တနင်္သာရီတိုင်း၊ မြိတ်မြို့မှာ မုန်တိုင်းအန္တရာယ် ကျရောက်ပါက ကူညီကယ်ဆယ်ရေး လုပ်ငန်းတွေကို ကြိုတင်ပြင်ဆင်နေတယ်လို့ မီးသတ်တပ်ဖွဲ့ဝင်တွေထံက သိရပါတယ်။

မီးသတ်တပ်ဖွဲ့ဝင်တဦးက “မီးသတ်တပ်ဖွဲ့ကနေပြီး ရှာဖွေကယ်ဆယ်သင်တန်းတွေ ပြန်ပေးနေတယ်။ တခြား အရန်မီးသတ်တပ်ဖွဲ့တွေကိုလည်း အကြောင်းကြားထားတာရှိတယ်။ မေလ ၁၂၊ ၁၃၊ ၁၄ ရက်တွေမှာ လိုအပ်ရင် ခေါ်လို့ရအောင် အဆင်သင့်ဖြစ်အောင် လုပ်ခိုင်းထားတယ်” လို့ ပြောပါတယ်။

နာရေးကူညီမှုအဖွဲ့ဝင်တဦးကလည်း “ပရဟိတအသင်းတွေ အနေနဲ့တော့ ကြိုတင်ပြင်ဆင်ထားတာတော့ မရှိဘူး။ မီးသတ်ဌာနကတော့ ပြင်ဆင်ထားပါတယ်” လို့ ဒီဗွီဘီကို ပြောပါတယ်။

မြိတ်မှာတော့ အစဉ်အဆက် ထိခိုက်မှုနည်းလို့ အခုလည်း ဒေသခံတွေအနေနဲ့ အများကြီး စိုးရိမ်တာမျိုး မတွေ့ရဘူးလို့ ဒေသခံတဦးက ပြောပါတယ်။

ဘင်္ဂလားပင်လယ်အော်မှာ ဖြစ်ပေါ်နေတဲ့ မုန်တိုင်းငယ်ဟာ နောက် ၉ နာရီအတွင်း အားကောင်းတဲ့ မုန်တိုင်းငယ်အဖြစ်သို့ လည်းကောင်း၊ ဒီနေ့ညပိုင်းမှာ ဆိုင်ကလုန်းမုန်တိုင်းအဖြစ်သို့လည်းကောင်း၊ မေလ ၁၁ ရက်မနက်မှာ အားကောင်းတဲ့ ဆိုင်ကလုန်းမုန်တိုင်းအဖြစ်သို့လည်းကောင်း၊ မေလ ၁၂ ရက်မနက်မှာ အားအလွန်ကောင်းတဲ့ ဆိုင်ကလုန်းမုန်တိုင်းအဖြစ်သို့ ရောက်နိုင်တယ်လို့ မိုးဇလဌာနက ဒီမနက် ခန့်မှန်းထားပြီး မေလ ၁၄ ရက်မှာ ကော့ဘဇားမြို့နဲ့ ကျောက်ဖြူမြို့တို့ကြားမှ ဖြတ်ကျော်ဝင်ရောက်နိုင်တယ်လို့ ခန့်မှန်းထားပါတယ်။

ဆိုင်ကလုန်းမုန်တိုင်းအရှိန်ကြောင့် လေပြင်းတိုက်ခတ်တာ၊ မိုးကြီးတာ၊ ရုတ်တရက် ရေကြီးတာနဲ့အတူ မြေပြိုတာတွေ ဖြစ်ပေါ်နိုင်တဲ့အတွက် ကုန်းမြင့်ဒေသအနီး နေထိုင်ကြသူတွေအနေနဲ့ မြေပြိုမှုအန္တရာယ်ကိုလည်းကောင်း၊ မြန်မာ့ကမ်းရိုးတန်း တလျှောက်နဲ့ မြစ်ငယ်၊ ချောင်းငယ်တွေအနီး နေထိုင်ကြသူတွေအနေနဲ့ ရေကြီး၊ ရေလျှံမှုတွေ ဖြစ်ပေါ်နိုင်တာကြောင့် ကြိုတင်သတိပြု နေထိုင်ကြဖို့ မိုးဇလက တိုက်တွန်းထားပါတယ်။

ပြည်တွင်းလေကြောင်း ပျံသန်းရေးနဲ့ မြန်မာ့ကမ်းရိုးတန်းတလျှောက်နဲ့ ကမ်းလွန်ပင်လယ်ပြင် တို့ရှိ ကမ်းနီး၊ ကမ်းဝေး ငါးဖမ်းရေယာဉ်တွေ၊ သင်္ဘောတွေအနေနဲ့လည်း ကြိုတင်သတိပြု ရှောင်ရှားနိုင်ဖို့လည်း မိုးလေဝသနဲ့ ဇလဗေဒ ညွှန်ကြားမှုဦးစီးဌာနက အကြံပြုထားပါတယ်။

