အိန္ဒိယတောင်ပိုင်း မီဒီယာနဲ့ ဖျော်ဖြေရေးလုပ်ငန်းဟာ ၂၀၂၂ ခုနှစ်မှာ ၃၃ ရာခိုင်နှုန်း တိုးတက်ခဲ့ပြီး ဝင်ငွေဒေါ်လာ ၃ ဒသမ ၅၇ ဘီလီယံနဲ့ စံချိန်တင်နိုင်ခဲ့ကြောင်း Confederation of Indian Industry (CII) က အစီရင်ခံစာ ထုတ်ပြန်ပါတယ်။
ဘာသာစကားလေးမျိုး ပေါင်းစပ်ထားတဲ့ ရုပ်ရှင်ဝင်ငွေလမ်းကြောင်းတွေထဲက အကြီးဆုံးအပိုင်းက ပြည်တွင်းရုပ်ရှင်ရုံက ရရှိတဲ့ဝင်ငွေဖြစ်ပြီး ဒစ်ဂျစ်တယ် တိုက်ရိုက်ထုတ်လွှင့်ခွင့်က ဒေါ်လာ ၂၂၄ သန်းနဲ့ ဂြိုဟ်တုလုပ်ပိုင်ခွင့်က ဒေါ်လာ ၁၆၁ သန်းဖြစ်ပြီး ကျန်တာတွေကတော့ ပြည်ပရုပ်ရှင်ကဇာတ်ရုံတွေနဲ့ ဂီတမူပိုင်ခွင့်တွေအတွက် ဖြစ်ပါတယ်။
အိန္ဒိယနိုင်ငံရဲ့ တောင်ပိုင်းဒေသဟာ နိုင်ငံ့လူဦးရေ ၁ ဒသမ ၄ ဘီလီယံရဲ့ ၂၀ ရာခိုင်နှုန်းပဲ ရှိပေမဲ့ နိုင်ငံ့ GDP ကိုတော့ ၃၂ ရာခိုင်နှုန်း ထောက်ပံ့ပေးနေတာဖြစ်ပြီး အစီရင်ခံစာမှာတော့ အိန္ဒိယရုပ်ရှင်အားလုံးရဲ့ ဝင်ငွေဟာ ၂၀၂၂ ခုနှစ်မှာ ဒေါ်လာ ၁ ဒသမ ၈ ဘီလီယံရှိမယ်လို့ ခန့်မှန်းထားပါတယ်။ အိန္ဒိယတောင်ပိုင်းကတော့ ဒေါ်လာ ၉၉၅ သန်း ဒါမှမဟုတ် စုစုပေါင်း ဝင်ငွေရဲ့ ၅၂ ရာခိုင်နှုန်းရှိမယ်လို့ ခန့်မှန်းထားပါတယ်။
အစီရင်ခံစာမှာ အိန္ဒိယရှိ ရုပ်ရှင်ရုံစုစုပေါင်းမှာ ၈,၇၀၀ အဖြစ် မှတ်တမ်းတင်ထားပြီး အိန္ဒိယ တောင်ပိုင်းမှာ ရုပ်ရုင်ရုံ ၄,၂၁၆ ခုနဲ့ ၄၈ ရာခိုင်နှုန်းရှိတယ်လို့ ဆိုပါတယ်။
“အစီရင်ခံစာမှာ ဖော်ပြထားတဲ့အတိုင်း တောင်အိန္ဒိယရဲ့ မီဒီယာနဲ့ ဖျော်ဖြေရေးကဏ္ဍဟာ ဒေသတွင်း ဘာသာစကားရုပ်ရှင်လုပ်ငန်းနဲ့ တိုးတက်မှုအတွက် စံနှုန်းအသစ်တွေ သတ်မှတ်ပေးထားပြီး ကြီးမားတဲ့ တိုးတက်မှုအတွက် ပြင်ဆင်နေပါတယ်” လို့ CII ဥက္ကဋ္ဌ ထုတ်လုပ်သူ သီယာ ဂရာဂျန်က ပြောပါတယ်။
