ဘရာဇီးနိုင်ငံတောင်ပိုင်း ဆန်တာကာတာရီနာပြည်နယ်က ဘလူမန်နောင်မြို့ရှိ ပုဂ္ဂလိက မူကြိုကျောင်းတကျောင်းမှာ ဧပြီ ၅ ရက်က အသက် ၂၅ နှစ်အရွယ် အမျိုးသားတဦးဟာ ပုဆိန်အသေးတလက်နဲ့ တိုက်ခိုက်ခဲ့တာကြောင့် ကလေးငယ် ၄ ဦးထက်မနည်း သေဆုံးသွားပြီး နောက်ထပ် ၄ ဦး ထိခိုက်ဒဏ်ရာ ရသွားကြောင်း နယ်မြေခံရဲတွေနဲ့ ဆေးရုံက ပြောပါတယ်။

ဒီတိုက်ခိုက်မှုအတွက် တာဝန်ရှိတဲ့ ကျူးလွန်သူ အမျိုးသားကို ဖမ်းဆီးထားတယ်လို့ ရဲတပ်ဖွဲ့က ပြောပါတယ်။

တိုက်ခိုက်သူဟာ မူကြိုကျောင်းရဲ့ နံရံတွေကို ခုန်တက်ကျော်လွှားပြီး ကျောင်းထဲကို ဝင်ရောက်ခဲ့တာဖြစ်ကြောင်း ဒေသခံ လုံခြုံရေးအကြီးအကဲ မာစီယို အလ်ဘာတို ဖီလစ်ပီက သတင်းထောက်တွေကို ပြောပါတယ်။

မီးသတ်သမား အကြီးအကဲ ဒီယိုဂိုက သူတို့ ကျောင်းကိုရောက်ချိန်မှာ အသက် ၅ နှစ်ကနေ ၇ နှစ်ကြား ယောက်ျားလေးသုံးယောက်နဲ့ မိန်းကလေးတယောက် သေဆုံးကြောင်း အတည်ပြုခဲ့ပြီး ဒဏ်ရာရသွားတဲ့ တခြားကလေး ၄ ယောက်ထဲမှာ ၁ ယောက်က စိုးရိမ်ရတဲ့ အခြေအနေမှာရှိလို့ ဆေးကုသမှု ခံယူနေရတယ်လို့ ပြောပါတယ်။

ဒီတိုက်ခိုက်မှုဟာ မကောင်းဆိုးဝါးလုပ်ရပ်လို့ သမ္မတ လူးဝစ်ဇ် အင်နာစီယို လူလာ ဒါ ဆေးလ်ဗားက သူ့ရဲ့တွစ်တာမှာ ရေးထားပါတယ်။

“ဒီလိုအဖြစ်ဆိုးမျိုးဟာ လက်မခံနိုင်စရာပါပဲ။ အဓိပ္ပာယ်မဲ့ အမုန်းပွားမှုနဲ့ သူရဲဘောကြောင်တဲ့ လုပ်ရပ် ဖြစ်ပြီးတော့ အပြစ်မဲ့ပြီး အကာအကွယ်မဲ့တဲ့ ကလေးတွေကို အကြမ်းဖက်တဲ့ လုပ်ရပ်ပဲ” လို့လည်း သမ္မတ လူလာက ပြောပါတယ်။

ကချင်ပြည်နယ်၊ ဖားကန့်မြို့နယ်၊ ဆန်ခါကျေးရွာမှာ ဒီဇင်ဘာ ၃၀ ရက်က စစ်ကောင်စီဘက်ကပစ်တဲ့ လက်နက်ကြီးကျည် မူကြိုကျောင်းအနီးကျရောက်လို့ ကလေးငယ်တွေအပါအဝင် ဒေသခံ ၆ ဦးထက်မနည်း ဒဏ်ရာရရှိခဲ့တယ်လို့ ဒေသခံတွေကပြောပါတယ်။

မဇွပ်ယန်အချုပ်ထောင်နားမှာတပ်စွဲထားတဲ့ စစ်ကောင်စီတပ်ကနေ နေ့လယ် ၂ နာရီ မိနစ် ၂၀ လောက်မှာ ရွာတွေဘက်ကို လက်နက်ကြီးနဲ့ ပစ်ခတ်ခဲ့တာကြောင့် ရွာထဲကို ၂ လုံးကျပြီး ရွာစပ်ကို ၁ လုံးကျရောက်ပေါက်ကွဲခဲ့တာလို့ ဒေသခံတွေက ပြောပါတယ်။

 ဒေသခံတစ်ဦးက “အားလုံးဒဏ်ရာရတာတော့ လက်ရှိ ၆ ဦး နောက်ထပ်ရှိနိုင်သေးတယ်။ ခုတော့ ဖားကန့်ဆေးရုံ ပို့လိုက်တယ်။ ရွာထဲ ၁ လုံး ဘုရားရှိခိုးကျောင်း ၁ လုံးနဲ့ မှော်ပုံရွာနောက်ဘက် ၁ လုံးကျတာ''လို့ ပြောပါတယ်။

စစ်ကောင်စီရဲ့လက်နက်ကြီး ကျည်ပေါက်ကွဲမှုကြောင့် ရွာထဲကနေအိမ်မှာ အသက် ၂၈ အရွယ် အမျိုးသမီး ၁ ဦးဒဏ်ရာရရှိပြီး ဆန်ခါကျေးရွာ RC ရိုမင်ကက်သလစ်ဘုရားကျောင်းဝင်း မူကြို ကလေးထိန်းကျောင်းအနီးသို့ ကျရောက်ပေါက်ကွဲချိန်မှာ ကလေးငယ်တွေအပါအဝင် ၅ ဦးဒဏ်ရာတွေ ရရှိခဲ့တာလို့ ဆိုပါတယ်။

တိုက်ပွဲဖြစ်ပွားတာမရှိဘဲ စစ်ကောင်စီတပ်ဘက်က ကျေးရွာတွေကို လက်နက်ကြီးတွေနဲ့ ပစ်ခတ်ခဲ့တာလို့ ဒေသခံတွေက ပြောပါတယ်။

ကျေးရွာဘက်ကို လက်နက်ကြီးတွေနဲ့ ပစ်ခတ်ခဲ့တဲ့ စစ်ကောင်စီတပ်စွဲရာ အချုပ်ထောင်အနီးကို ဒီဇင်ဘာလ ၂၃ ရက်က ဒေသခံကာကွယ် ရေးတပ်တွေက လာရောက်ပစ်ခတ်တိုက်ခိုက်တာ ရှိခဲ့ပါတယ်။