နေပြည်တော် ဥတ္တရခရိုင်၊ တပ်ကုန်းမြို့နယ် ရွှေမြို့ဘူတာကနေ နေပြည်တော်ဘူတာကြီးဘက်ကို ထွက်လာတဲ့ တွဲဆိုင်း ၃၂ တွဲပါ ကုန်ရထားတစီး ဧပြီ ၂၆ ရက် ဒီနေ့မနက် ၁၀ နာရီက မိုင်တိုင်အမှတ် ၂၄၆ မှာ မှောက်ခဲ့တယ်လို့ မြန်မာ့မီးရထားနဲ့ နီးစပ်သူတွေဆီက သိရပါတယ်။

ရွှေမြို့ဘူတာကနေ သကြား၊ ပြောင်း အစရှိတဲ့ ကုန်ပစ္စည်းတွေကို တွဲဆိုင်း ၃၂ တွဲပါ ကုန်ရထားနဲ့ တင်ဆောင်လာစဥ် မိုင်တိုင်အမှတ် ၂၄၆ မှာ လမ်းချော်တိမ်းမှောက်ခဲ့တာလို့ မီးရထားနဲ့ နီးစပ်သူတဦးက ဒီဗွီဘီကို ပြောပါတယ်။

“ရထားတွေက ကြံ့ခိုင်မှုမရှိသလို လမ်းတွေလည်း သိပ်မကောင်းဘူး။ ဒီလထဲမှာပဲ ရထားသံလမ်းချော်ပြီး မှောက်တာ နှစ်ကြိမ်ရှိပြီ။ ရန်ကုန်-မော်လမြိုင်ရထားလည်း မှောက်တာရှိတယ်။ အဲ့တုန်းက လူတွေ ဘာမှမဖြစ်လို့ တော်သေးတယ်။”

ကုန်ရထားတွဲမှောက်ပြီး အစုန်/အဆန် ရထားလမ်း ပိတ်ဆို့မှုဖြစ်ခဲ့ပြီး အစုန်/အဆန် ရထားတွေဟာ အဆန်တွဲ ရှောင်လမ်းမှတဆင့် သွားရတယ်လို့ တပ်ကုန်းမြို့ခံတဦးက ဒီဗွီဘီကို ပြောပါတယ်။

“ရထားမှောက်တာကြာပေမဲ့ ရထားက တာဝန်ရှိတဲ့သူတွေ ချက်ချင်းမလာဘူး။ အဲ့ဒါကြောင့် အစုန်အဆန်ရထားတွေ ရှောင်လမ်းက သွားရတယ်။ ပြီးမှရောက်လာတယ်။ အခု မှောက်တဲ့ရထားကို စစ်ဆေးနေတယ်။”

ပြီးခဲ့တဲ့ ဧပြီ ၈ ရက်ကလည်း ရန်ကုန်ဘူတာကြီးကနေ ထွက်လာတဲ့ အမှတ် ၈၉ အဆန် ရန်ကုန်-မော်လမြိုင်ရထား အဲ့ဒီနေ့ နေ့လယ် ၂ နာရီခွဲက ကျိုက္ကသာဘူတာနဲ့ ကျိုက်ထိုဘူတာ လမ်းပိုင်းကြားမှာ လမ်းချော်ပြီး မှောက်ခဲ့ပါတယ်။

မွန်ပြည်နယ်၊ ကျိုက်ထိုမြို့နယ် မုပ္ပလင်နဲ့ စွပ္ပနူးကျေးရွာကြားက ဦးကြာရိုးတံတား မီးရထားလမ်းကို ဖေဖော်ဝါရီ ၁၁ ရက်နေ့ မနက် ၈ နာရီခွဲအချိန်လောက် မိုင်းဆွဲတိုက်ခိုက်ခဲ့တယ်လို့  ကျိုက်ထိုတော်လှန်ရေးအင်အားစု တာဝန်ရှိသူတစ်ဦးက ဒီဗွီဘီကို ပြောပါတယ်။

အဲဒီ ရန်ကုန်-မော်လမြိုင် မီးရထားလမ်းဟာ စစ်ကောင်စီဘက်က အဓိက အသုံးပြုနေတဲ့အတွက်ကြောင့် စစ်ရေးပစ်မှတ်သတ်မှတ်ပြီး မိုင်းဆွဲတိုက်ခိုက်ခဲ့တာလို့ ဆိုပါတယ်။

မိုင်းဆွဲတိုက်ခိုက်ခံရတာကြောင့် စစ်ကောင်စီဘက်က ၃ ဦးထက်မနည်း သေဆုံးခဲ့တယ်လို့ ကျိုက်ထိုတော်လှန်ရေးအင်အားစု တာဝန်ရှိသူက ပြောပါတယ်။

ဒေသခံတွေအဆိုအရ မီးရထားလမ်းမှာ ဗုံးထောင်ထားတယ်ဆိုတဲ့ သတင်းအရ မီးရထားရုံပိုင် အပါအဝင် စစ်ကောင်စီတပ်ဖွဲ့တွေ သွားရောက်စစ်ဆေးရာမှာ ဗုံးပေါက်ကွဲခဲ့တာလို့ ဆိုပါတယ်။

အဲဒီဗုံးပေါက်ကွဲမှုကြောင့် မီးရထားရုံပိုင် အပါအဝင် စစ်ကောင်စီတပ်ဖွဲ့ဝင် ၅ ဦး ထိခိုက်ဒဏ်ရာရှိခဲ့ပြီး သေဆုံးမှု အခြေအနေ အသေးစိတ်ကိုတော့ မသိရသေးဘူးလို့ ပြောပါတယ်။

မီးရထားလမ်း ဗုံးပေါက်ကွဲပြီးနောက် စစ်ကောင်စီတပ်ဖွဲ့တွေက မုပ္ပလင်နဲ့ စွပ္ပနူးကျေးရွာကြားရှိ လမ်းတွေကို ပိတ်ဆို့ပြီး ရှာဖွေစစ်ဆေးတာတွေ လုပ်ဆောင်ခဲ့ပါတယ်။