ရှမ်းပြည်နယ်မြောက်ပိုင်း တရုတ်-မြန်မာ နယ်စပ်မြို့ ဖြစ်တဲ့ မူဆယ် ညဈေးအနီးက မီးပွင့်နားမှာ ဗုံးပေါက်ကွဲ တာကြောင့် ၃ ဦး ထိခိုက်ဒဏ်ရာရတယ်လို့ ဒေသခံတွေနဲ့ အကူညီပေးနေသူတွေက ပြောပါတယ်။
"အစောက အသံတွေကြားနေရတယ်။ ဘယ်အဖွဲ့လဲမသိ၊ သေလားမသိဘူး၊ မှောက်နေပြီ လောလောဆယ်" လို့ ဒေသခံတဦးက ပြောပါတယ်။
မူဆယ် နာရီစင်ကျော် ကုန်းဆင်းဘက်က မီးပွိုင့်အနီးမှာ ဒီနေ့ ဩဂုတ် ၁ ရက်နေ့ မနက် ၁၁ နာရီ ကျော်လောက် ဗုံးပေါက်ကွဲခဲ့တာဖြစ်ပြီး ၃ ဦး ထိခိုက်တယ်လို့ အကူအညီပေးနေသူတဦးက ပြောပါတယ်။
“ထိတာက ပြည်သူနဲ့ဆို ၃ ယောက်။ ဖုန်းဆိုင်က မိန်းကလေးက လန့်ပြီးတော့ ရှော့ခ်ဖြစ်တာက ၂ ယောက်။ မော်တော်ပီကယ် ၁ ယောက်၊ ပြည်သူ့စစ် ၁ ယောက်၊ ပြည်သူထဲက ယောက်ျားလေး ၁ ယောက်။ အခြေအနေက ခြေထောက်တွေ လက်တွေထိတယ် အခြေအနေက။ အသေအပျောက် မရှိပါဘူး။ ဗုံးပါ။ ၁၁ ခွဲ ဝန်းကျင်လောက်။ ခု ဆေးရုံမှာ။”
လက်ရှိမှာ ထိခိုက်ဒဏ်ရာရသူတွေကို လူမှုကူညီရေးအသင်းက ဆေးရုံကို ကူညီ ပို့ဆောင်ထားတယ်လို့ ဆိုပါတယ်။
မူဆယ်မှာ မကြာခဏ ပစ်ခတ်မှု၊ ဗုံးပေါက်ကွဲမှုတွေ ဖြစ်တတ်ပြီး ထိခိုက်ဒဏ်ရာရသူတွေ ရှိသလို သေဆုံးသူတွေလည်း ရှိပါတယ်။
ရန်ကုန်တိုင်းအတွင်းရှိ ယာဉ်ထိန်းရဲကင်းတွေမှာ မီးပြတ်တဲ့အခါ မီးပွိုင့်မရပ်စေဖို့အတွက် မီးစက်တွေ အသင့်ထားရှိဖို့ မတ်လဆန်းပိုင်းက စတင်ပြီး တပ်ဖွဲ့တွင်း ညွှန်ကြားထားတယ်လို့ ယာဉ်ထိန်းရဲအသိုက်အဝန်းကနေ သိရပါတယ်။
စစ်တပ်အာဏာသိမ်းပြီး နောက်ဆက်တွဲ အကျိုးဆက်အနေနဲ့ ဓာတ်အားစနစ်ကို စနစ်တကျ မပေးဝေနိုင်တာကြောင့် မီးပြတ်မှုတွေ ဆက်တိုက်ဖြစ်လာပြီးနောက်ပိုင်း ခုလို မီးစက်တွေ အသင့်ထားရှိဖို့အတွက် ညွှန်ကြားလာတာလို့ ယာဉ်ထိန်းတပ်ဖွဲ့ဝင်တဦးက ပြောပါတယ်။
“အရင်တုန်းက မီးမလာရင် အေးဆေးနားလို့ရတယ်။ ခုကတော့ သိတဲ့အတိုင်း ရေဘူးပေါက်တာ မလိုချင်ဘူး၊ ရေပါတာပဲ လိုချင်တယ်ဆိုပြီး တပ်ဘက်က ဖိအားပေးလာတာ၊ မီးကလည်း ခဏခဏပြတ်တော့ နောက်ဆုံး မီးစက်တွေဝယ်သုံးဖို့ စဉ်းစားတာထင်ပါတယ်။ ခုတော့ မီးပွိုင့်တိုင်းမှာ မီးစက်အသင့်ထားဖို့ ညွှန်ကြားထားတာ။”
ရန်ကုန်မြို့မှာ ကားပိတ်တဲ့မီးပွိုင့်တွေမှာ အဓိက မီးစက်တွေကို အသင့်ထားရှိပြီး မတ်လ ဒုတိယပတ်လောက်က စတင်ကာ မီးစက်အသုံးပြုပြီး မီးပွိုင့်တွေလည်ပတ်ဖို့ လုပ်နေရတယ်လို့ ဆိုပါတယ်။
မီးစက်အသုံးပြုဖို့အတွက် ဆီကို တပ်ဖွဲ့က တနေ့ကို ၃ လီတာ ထုတ်ပေးပေမဲ့ မလုံလောက်တာကြောင့် မိမိငွေနဲ့ စိုက်ထုတ် အသုံးပြုနေရတာမျိုးတွေလည်း ရှိနေတယ်လို့ သိရပါတယ်။