ဧရာဝတီတိုင်းမှာ မုန်တိုင်းငယ် ဝင်ရောက်တိုက်ခတ်မယ်လို့ ကြေညာထားတဲ့ အတွက်  မီးသတ်တပ်ဖွဲ့က မတ်လ ၂၀ ရက် မနေ့  ညနေပိုင်းက စတင်ကာ မုန်တိုင်းအန္တရာယ် ကာကွယ်တားဆီးဖို့  ကြိုတင်ပြင်ဆင်မှုတွေ ပြုလုပ်နေပါတယ်။

မြစ်ဝကျွန်းပေါ်ဒေသ ဖြစ်တာကြောင့် မုန်တိုင်းအရှိန်ကြောင့် ထူးကဲဒီရေတက်လာနိုင်သလို ပင်လယ်ထဲ ငါးဖမ်းမထွက်ဖို့နဲ့ အနိမ့်ပိုင်းနေရာတွေမှာ မနေထိုင်ကြဖို့ သတိပေးတာတွေ လိုက်လံ ကြေညာခဲ့တယ်လို့  ဒေသခံတွေက ပြောပါတယ်။

“မုန်တိုင်းဝင်မယ် သတိထားဖို့ပေါ့။ ပြီးတော့ အနိမ့်ပိုင်းဒေသမှာ နေထိုင်သူတွေ သတိထားဖို့ ပင်လယ်ထဲ မထွက်ဖို့ အဲဒီလိုမျိုးတွေ လိုက်အော်တ”လို့ ဒေးဒရဲမြို့ခံတဦးက ပြောပါတယ်။

မုန်တိုင်းဝင်ရောက်စဥ် သဘာဝဘေးအန္တရာယ်ကြိုတင်ခံရမယ့် အနေအထားမျိုးရှိလာရင် ကယ်ဆယ်နိုင်ဖို့အတွက် ပရဟိတအသင်းအဖွဲ့တွေအနေနဲ့လည်း ကြိုတင်ပြင်ဆင်တာတွေလည်း ပြုလုပ်နေကြပါတယ်။

ချောင်းသာ၊ ငွေသောင်ယံ ပင်လယ်ကမ်းခြေတွေ၊ ပုသိမ်၊ ဟင်္သာတ၊ မြန်အောင်၊  မော်လမြိုင်ကျွန်းအပါဝင် ဧရာဝတီတိုင်းအတွင်းက မီးသတ်တပ်ဖွဲ့တွေအနေနဲ့လည်း အရေးပေါ်ကယ်ဆယ်ရေးပစ္စည်းတွေ ကြိုတင်ပြင်ဆင်ထားတာ တွေ့ရသလို နေရာအနှံ့ ဒေသခံပြည်သူတွေ သတိထားဖို့ လိုက်လံကြေညာနေတယ်လို့ ဒေသခံတွေက ပြောဆိုပါတယ်။

နာဂစ်မုန်တိုင်းဖြစ်ပွားပြီး ၁၃ နှစ်အကြာ ဧရာဝတီတိုင်းကို ဦးတည်လာတဲ့ မုန်တိုင်းကြောင့် ဧရာဝတီတိုင်းက ပြည်သူတွေအနေနဲ့ မပေါ့ဆဖို့ မိုးလေဝသပညာရှင်တွေကလည်း သတိပေး ပြောဆိုထားပါတယ်။

မုန်တိုင်းငယ်ဟာ မတ်လ ၂၁ ရက် ဒီနေ့ နေ့လယ်ပိုင်း ကိုကိုးကျွန်းအနီးသို့ ရောက်ရှိနိုင်တယ်၊ မတ်လ ၂၂ ရက် မနက်ဖြန်မနက်  ဟိုင်းကြီးကျွန်းအနီးကို ရောက်ရှိနိုင်ပြီး ဧရာဝတီတိုင်းနဲ့ ရန်ကုန်တိုင်းမှာ  အမြင့်ဆုံးလေတိုက်နှုန်း တစ်နာရီလျှင် မိုင် ၄၀ မှ ၄၅ မိုင်အထိ တိုက်ခတ်နိုင်တယ်လို့ မိုးဇလက ခန့်မှန်းထုတ်ပြန်ထားပါတယ်။

မတ် ၂၃ ရက်မှာတော့  ရခိုင်ကမ်းရိုးတန်းကို ရောက်ရှိနိုင်ပြီး အမြင့်ဆုံးလေတိုက်နှုန်းမှာ တစ်နာရီလျှင် မိုင် ၄၀ အထိ တိုက်ခတ်နိုင်တယ်လို့ ဆိုပါတယ်။

ဧရာဝတီတိုင်း ဟိုင်းကြီးကျွန်း၊ မော်ကျွန်း၊ ဘိုကလေး၊ ဒေးဒရဲနဲ့ မအူပင် မြို့နယ်တွေမှာ မနေ့ကလည်းက မိုးတွေရွာသွန်းနေပါတယ်။