စစ်ခေါင်းဆောင်ရဲ့ အလိမ်အညာတွေကို ဖြောင့်မတ်မှန်ကန်တဲ့ ပြည်တွင်း ပြည်ပ မီဒီယာတွေကတဆင့် စနစ်တကျ ပြန်လည်တိုက်ဖျက်နိုင်ဖို့ အရေးတကြီး လုပ်ဆောင်သင့်တယ်လို့ အမျိုးသားညီညွတ်ရေးအစိုးရ (NUG) ယာယီသမ္မတ ဒူဝါလရှီးလက ပြောလိုက်ပါတယ်။
ဧပြီ ၁၈ ရက် ဒီကနေ့ ပြုလုပ်တဲ့ NUG အစိုးရအဖွဲ့အစည်းအဝေးမိန့်ခွန်းမှာ ခုလိုပြော လိုက်တာဖြစ်ပြီး စစ်ခေါင်းဆောင်နဲ့ အပေါင်းအပါတွေဟာ သူတို့ရဲ့ ညံ့ဖျင်းမှုတွေကို ဖုံး ကွယ်နိုင်ဖို့အတွက် သူတို့ရဲ့ လက်ပါးစေမီဒီယာတွေကတဆင့် နည်းမျိုးစုံ၀ါဒဖြန့်ပြီး လိမ် ညာနေတယ်လို့ ဆိုပါတယ်။
“အခုဆိုရင် အကြမ်းဖက်စစ်တပ်ဟာ နိုင်ငံအတွင်းမှာ ငြိမ်းချမ်းနေသယောင်နဲ့ နှစ်သစ်ကူး သင်္ကြန်ပွဲတော်ကိုအတင်းအကျပ်နဲ့ ဖန်တီးလုပ်ယူခဲ့သလို၊ သူတို့ရဲ့နောက်မြှီးဆွဲ အဖွဲ့ အစည်းတချို့နဲ့ အတုအယောင် ရွေးကောက်ပွဲကိုလည်း ဖန်တီးယူဖို့အတွက် ရွေးကောက် ပွဲကော်မရှင်ဖွဲ့ပြီး မတရားတဲ့ ရွေးကောက်ပွဲတခုကို ဖန်တီးနေတာကိုလည်း အားလုံးအသိပါပဲ။ အတုဟာ အတုပါပဲ။ မတရားမှုနဲ့ အဓမ္မလုပ်တာဟာလည်း မတရားမှုပါပဲ။ ဒီမတရားမှုတွေကြောင့်ပဲ အရပ်သားပြည်သူ တွေဟာ နေ့စဥ်နဲ့အမျှ သူတို့ရဲ့ ချစ်လှစွာသော သား သမီး၊ ခင်ပွန်း၊ ဇနီးနဲ့ ညီအစ်ကို မောင်နှမတွေကိုဆုံးရှုံးနေရတာပါ။ ဒီလို အကြမ်းဖက်စစ်တပ်ရဲ့ အရပ်သားတွေအပေါ် နေ့စဥ်နေ့တိုင်း လုပ်ဆောင်နေတဲ့ အကြမ်းဖက်တိုက်ခိုက်မှုတွေ၊ သတ်ဖြတ်မှုတွေ၊ လူ့အခွင့်အရေးချိုးဖောက်မှုတွေကို ကာကွယ်ပေးနိုင်ဖို့အတွက် ကုလပဋိညာဥ်စာချုပ် အခန်း(၇) ပါအတိုင်း အရေးယူဆောင်ရွက်နိုင်ဖို့ ကျနော်တို့ အားလုံး ပိုမိုကြိုးစားလုပ်ဆောင်ကြရပါမယ်။”
ဒါ့အပြင် ပြီးခဲ့တဲ့ရက်ပိုင်းမှာ ပဇီကြီးဖြစ်စဥ်လို စိတ်မကောင်းစရာတွေ ဖြစ်ခဲ့ပေမယ့် တနိုင်ငံလုံး အတိုင်းအတာနဲ့ မြေပြင်တိုက်ပွဲတွေမှာ စစ်ကောင်စီဟာ အဘက်ဘက်က ကျဆုံးနေတာဖြစ်လို့ လူထုနဲ့ တော်လှန်ရေး အင်အားစုတွေအနေနဲ့ စိတ်အားမလျော့ကြဖို့လည်း ယာယီသမ္မတ ဒူဝါလရှီးလက တိုက်တွန်းထားပါတယ်။
