ရခိုင်ပြည်နယ်၊ မောင်တောမြောက်ပိုင်း၊ ဝက်ကျိန်း မြိုတိုင်းရင်းသားကျေးရွာက ၄ နှစ်အရွယ် ကလေးငယ်တဦး စစ်ကြွင်း လက်ပစ်ဗုံးကွဲပြီး မေလ ၃ ရက် ညနေ ၄ နာရီလောက်မှာ သေဆုံးသွားပါတယ်။

မောင်တောကိုရောက်ရှိနေတဲ့ မြိုအမျိုးသမီးလူငယ်တဦးက “အဲ့မှာက စစ်တပ်နဲ့ အေအေ စစ်ဖြစ်ကြသေးတယ်လေ။ လယ်ထဲသွားရင်း ကလေးအမေကတွေ့လို့ ကောက်ခဲ့တာ။ ကလေးက အဲဒါကို ခေါက်ကစားနေချိန်မှာ ထပေါက်ကွဲတယ်လို့ပြောတယ်” လို့ ပြောပါတယ်။

မြိုတိုင်းရင်းသား လူမျိုးတွေဟာ တောတောင်ကို အဓိက အမှီပြု အသက်မွေးဝမ်းကျောင်း နေထိုင်ကြသူတွေဖြစ်ကြပြီး စစ်လက်နက်ပစ္စည်းတွေရဲ့ အန္တရာယ်အကြောင်းကို သေချာစွာမသိလို့ ပေါက်ကွဲနိုင်မှန်းမသိဘဲ ယူလာတာလို့ ပြောပါတယ်။

၂၀၂၂ နိုဝင်ဘာ ၂၆ ရက်မှာ စစ်ကောင်စီနဲ့ ရက္ခိုင့်တပ်တော် (အေအေ) တို့အကြား အပစ်ရပ် သဘောတူခဲ့ကြပေမဲ့ စစ်ကြွင်းလက်နက်တွေကိုတော့ ဘယ်အဖွဲ့ကမှ တာဝန်ယူ စစ်ဆေးခဲ့တာမရှိလို့ မပေါက်ကွဲခဲ့တဲ့ လက်ပစ်ဗုံးတလုံးကြောင့် အပြစ်မဲ့ ကလေးငယ်တဦး အသက်ဆုံးရှုံးရတာ ဖြစ်ပါတယ်။

အပစ်ရပ်သဘောတူညီမှုမယူခင် ၁၀ ရက်အလို ၂၀၂၂ နိုဝင်ဘာ ၁၆ ရက်တုန်းကလည်း ဂြစ်ချောင်းမြိုရွာမှာ လက်နက်ကြီးကျရောက်လို့ လူ ၁၂ ဦး သေဆုံးပြီး ၂၃ ယောက် အရေးပေါ် ဆေးကုသမှု ခံယူခဲ့ရပါတယ်။

ဒီဇင်ဘာ ၃ ရက်ကလည်း ဝက်ကျိန်းဘုရားလမ်းဘက် တောထဲသွားတဲ့ ၁၈ နှစ်အရွယ် လူငယ်တယောာက် မြေမြှုပ်မိုင်းပေါက်ကွဲပြီး ဘယ်ဘက်ခြေထောက် ဖြတ်ခဲ့ရပါတယ်။

ရခိုင်ပြည်နယ်၊ မောင်တောမြို့နယ်မြောက်ပိုင်း ရွှေတောင်ကျေးရွာက ဝါးခုတ်သွားပြီး ပျောက်ဆုံးနေတဲ့ ရွာသား ၂ ဦးရဲ့ ရုပ်အလောင်းကို ဒီဇင်ဘာ ၁၉ ရက် ဒီနေ့ နေ့လယ် ၁ နာရီလောက်က တောတွင်းတနေရာမှာ မြေမြှုပ်ထားတာကို ရွာသားတွေ ရှာတွေ့ခဲ့တယ်လို့ လိုက်ရှာရာမှာပါဝင်တဲ့ ရွှေတောင်ကျေးရွာသားတဦးက အတည်ပြု ပြောပါတယ်။

ပျောက်ဆုံးနေသူနှစ်ဦးဟာမောင်တောမြို့နယ်၊ ရွှေတောင်ကျေးရွာနေ အသက် ၂၈ နှစ်အရွယ် ဦးသိန်းထွန်းနဲ့ အသက် ၃၆ နှစ်အရွယ် ဦးဘသန်းတို့ဖြစ်ပြီး သူတို့ နှစ်ဦးဟာ ဒီဇင်ဘာ ၁၈ ရက် မနက် ၈ နာရီလောက်က နေအိမ်အတွက်လိုအပ်တဲ့ ဝါးတွေခုတ်ဖို့ တောထဲသွားခဲ့ကြရာက အိမ်ပြန်မရောက်ဘဲ ပျောက်ဆုံးနေခဲ့ကြတာပါ။

ဒီဇင်ဘာ ၁၉ ရက် မနက်ပိုင်းကစပြီး ရွာသူရွာသားတွေ စုပေါင်းလိုက်ရှာခဲ့ကြရာ ရွာနဲ့ ၂ မိုင်လောက်ဝေးတဲ့ တောတွင်းတနေရာမှာ သူတို့နှစ်ဦးရဲ့ ရုပ်အလောင်းတွေ မြေမြှုပ်ထားတာကို တွေ့ရှိခဲ့ကြတာပါ။

ရွှေတောင်ကျေးရွာသားတဦးက“မနေ့က သူတို့ နှစ်ဦးက အိမ်ပြုပြင်ဖို့ တောထဲကို ဝါးသွားခုတ်ကြတာ။ ညအထိ အိမ်ပြန်မရောက်တော့ ဒီနေ့မှာ ရွာသားတွေစုပြီး လိုက်ရှာခဲ့ကြတာ။ မြေမြှုပ်ထားတဲ့ သူတို့ ၂ ဦးရဲ့ အလောင်းကို ရှာတွေ့ခဲ့ကြတာပါ။”လို့ ပြောပါတယ်။

ပျောက်ဆုံးနေသူ ၂ ဦးကို ရွာသူရွာသားတွေ ရှာဖွေနေစဥ် တောထဲမှာတွေ့တဲ့ မွတ်ဆလင် နှစ်ယောက်ကို  အခုလူသတ်မှုနဲ့ ပတ်သက်မှုရှိမရှိ ပြင်ဖြူနယ်ခြားစောင့်တပ်က စစ်ဆေးနေတယ်လို့ ဒေသခံတွေက ဆိုပါတယ်။

မျက်မြင်ရွာသားတဦးက “ပြင်ဖြူ နယ်မြေစခန်းမှာတော့ သေမှုသေခင်းနဲ့ အမှုဖွင့်ထားတယ်။ နယ်ခြားစောင့်တွေ စစ်ဆေးပြီး အလောင်းကို ဖော်ယူလာပြီ။ ခေါင်းတခြား ခြေတခြား အပိုင်းပိုင်း ဖြတ်ထားကြတာဗျ” လို့ ပြောပါတယ်။

လက်ရှိ အလောင်းတွေကို ဘယ်လိုသင်္ဂြိုဟ်မယ်ဆိုတာ မသိရှိရသေးကြောင်း ဒေသခံတွေက ပြောပါတယ်။