စစ်ကိုင်းတိုင်း၊ ဝန်းသိုမြို့နယ်ရှိ နမ်းခမ်းရဲစခန်း ဒီဇင်ဘာ ၃၁ ရက် ည ၁၁ နာရီဝန်းကျင်က မီးလောင်မှုဖြစ်ပွားရာမှာ မီးငြှိမ်းသတ်သူ မရှိတဲ့အတွက် မီးလောင်ပြာကျသွားတယ်လို့ ဒေသခံတွေကပြောပါတယ်။
မီးလောင်နေစဉ် ငြှိမ်းသတ်ဖို့ ရေပုံးတွေနဲ့ ထွက်လာတဲ့ဒေသခံတွေက ရဲစခန်းမီးလောင်နေတာသိရတော့ ရေပုံးတွေ မိမိတို့အိမ်သီးသီးကိုပြန်ဝင်သွားကြတယ်လို့ ဒေသခံတွေက ပြောပါတယ်။
“မီးလောင်နေပြီ မီးလောင်နေပြီနဲ့ အော်သံကြားတော့ ပြည်သူတွေထွက်ကြည့်ကြတယ်။ ဘယ်သူ့အိမ်လဲမသိဘူးဆိုပြီးတော့ ရေပုံးတွေနဲ့ထွက်လာတာ ရဲစခန်းမီးလောင်တာမှန်းသိတော့ အိမ်ထဲ ကိုယ်စီပြန်ဝင်သွားကြတယ်”လို့ ဒေသခံတစ်ဦးက ပြောပါတယ်။
မီးရှို့ ခံရတဲ့ ရဲစခန်းတွေက ရဲတွေဟာ စခန်းအတွင်းမနေကြတော့ဘဲ စခန်းပြောင်းရွှေ့နေထိုင်လာကြတယ်လို့ သိရပါတယ်။ ပြီးခဲ့တဲ့လပိုင်းကလည်း ထီးချိုင့်နဲ့ ကသာမြို့နယ်က ရဲစခန်းတချို့ မီးရှို့ဖျက်ဆီးခံခဲ့ရပါတယ်။
ဒီဇင်ဘာလကတည်းက ကသာ၊ ကောလင်း၊ ဝန်းသို၊ ပင်လယ်ဘူး စတဲ့မြို့တွေမှာ တပ်ကြပ်ကြီးစာရေးမတွေကို CDM ဝန်ထမ်း ကျောင်းဆရာမတွေအဖြစ် အသွင်ယူပြီး စစ်ကောင်စီရဲ့ သတင်းပေးတာဝန် ထမ်းဆောင်ဖို့ အယောက် ၁၇၀ ကျော် စေလွှတ်ထားတယ်လို့လည်း သိရပါတယ်။
Photo WR team
ချင်းပြည်နယ်၊ ဟားခါးမြို့မှာ အောက်တိုဘာလ ၁၄ ရက်ညက ပြည်နယ် လဝကရုံးဟောင်း မီးလောင်ကျွမ်းခဲ့တယ်လို့ ဟားခါးမြို့ဒေသခံတွေဆီကနေ သိရပါတယ်။
ဟားခါးမြို့ ချင်းဦးစီးရပ်ကွက်မှာ မနေ့ည ၁၀ နာရီ ခွဲလောက်မှာ ပြည်နယ် လဝက ရုံး မီးလောင်ကျွမ်းခဲ့တာလို့ ဟားခါးမြို့ခံတစ်ယောက်က ဒီဗွီဘီကိုပြောပါတယ်။
မီးလောင်မှုဖြစ်ပွားရတဲ့ အကြောင်းရင်းကိုတော့ မသိရသေးဘဲ ပေါက်ကွဲသံတွေကြားရတာကြောင့် ဘယ်သူမှ မီးငြိမ်းသတ်ဖို့မထွက်ရဲဘဲ ည ၁၁ နာရီကျော်လောက်မှာ မီးသတ်ကားတွေရောက်တဲ့ အချိန်မှာတော့ အဆောက်ဦးဟာ မီးလောင်ပြာကျသွားပြီလို့ပြောပါတယ်။
ဟားခါးမြို့မှာ CDF တပ်ဖွဲ့နဲ့ အကြမ်းဖက်စစ်အုပ်စုတွေတိုက်ပွဲ ဖြစ်ပွားပြီးတော့ စက်တင်ဘာ ၁၈ ရက်နေ့က မီးလောင်မှုဖြစ်ပွားသလို့ အခု ဒုတိယကြိမ်မြောက် ထပ်မံမီးလောင်ကျွမ်းခဲ့တာလို့ ဒေသခံတွေဆီကနေ သိရပါတယ်။
ဖလမ်းမြို့နယ်၊ ရီလ်သီးရွာနဲ့ ထလန်ရောန်ကျေးရွာမှာလည်း အောက်တိုဘာလ ၁၃ ရက်နဲ့ ၁၄ ရက်နေ့တွေမှာ ဘုရားကျောင်းအပါအဝင် နေအိမ် ၁၉ လုံးကို အကြမ်းဖက်စစ်တပ်က မီးရှို့ ဖျက်ဆီးခဲ့ပါတယ်။
