ကနေဒါနိုင်ငံအနောက်ပိုင်းမှာ တပတ်အတွင်း စံချိန်တင်ရာသီဥတု ပူပြင်းခဲ့တဲ့အတွက် အယ်လ်ဘာတာမှာ တောမီးတွေ လောင်ကျွမ်းနေပြီး ဆီးနှင်းတွေ အရည်ပျော်ကာ ဗြိတိန် ကိုလံဘီယာအတွင်းပိုင်းမှာ ရေလျှံမှုတွေ ဖြစ်ပေါ်နေတာကြောင့် သောင်းနဲ့ချီတဲ့ လူတွေကို ဘေးလွတ်ရာကို ရွှေ့ပြောင်းပေးခဲ့ရပါတယ်။

မေ ၅ ရက်က အယ်လ်ဘာတာမှာ ၇၈ ကြိမ် မီးလောင်ခဲ့ပြီး လူ ၁၃၀၀၀ ကျော်ကို ဘေးလွတ်ရာ ရွှေ့ပြောင်းပေးခဲ့ရပြီး ဖော့စ်ရေကန်မီးလောင်မှုကြောင့် အိမ်ခြေ ၂၀ နဲ့ ရဲစခန်းတို့ မီးလောင် ဆုံးရှုံး ခဲ့ပါတယ်။

အယ်လ်ဘာတာမှာ ယခုနှစ်အတွင်း တောမီး ၃၄၈ ကြိမ် ဖြစ်ပွားခဲ့ပြီး ဟက်တာ ၂၅၀၀ ကျော် လောင်ကျွမ်းခဲ့ကြောင်း အချက်အလက်ယူနစ်မန်နေဂျာ ခရစ်စတီ တက်ကာ က ဆိုပါတယ်။

"ဒါဟာ မကြာသေးခင်က ကျနော်တို့ တွေ့ဖူးသမျှကာလတွေထက် ဒီနှစ်ရဲ့တောမီးက ပိုသိသာ တယ်" လို့ တက်ကာက သတင်းစာရှင်းလင်းပွဲမှာ ပြောကြားခဲ့ပြီး တောမီးတွေဟာ ပိုမို ပြင်းထန်လာမယ်လို့ မျှော်လင့်ထားပါတယ်။

ပြီးခဲ့တဲ့ ရက်သတ္တပတ်အထိ ကနေဒါနိုင်ငံအနောက်ပိုင်းမှာ နွေဦးရာသီကို ကြန့်ကြန့်ခံနိုင်ခဲ့ပေမဲ့ မေလ အစောပိုင်းမှာ ပျမ်းမျှ ၁၀ ကနေ ၁၅ ဒီဂရီစင်တီဂရိတ်ထက်ပိုလာတဲ့အတွက် မီးလောင်မှုနဲ့ ရေကြီးမှု နှစ်ခုစလုံးဖြစ်ခဲ့ပါတယ်။

ဗြိတိန်ကိုလံဘီယာ အစိုးရရဲ့ ခန့်မှန်းချက်အရ သီတင်းပတ်ကုန်မှာ မိုးသည်းထန်စွာ ရွာသွန်း နိုင်တဲ့အတွက်  ကြိုတင်ပြင်ဆင်မှုတွေ လုပ်ထားဖို့ ပြည်သူလူထုကို တိုက်တွန်းထားပါတယ်။

ရန်ကုန် မြောက်ဒဂုံမြို့နယ်က ရပ်ကွက်တချို့နဲ့ ဘုန်းတော်ကြီးကျောင်းတွေမှာ ‌‌၂၀၂၃ ခုနှစ် ဇန်နဝါရီ ၂၀ ရက်က‌နေ အခုချိန်ထိ အမှိုက်မီးရှို့နေလို့ မီးဘေးစိုးရိမ်နေရတယ်လို့ ရပ်ကွက်နေသူတွေက ပြောပါတယ်။

