ဒီဇင်ဘာလ ၁၉ ရက်နေ့ အထူးဒေသ(၁)မုံးကိုးခရိုင်၊ ဖောင်းဆိုင်ဒေသမှာ တိုက်ပွဲဖြစ်ပွားခဲ့ပြီးနောက် စစ်ကောင်စီတပ်ဆီက စစ်ဘက်ဆိုင်ရာ ပစ္စည်းအမြောက်အမြား သိမ်းဆည်းရမိခဲ့တယ်လို့ မြန်မာအမျိုးသားဒီမိုကရက်တစ်မဟာမိတ်တပ်မတော် MNDAA (ကိုးကန့်) က ထုတ်ပြန်ထားပါတယ်။
ဒီဇင်ဘာလ ၁၉ ရက်နေ့က အထူးဒေသ(၁)မုံးကိုးခရိုင်၊ ဖောင်းဆိုင်ဒေသရှိ မြန်မာအမျိုးသားဒီမိုကရက်တစ်မဟာမိတ်တပ်မတော် MNDAA(ကိုးကန့်) ရဲ့ မန်ရန်တပ်စခန်းကို စစ်ကောင်စီ တပ်မ ၉၉ လက်အောက်ခံတပ်ရင်း ၁၅၊ ၅၉၊ ၁၅၊ ၇၉၊ ၁၁၃ နဲ့ တပ်မ ၇၇ လက်အောက်ခံ ၃၁၃ တပ်ရင်းတွေက အင်အား ၅၀၀ ကျော် စုဝေးပြီး ၁၀ ကြိမ် ထိုးစစ်ဆင်ခဲ့ကြောင်း၊ တိုက်ပွဲအတွင်း မြေပြင်အမြောက်အဖွဲ့က မတူညီတဲ့ လက်နက်ကြီး အမြောက် ၁၅၀၀ ကျော် ပစ်ခတ်ခဲ့ပြီး တိုက်လေယာဉ်တွေနဲ့ ပူးပေါင်း ဗုံးကြဲခဲ့ကြောင်း၊ တစ်နေ့လုံး နှစ်ဖက် တိုက်ပွဲပြင်းထန်ခဲ့တယ်လို့ ဆိုပါတယ်။
ဒါ့အပြင် မုံးကိုးခရိုင် ဟုဟောင်းအနောက်ဘက် တောင်တန်းနဲ့ မူပန်(သိန္နီ) ရဲ့ ပန်ခမ်းဒေသနောက်ဘက်ခြမ်းမှာလည်း နှစ်ဖက် တိုက်ပွဲဖြစ်ပွားခဲ့သလို MNDAA တပ်ဖွဲ့ရဲ့ ချင်ချိုင့်ထန် လုံခမ်တပ်စခန်း နဲ့ လှိုင်ရှိန်တောင်တန်းကိုလည်း စစ်ကောင်စီက တိုက်လေယာဉ်နဲ့ တစ်ကြိမ်လာရောက်ပစ်ခတ်ပြီး ရှိကျိကျတောင်တန်းနဲ့ ပန်းရင်လပ တပ်စခန်းကိုလည်း မြေပြင်ကနေ လက်နက်ကြီးတွေနဲ့ အကြမ် ၇၀ ကျော် ပစ်ခတ်ခဲ့တယ်လို့ ကိုးကန့်တပ်က ထုတ်ပြန်ထားပါတယ်။
တိုက်ပွဲအတွင်း စစ်ကောင်စီဘက်က ထိခိုက်ဒဏ်ရာကျဆုံး ၁၀၀ နီးပါရှိခဲ့ကြောင်း၊ စစ်မြေပြင်မှာလည်း စစ်ကောင်စီတပ်သား အလောင်းများစွာကျန်ရှိခဲ့ပြီး ဒဏ်ရာရသူ ၈၀ ကျော်ရှိကြောင်း၊ MNDAA(ကိုးကန့်) ဘက်ကတော့ ၂ ဦးကျဆုံးပြီး ၆ ဦးဒဏ်ရာရရှိတယ်လို့ ဆိုပါတယ်။
စစ်မြေပြင်မှာ ကျန်ရှိခဲ့တဲ့ စစ်ကောင်စီ တပ်သားအလောင်းတွေကို မြေမြှုပ်သင်္ဂြိုဟ်ပေးခဲ့ပြီး လက်နက်ခဲယမ်းအမြောက်အမြား သိမ်းဆည်းရမိခဲ့တယ်လို့ ဆိုပါတယ်။
စစ်ကောင်စီတပ်ဟာ မုံးကိုးခရိုင် မန်ရန်တိုက်ပွဲပြီးနောက် စစ်အင်အားများစွာ ထပ်မံဖြည့်တင်းနေတာကြောင့် နှစ်ဖက် စစ်ရေးအခြေအနေ ပိုမိုတင်းကျပ်လာနိုင်ကြောင်းလည်း MNDAA တပ်ဖွဲ့က ထုတ်ပြန်ထားပါတယ်။
