ရခိုင်ပြည်နယ်၊ မောင်တောမြို့ရှိ ကညင်ချောင်း စီးပွားရေးဇုန်လမ်းတွေ မိုးရာသီးအတွင်း ဆိုးရွားစွာပျက်စီးလာနေပြီး ပြုပြင်တာလည်း မရှိတာကြောင့် သွားလာရေး အခက်အခဲဖြစ်မှာကို ကုန်သည်တွေ စိုးရိမ်နေကြပါတယ်။

"မိုးရာသီမှာ လက်ရှိ ကညင်ချောင်းစီးပွားရေးဇုန်လမ်းအခြေအနေက လုံးဝ ကုန်သွယ်လို့ အဆင်မပြေနိုင်ဘူး။ အရင်နှစ်ကလည်း ကျနော်တို့ ကုန်ကားတွေ တိမ်းမှောက်ပြီး ဆုံးရှုံးမှုတွေ များစွာရှိခဲ့တယ်။ အခုဇုန်ကုန်သွယ်ခွန်ဆိုပြီး ကုန်စည်တတန်ကို ၃၀၀၀ ကျပ်နှုန်းနဲ့ အခွန်ကောက်တယ်။ လမ်းတွေကတော့ အခုထိပြုပြင်တာမရှိသေးဘူး” လို မောင်တောမြို့ကနေ ဘင်္ဂလားဒေ့ရှ်နိုင်ငံကို ကုန်တင်ပို့နေတဲ့ ကုန်သည်ကြီးတဦးက ပြောပါတယ်။

ကညင်ချောင်စီးပွားရေးဇုန် ဖွံ့ဖြိုးတိုးတက်ရေးအတွက် ဇုန်ဝန်ဆောင်ခတွေကို ၂၀၂၂ ခုနှစ် ဇွန်နဝါရီ ၂၄ ရက်နေ့မှစတင်ကာ ကုန် ၁ တန်အား ၃၀၀၀ ကျပ်နှုန်းနဲ့ အခွန်ကောက်ယူမှုကနေ တပတ်ကို ၂၅ သိန်းလောက် ကောက်ခံရရှိတယ်လို့  ကညင်ချောင်စီးပွားဇုန် စီမံကိန်း အကောင်အထည်ဖော်တည်ဆောက်ရေး ဒုတိယဥက္ကဋ္ဌ ဦးအောင်မြင့်သိန်းက ပြောပါတယ်။

ဇုန်အသုံးပြုခ၊ လမ်းအသုံးပြုခ၊ ယာဉ်ရပ်နားခ၊ ညအိပ်ခ၊ မိလ္လာသန့်ရှင်းရေးခ၊ လျှပ်စစ်မီးသုံးစွဲခ၊ ရေအသုံးပြုခ၊ ပစ္စည်းစုပုံခ၊ သိုလှောင်ရုံခ၊ ရေယဥ်ဆိုက်ကပ်ခ၊ ဆိပ်ခံတာတားအသုံးပြုခ၊ အမှိုက်သိမ်းခ၊ မြစ်ချောင်းထိန်းသိမ်းခ စတဲ့ ခေါင်းစဥ် ၁၂ ခုနဲ့ ကုန်တတန်ကို ငွေ ၃၀၀၀ ကျပ်နှုန်း အခွန်ကောက်ခံယူနေတာလို့ ဆိုပါတယ်။

"စီးပွားရေးဇုန်ဆိုပြီး တရားဝင်ဖွင့်လှစ်တာ အခုထိမရှိသေးဘူး။ ကုန်တန်အချိန် ၁ တန်ကို အခွန်တော့ ၃၀၀၀ နှုန်းကောက်တယ်။ လမ်းတွေကတော့ အခုထိ မပြုပြင်သေးဘူး၊ ဇုန်တည်ဆောက်ထားတာတာ ပုဂ္ဂလိကနဲ့ အစိုးရပေါင်းပြီး ၄ ဘီလီယံခန့် သုံးစွဲထားတယ်။ စစ်ဆေးမယ်သူလည်း မရှိဘူး၊ လုပ်ချင်သလိုလုပ်နေကြတာ” လို့ ဦးအောင်မြင့်သိန်းက ပြောပါတယ်။

ကညင်ချောင်း စီးပွားရေးဇုန်အား ပြည်နယ်အစိုးရအဖွဲ့နဲ့ ကညင်ချောင်းစီးပွားရေး ဖွံ့ဖြိုးတိုးတက်ရေး ကုမ္ပဏီလီမိတက်တို့ ပူးပေါင်းကာ အစိုးရက ငွေကျပ်သိန်းပေါင်း ၂၅၀၀၀ နဲ့ ပုဂ္ဂလိကဘက်က ငွေကျပ် သိန်းပေါင်း ၁၃၄၀၀၊ စုစုပေါင်း ငွေကျပ်သိန်းပေါင်း ၃၈၄၀၀ နဲ့ မြေဧက ၅၀ လောက်မှာ ၂၀၁၅ - ၂၀၁၆ ဘဏ္ဍာနှစ်ကစတင်ပြီး ဝယ်သူစျေးကွက်ဖော်ဆောင်ဖို့အတွက် ကုန်သွယ်ရေးဇုန်အဖြစ် စတင်အကောင်အထည်ဖော်တည်ဆောက်ခဲ့တာလည်း ဖြစ်ပါတယ်။