မြောက်ဒဂုံမြို့နယ်မှာ ရပ်ကွက်ပေါင်း ၂၇ ရပ်ကွက်ရှိတဲ့အနက် ၂၉၊ ၃၀၊ ၃၁၊ ၃၂၊ ၃၃၊ ၄၂၊ ၄၄၊ ၄၆ ရပ်ကွက်တွေမှာ အမှိုက် မီးရှို့တာတွေ နေ့တိုင်းလုပ်နေတာပါ။ 

၃၀ ရပ်ကွက်နေသူ တဦးက  “ညနေ ၃ နာရီလောက်ကတည်း စရှို့ကြတာ၊ ၃၀၊ ၃၁၊ ၃၂ က တော်တော်ဆိုးတယ်။ ဒီဘက်မှာ ပတ်ပတ်လည်ကို ရှို့ကြတာ။ တချို့က အပျင်းပြေ ရှို့ နေကြသလိုပဲ။ အမှိုက်တွေ စုလိုက် ရှို့လိုက်။ တချို့ဆို ဘီယာဘူးလေးကိုင်ပြီး ဇိမ်လေးနဲ့ရှို့နေတာ။ သူတို့ မွှန်မမွှန်တော့ မသိဘူး။ ဘေးလူတွေ အတော်အသက်ရှုကြပ်တယ်။ ခေါင်းတွေပါ ကိုက်တာ။ တလမ်းကို ၃၊ ၄ အိမ်ရှို့နေကြတာ " လို့ ဆိုပါတယ်။ 

နေ့တိုင်းမီးရှို့နေတဲ့ ရပ်ကွက်တွေမှာ အမှိုက်ကန် လုံလုံလောက်လောက် မရှိတာရယ်၊ စည်ပင်အမှိုက်ကားက လာချိန်နောက်ကျတာတွေရယ်ကြောင့် ညနေနဲ့ မနက်ပိုင်းတွေမှာ မီးဖိုချောင်သုံးနဲ့ သစ်ရွက်ခြောက်တွေကို မီးရှို့ပြီး အခုလို ဖြေရှင်းနေတာလို့ သိရပါတယ်။ 

မြို့ခံ တဦးက  "လူနေအိမ်တွေတင် မဟုတ်ဘူး။ ဘုန်းကြီးကျောင်းတွေက မနက် မရှို့ရင် ညနေဆို ပုံမှန်ပဲ။ လေက ဝှေ့လာရင် အိမ်တံခါးတွေပါ ပိတ်ထားရတယ်။ အသက်ရှုလို့ကို မရဘူး။ တချို့အိမ်ဆို ပလတ်စတစ်အိတ်တွေပါ ထည့်ရှို့တာ။ သူတို့ သွားပြောရင် စည်ပင်ကား မလာလို့ ရှို့တာ။ အမှိုက်လှည်း မမီလိုက်လို့ ပြောတယ်။  တနေ့တနေ့ မီးဘေးပဲ စိုးရိမ်နေရတယ်"လို့ ပြောပါတယ်။ 

အမှိုက်မီးရှို့သူတွေကို ရပ်ကွက်ရုံးတွေဆီ တိုင်ကြားပေမဲ့ တားဆီးပေးတာမျိူး မရှိဘူးလို့ သိရပြီး မီးသတ်ဌာနကတရားဝင် ညွှန်ကြားချက် မရှိသေးလို့ အိမ်တွေမှာ ရေအိတ်၊ သဲပုံး ဆောင်ထားဖို့ သာ ပြောတယ်လို့ သိရပါတယ်။ 

မြောက်ဒဂုံမြို့နယ် ၃၀  ရပ်ကွက်၊ သခင်ဘစိန်လမ်းမှာ ဖေဖော်ဝါရီ ၆ ရက်က မီးလောင်လို့ ဈေးဆိုင်ခန်း ၅ ခန်း ပျက်စီးဆုံးရှုံးခဲ့ပါတယ်။