တိုက်ပွဲဖြစ်စဉ်နဲ့ သေဆုံးဒဏ်ရာရမှုအခြေအနေကို စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။
ရှမ်းပြည်နယ်မြောက်ပိုင်း၊ မူဆယ်ခရိုဂ်၊ မူဆယ်မြို့နယ်၊ မုံးကိုးမြို့နယ်ခွဲ၊ ဖောင်းဆိုင်ဘက်မှာ ဒီဇင်ဘာလ ၁၀ ရက်နေ့မနက် ၅ နာရီ ဝန်းကျင်ခန့်ကနေ နေ့လယ်ပိုင်းအထိ စစ်ကောင်စီတပ်နဲ့ ကိုးကန့် MNDAA တို့အကြား တိုက်ပွဲ ပြန်လည်ပြင်းထန်နေပြီး အရပ်သား ၂ ဦး ထိခိုက်ဒဏ်ရာ ပြင်ထန်ပြီး ၁ ဦး သေဆုံးခဲ့တယ်လို့ ဒေသခံတွေဆီက သိရပါတယ်။
"ဟုတ်တယ်၊ ဒီမနက် ၅ နာရီ ကနေ မန်းယန်ရွာနဲ့ ဘန်မွေးရွာတွေဘက် တိုက်ပွဲဖြစ်တာကို မုံးကိုးမြို့ကနေလည်း လက်နက်ကြီး ပစ်ကူတယ်။ ဖောင်းဆိုင်ရွာကနေလည်း လက်နက်ကြီး ပစ်ကူနေတာကြောင့် ဆုတောင်းတောင်အဖွဲ့က ဖောင်းဆိုင်ရွာက စစ်ကောင်စီတပ်ကို ပစ်လိုက်တာ အရပ်သား ပြည်သူတွေ ၁ ယောက်က သေဆုံးသွားတယ်။ နောက် ၁ ယောက်နဲ့ ကလေးလေး ထိခိုက် ဒဏ်ရာရသွားတယ" လို့ ဒေသခံ ၁ ဦးက ပြောပါတယ်။
သေဆုံးသွားသူမှာ ဖောင်းဆိုင်ဈေးရွာက အသက် ၆၀ အရွယ် ဦးရင်မင့်ကန်ဖြစ်ပြီး ဒဏ်ရာရသူ ၂ ဦးက မြေးဖြစ်သူ ကလေးငယ်နဲ့ ဦးဖုတ်ဂျောင်ခေါင်းဟောင်တို့ ဖြစ်တယ်လို့ ဆိုပါတယ်။
မုံးကိုး ဒေသခံတဦးက "ဒီမနက် ၅ နာရီ မထိုးခင်ကတည်းက တောက်လျှောက် သေနတ်ပစ်သံတွေ ကြားနေတယ်။ ၁၁ နာရီ ဝန်းကျင်ထိ။ လက်နက်ကြီးကတော့ တောက်လျှောက်ပစ်နေတယ်။ မနေ့ညလည်း ည သန်းခေါင်မှာလည်း ပစ်နေတာပဲ။ မနေ့ညနဲ့ ဒီမနက်တော့ တော်တော်ပြင်းထန်တယ်" လို့ ပြောပါတယ်။
မုံးကိုး နဲ့ မူဆယ် လမ်းတလျှောက် နေရာအနှံ့ စစ်ကောင်စီတွေ ရှိနေပြီး ရွာအများစုမှာ စခန်းချ နေထိုင်နေကြတယ်လို့ ဆိုပါတယ်။
စစ်ကောင်စီဘက်က စစ်ကား ၄၀ ကျော် စစ်ကူဖို့ မုံးကိုးဘက်ကနေ ထိုးစစ်ဆင်လာပြီး မန်ရန်တပ်စခန်းနဲ့ ရှိကျိကျတောင်တန်းကို လက်နက်ကြီးကျည် ၅၀ ကျော်၊ သေနတ်ပစ်ဗုံးသီး၂၀ ကျော်အပါအဝင် စက်သေနတ်တွေနဲ့ပါ ပစ်ခတ် တိုက်ခိုက်ခဲ့တဲ့အပြင် တပ်စခန်းရှိရာနေရာတွေကို ဒရုန်းလွှတ် ထောက်လှမ်းခဲ့တယ်လို့ ကိုးကန့် MNDAA ကသတင်းထုတ်ပြန်ထားပါတယ်။
ဖောင်းဆိုင်ဘက်မှာ စစ်ကောင်စီနဲ့ ကိုးကန့် MNDAAတို့အကြား တိုက်ပွဲတွေကြောင့် ဒီနေ့အထိ လက်နက်ကြီး သေဆုံးသူ ၃ ဦးနဲ့ ထိခိုက်ဒဏ်ရာရရှိသူ ၃ ဦးနဲ့ အထက်ရှိပြီလို့ သိရပါတယ်။
Photo Crd# Wikipedia, The Kokang