လက်ရှိ အာဏာသိမ်းစစ်ကောင်စီလက်ထက်မှာ ကညင်ချောင်းစီးပွါးရေးဇုန်ပြုလမ်းတွေပြုပြုဖို့ ပြည်ထောင်စုအဆင့် တင်ဒါခေါ်နေပြီး လမ်းဧရိယာမည်မျှ ဘဏ္ဍာငွေမည်မျှ သုံးစွဲမည်ကို မသိရသေးဘူးလို့ ကုန်သည်ကြီးတွေဆီက သိရပါတယ်။

ထိုင်းနိုင်ငံမှာ မနက်ဖြန် မေ ၁၃ ရက်က စတင်ကာ မိုးရာသီကို ကူးပြောင်းဝင်ရောက်လာပြီ ဖြစ်တယ်လို့ မိုးလေဝသနဲ့ ဇလဗေဒဦးစီးဌာနက ထုတ်ပြန်ကြေညာပါတယ်။

နိုင်ငံတဝန်း ဒေသအတော်များများမှာ မိုးဆက်တိုက်ရွာသွန်းနိုင်ပြီး အခုနှစ်ရဲ့ မိုးရာသီကာလဟာ လာမယ့် အောက်တိုဘာလလယ်လောက်မှာ ကုန်ဆုံးနိုင်မှာဖြစ်ကာ မိုးရေချိန် ၃ ရာခိုင်နှုန်း ပိုမိုပြီးတော့ ရွာသွန်းနိုင်တယ်လို့ ခန့်မှန်းထားပါတယ်။

ဇွန်လလယ်ကနေ ဇူလိုင်လလယ်အထိ ခြောက်သွေ့မှု ဖြစ်ပွားနိုင်ပေမဲ့ သြဂုတ်လနဲ့ စက်တင်ဘာလတွေထဲမှာတော့ မကြာခဏဆိုသလို မိုးရွာသွန်းနိုင်ကြောင်းလည်း သတိပေးထားပြီး ဆည်မြောင်းရေသွင်းမှု ဧရိယာပြင်ပမှာ နေထိုင်ကြတဲ့ တောင်သူတွေကို သူတို့ရဲ့ စိုက်ပျိုးမှု အစီအစဉ်အတိုင်း လုပ်ဆောင်နိုင်ဖို့ အကြံပြုထားတာပါ။

ဒါ့အပြင် လာမယ့် ဩဂုတ်လနဲ့ စက်တင်ဘာလတွေ အတွင်းမှာတော့ အပူပိုင်း ဆိုင်ကလုန်းမုန်တိုင်းတွေ ထိုင်းနိုင်ငံအထက်ပိုင်းကို ရွေ့လျားနိုင်ခြေ မြင့်မားပြီး ဒေသအနှံ့အပြားမှာ မိုးသည်းထန်စွာ ရွာသွန်းနိုင်ချေ ရှိနေတယ်လို့ ဆိုပါတယ်။ အဆိုပါကာလတွေအတွင်း ရုတ်တရက် ရေကြီးရေလျှံတာတွေ၊ ကမ်းပါးတွေ ရေလျှံတက်တာမျိုးတွေ ဖြစ်နိုင်တာမို့ နိုင်ငံအထက်ပိုင်းဒေသတွေက ပြည်သူတွေကို သတိပေးထားပါတယ်။

ဒီကနေ့ မေ ၁၂ ရက်အတွက် မိုးလေဝသ ခန့်မှန်းချက်မှာတော့ နိုင်ငံတဝန်းမှာ လေဖိအားနည်းရပ်ဝန်းဟာ တောင်ဘက်နဲ့ အနောက်တောင်ဘက်ဆီ ဦးတည်ကာ လေပြင်းတွေ တိုက်ခတ်နေပြီး ဗီယက်နမ်နိုင်ငံ အထက်ပိုင်းကို ဖုံးလွှမ်းနေတဲ့ လေဖိအားနည်း ရပ်ဝန်းကြောင့် ထိုင်းနိုင်ငံမှာ မိုးအဆက်မပြတ် ရွာသွန်းနိုင်ပြီး နေရာကွက်ကျား မိုးသည်းထန်စွာ ရွာသွန်းနိုင်ကြောင်းလည်း မိုးလေဝသနဲ့ ဇလဗေဒ ဦးစီးဌာနက ထုတ်ပြန်ထားပါတယ်။

ပြည်သူတွေအနေနဲ့ လျှပ်တပြက် ရေကြီးရေလျှံတာတွေ ဖြစ်စေနိုင်တဲ့ ပြင်းထန်တဲ့ အခြေအနေတွေကို သတိထားသင့်ကြောင်းလည်း ထုတ်ပြန်ထားတာပါ။

ဒါ့အပြင် အိန္ဒိယအလယ်ပိုင်း ကမ်းရိုးတန်းမှာ ဖြစ်ပေါ်နေတဲ့ အပူပိုင်း ဆိုင်ကလုန်း အဆာနီဟာ ထိုင်းနိုင်ငံဆီ တိုက်ရိုက်သက်ရောက်မှာ မဟုတ်ပေမဲ့ နိုင်ငံတဝန်းနဲ့ ကပ္ပလီပင်လယ်ပြင်တွေမှာ လေပြင်းတွေ တိုက်ခိုက်နိုင်တယ်လို့လည်း ခန့်မှန်းထားပါတယ်။