“အကြမ်းဖက် စစ်တပ် ရုံးစိုက်ရာ နေပြည်တော်လို နေရာမှာတောင် တော်လှန်ရေး အင်အားစုတွေက ခြိမ်းခြောက်နိုင်ခဲ့တာ၊ စစ်အခြေစိုက်စခန်းတွေနဲ့ အရေးကြီးနေရာတွေကို ဝင်ရောက် စီးနင်းနိုင်ခဲ့ပြီး လက်နက်တွေ သိမ်းယူနိုင်ခဲ့တဲ့ တိုက်ပွဲဖြစ်စဥ်တွေလည်း နေ့စဥ်နဲ့အမျှ ရှိနေတာကြောင့် မြန်မာ့ နှစ်သစ်ကူးမှာ စိတ်ဓာတ်ပျက်ပြားပြီး သွေးလန့် ခြောက်ခြားနေရမယ့်သူဟာ ပြည်သူ့ ရန်သူ စစ်အုပ်စုပဲ ဖြစ်ပါတယ်။ ဒီလို မြေပေါ်၊ မြေအောက် နေရာအသီးသီးကနေ နေ့စဥ်နေ့တိုင်း တွန်းလှန်နေတာကြောင့်လည်း မြေပြင်မှာ ရင်မဆိုင်ရဲတဲ့ အကြမ်းဖက်စစ်ခေါင်းဆောင်ဟာ သူ့ရဲ့လက်တဆုပ်စာ နောက်လိုက်တွေနဲ့အတူ ကြောက်ကန် ကန်ပြီး အရပ်သားတွေကို ပစ်မှတ်ထားတဲ့ ရက်စက်မှုတွေကို တနေ့တခြားပိုမို လုပ်ဆောင်လျှက်ရှိနေတာကိုလည်း အခုထက်ပို သတိကြီးကြီးထား ကာကွယ်ရမှာ ဖြစ်ပါတယ်။”
NUG ညီညွတ်ရေး အစိုးရအနေနဲ့လည်း အရပ်သားတွေကို ထိခိုက်မှု နည်းနိုင်သမျှ နည်းစေဖို့ စနစ်ကျတဲ့ စီမံဆောင်ရွက်မှုတွေကို အရင်ကထက်ပိုပြီး သေချာပြင်ဆင်ထားဖို့ လိုအပ်တယ်လို့လည်း ပြောပါတယ်။
“ကျနော်တို့နိင်ငံရဲ့ပြဿနာဟာ နိုင်ငံနှစ်ခုကြားဖြစ်နေတဲ့ တိုက်ခိုက်မှုတွေ မဟုတ်တဲ့အတွက် နိုင်ငံတကာက အာရုံစိုက်ပြီးကူညီဖို့ဆိုတာဟာ အရပ်သားတွေ ဘယ်လောက်အထိ ပစ်မှတ်ထား တိုက်ခိုက်ခံနေရတယ်ဆိုတာကို သိအောင်ချပြနိုင်ဖို့လိုအပ်ပါတယ်။”
လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ် ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာပါ။
နိုင်ငံတဝန်းမှာလည်း မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီး တိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ် ကောင်စီတပ်တွေကြား တိုက်ပွဲတွေ ပြင်းထန်နေပါတယ်။
