၊ ပင်လယ်ဘူး မြို့ မြောက်ဘက် ၉ မိုင်အကွာကို ဗဟိုပြုပြီး ရစ်တာစကေး၄.၂ ငလျင် ထပ်မံလှုပ်ခဲ့ပါတယ်။  

ဒီဇင်ဘာ ၁‌၆ ရက် မနက်ပိုင်းမှာ မန္တလေး ငလျင်စခန်းတောင်ဘက် ၉ မိုင်အကွာ ပြည်ကြီးတံခွန်မြို့ အရှေ့ဘက် ၂ မိုင်အကွာကို ဗဟိုပြုပြီး ရစ်ချ်တာစကေး ၃.၆ ငလျင်နဲ့ နေ့လယ် ၁ နာရီလောက်မှာ မန္တလေး ငလျင်စခန်း တောင်ဘက် ၁၂ မိုင်အကွာ၊ မြစ်ငယ်မြို့ အရှေ့ဘက် ၃ မိုင်အကွာကို ဗဟိုပြုပြီး အင်အား ရစ်တာစကေး ၃.၃ ငလျင် လှုပ်ခဲ့ပါတယ်။ 

တဆက်တည်းမှာပဲ နေ့လယ် ၂ နာရီလောက် မန္တလေး ငလျင်စခန်းတောင်ဘက် ၁၂ မိုင်အကွာ၊ အမရပူရမြို့ အနောက်ဘက် ၃ မိုင်အကွာကို ဗဟိုပြုပြီး ရစ်ချ်တာစကေး ၄.၇ ငလျင်လှုပ်ခဲ့ပါတယ်။

၄၈ နာရီအတွင်း ငလျင် ၅ ကြိမ်လှုပ်ခတ်ခဲ့တဲ့အတွက် နှစ် ၁၀၀ မှာ တကြိမ်လောက် လှုပ်ခတ်တတ်တဲ့ စစ်ကိုင်းပြတ်ရွေ့ကြော လှုပ်ခတ်လာမှာကို ပြည်သူတွေက စိုး‌ရိမ်နေကြပါတယ်။

ဒီဇင်ဘာ ၁၅ ရက်မနက်က မန္တလေး တံတားဦးကိုဗဟိုပြုပြီး လှုပ်ခတ်ခဲ့တဲ့  ငလျင်ကြောင့် စေတီပုထိုးတွေ၊ သာသနာအဆောက်အအုံတွေနဲ့ လူနေအိမ်အချို့ပျက်စီးခဲ့‌ပြီး ဒီနေ့ ၁၆ ရက်က လှုပ်ခတ်ခဲ့မှုကြောင့် အင်းဝယဉ်ကျေးမှုဒေသ၊ ဒေါ်ဂျမ်းဘုရားစုက ‌ဘုရားအချို့ အနည်းငယ်ပျက်စီးခဲ့ပါတယ်။